“Mustaqillikni mustahkamlash va milliy istiqlol gʻoyalarini targʻib qilishda “Taraqqiyot koʻzgusi” gazetasining oʻrni va ahamiyati” mavzusida targʻibot oyligi oʻtkazish toʻgʻrisida

Mamlakatimiz mustaqillikka erishgan 1991-yildan boshlab tuman gazetasi jamiyatni eski tuzum mafkurasidan xalos qilib, mustaqillikni mustahkamlashdek buyuk va sharafli vazifani ado etishda, xalqimizni milliy istiqlol gʻoyalariga sadoqat, ming yillar davomida shakllangan qadriyatlar, milliy urf-odat va anʼanalarga hurmat ruhida tarbiyalashda, ularni imon-eʼtiqodli qilish, dunyo tamadduniga hissa qoʻshgan ota-bobolarimizning boy maʼnaviy merosini asrab-avvaylash va uning bebaho qadr-qimmatini yoshlarga anglatish, ularning qalblarida faxr-iftixor, Oʻzbekistonning buyuk kelajagiga ishonch tuygʻularini uygʻotishda muhim vosita boʻlmoqda.

Bugun erkin va ozod Vatan, obod va farovon turmush qurish, mamlakatimizni har jihatdan taraqqiy ettirib, demokratik davlat va erkin fuqarolik jamiyati qurish, uni dunyoning rivojlangan davlatlari qatoriga qoʻshish, aholini, ayniqsa yoshlarni milliy istiqlol gʻoyalariga sadoqat ruhida tarbiyalashda ham "Taraqqiyot koʻzgusi” gazetasi fidoyi va jonkuyar tarbiyachi vazifasini bajarmoqda.

Ayniqsa, hozirgi globallashuv davrida va shiddatli zamonda "Taraqqiyot koʻzgusi” gazetasi, uning ilovasi "Mening oilam” gazetasi hamda tahririyatning Internetdagi www.amunews.uz veb-saytida berilayotgan tezkor va xolis xabarlar, publitsistika janriga oid ijtimoiy-madaniy, maʼnaviy-maʼrifiy hamda iqtisodiy hayotni toʻlaqonli aks ettiruvchi lavha va ocherklar tumanimiz aholisining axborotga boʻlgan ehtiyojini taʼminlashga xizmat qilmoqda.

Shularni hisobga olib, mustaqillikni mustahkamlash va milliy istiqlol gʻoyalarini targʻib qilishda "Taraqqiyot koʻzgusi” gazetasining oʻrni va ahamiyati katta ekanligini eʼtirof etgan holda

QAROR QILAMAN:

1. "Taraqqiyot koʻzgusi” gazetasi tahririyati mehnat jamoasining tumanda 2014-yil 15-iyuldan 15-avgustgacha "Mustaqillikni mustahkamlash va milliy istiqlol gʻoyalarini targʻib qilishda "Taraqqiyot koʻzgusi” gazetasining oʻrni va ahamiyati” mavzusida targʻibot oyligi oʻtkazish toʻgʻrisida bildirgan taklifi maʼqullansin.

2. "Mustaqillikni mustahkamlash va milliy istiqlol gʻoyalarini targʻib qilishda "Taraqqiyot koʻzgusi” gazetasining oʻrni va ahamiyati” mavzusida targʻibot oyligi oʻtkazish boʻyicha tashkiliy qoʻmita tarkibi 1-ilovaga muvofiq tasdiqlansin (ilovalar berilmaydi).

Tashkiliy qoʻmitaga Mustaqillikni mustahkamlash va milliy istiqlol gʻoyalarini targʻib qilishda "Taraqqiyot koʻzgusi” gazetasining oʻrni va ahamiyatiga bagʻishlangan barcha tadbirlarni yuqori saviyada, mamlakatimiz mustaqilligining 23 yilligiga hamohang tarzda tashkil qilish hamda oʻtkazish vazifasi topshirilsin.

3. "Mustaqillikni mustahkamlash va milliy istiqlol gʻoyalarini targʻib qilishda "Taraqqiyot koʻzgusi” gazetasining oʻrni va ahamiyati” mavzusida oʻtkaziladigan targʻibot oyligi doirasida amalga oshiriladigan chora-tadbirlar rejasi 2-ilovaga muvofiq tasdiqlansin.

4. "Taraqqiyot koʻzgusi” gazetasi tahririyati (Gʻ.Yeshniyozov)ga targʻibot oyligini oʻtkazish bilan bogʻliq chora-tadbirlarning bajarilishi boʻyicha har haftada Tashkiliy qoʻmitaga axborot berib borish vazifasi topshirilsin.

5. Tumandagi muassasa, korxona va tashkilotlar rahbarlari, fuqarolar yigʻinlari raislari belgilangan uchrashuvlar rejasiga muvofiq oʻz mehnat jamoalarida, ovul va mahallalarda targʻibot oyligi doirasida oʻtkaziladigan ijodiy kechalar, adabiy-badiiy uchrashuvlarni yuqori saviyada tashkil qilishda amaliy yordam koʻrsatsinlar.

6. Ushbu qarorning bajarilishini nazorat qilish tuman hokimi oʻrinbosari, xotin-qizlar qoʻmitasi raisi M.Ahmedova zimmasiga yuklansin.

R.Yoʻldashev,

Amudaryo tumani hokimi.

2014-yil 7 iyul, 443-son.