“BUVIJONIM KIYGAN LIBOSLAR” TADBIRIDA MILLIY LIBOSLAR NAMOYISh ETILDI

Har yili jahon boʻylab 11-oktyabr  — “Xalqaro qizlar kuni” turli davlatlarda qizlarning kamsitilishi, ularning ijtimoiy muammolariga eʼtibor qaratish maqsadida nishonlanib kelinmoqda. Har yili ushbu oʻziga xos sana munosabati bilan butun dunyoda gender tengligi, erta nikoh, taʼlim olishdagi tengsizlik, mehnat munosabatlari, zamonaviy kasb-hunarlarni egallashdagi notenglik kabi qizlar hayotida uchraydigan global muammolarga jamoatchilik nigohi qaratiladi, milliy va xalqaro darajadagi ilmiy anjumanlar, forumlar, uchrashuvlar tashkil etiladi.

Mamlakatimizdagi kabi anʼanaviy tarzda mazkur sanaga bagʻishlab, tumanimizda ham iqtidorli hamda uyushmagan qizlarni har tomonlama qoʻllab-quvvatlash, ularning ijtimoiy-siyosiy faolligini oshirishga qaratilgan maʼrifiy-madaniy tadbirlar oʻtkazildi.

13-oktyabr kuni 10-sonli umumtaʼlim maktabida Xalqaro qizlar kuni munosabati bilan “Buvijonim kiygan liboslar” deb nomlangan tadbir oʻtkazilib, qadim ajdodlarimizdan meros boʻlib kelayotgan milliy liboslarimiz namoyish etildi. Maktabning xotin-qizlar boshlangʻich tashkiloti raisi Umida Oʻrozimbetova, maʼnaviy-maʼrifiy ishlar boʻyicha direktor oʻrinbosari Gulmirza Bozorboyev, ijodiy-madaniy ishlar targʻibotchisi Nigora Yerimbetova, yoshlar yetakchisi Maral Agaboyevalar tomonidan tashkil etilgan tadbirda maktab oʻquvchilari va oʻqituvchilari ishtirok etdilar.

Tadbir davomida libos har bir xalq milliy madaniyatini, milliy qadriyatlarini oʻzida aks ettiruvchi eng muhim belgi ekanligi toʻgʻrisida soʻz yuritilib, “Kiyinish madaniyati”, “Mutaassiblik va yot gʻoyalar taʼsiriga tushib qolmaslik”, “Milliy urf-odatlar va anʼanalar”, “Qiz bola odobi”, “Sarishtalik uy – farishtalik uy” mavzularida maʼruzalar qilindi. Shuningdek, tumanimiz hududida istiqomat qiluvchi 4 millatga xos boʻlgan buvilar, onalar kiygan milliy liboslar, qizlarning uy, maktab, mehmondorchilikda va bayramda kiyiladigan zamonaviy kiyimlari koʻrgazmalari namoyish etildi. Liboslardagi milliylik, ayniqsa, atlas, adras, beqasam singari matolardan tikilgan milliy kiyimlarning koʻrkam va xushbichimligi, oʻziga xosligi barchaga juda manzur boʻldi.

Tadbirda ushbu sananing nishonlanishi sabablariga ham keng toʻxtalib oʻtildi. Birlashgan Millatlar Tashkiloti tashabbusi bilan 2012-yildan boshlab, har yilning 11-oktyabrida nishonlana boshlangani, xalqaro tashkilotlar va aʼzo davlatlarga ushbu sanani keng nishonlash, butun dunyo boʻylab qizlarning hayot tarzi, huquq va erkinliklari, ular duch keladigan ijtimoiy muammolar, yashash sharoitlari bilan bogʻliq holatlarni tadqiq etish tavsiya etilgani aytildi.

Shuningdek, dunyoda 15–19 yosh oraligʻidagi har toʻrt nafar qizdan biri ishlash, oʻqish va kasbiy tayyorgarlik imkoniyatiga ega emasligi tilga olinib,  soʻnggi yillarda amalga oshirilgan keng qamrovli islohotlar natijasida Oʻzbekiston Respublikasida jamiyat hayoti va faoliyatining barcha sohalarida xotin-qizlar va erkaklar uchun teng huquq hamda imkoniyatlarni taʼminlash masalalari boʻyicha mustahkam huquqiy asoslar yaratilgani eʼtirof etildi.

Qizlar yuksak faollik bilan qatnashib, oʻzlarining milliy qadriyatlarimizga, momolarimizning umrboqiy udum va anʼanalariga muhabbatlarini, hurmatlarini bildirishdi. Liboslar namoyishidan soʻng, “Uzun sochlar jilosi” tanlovi ham oʻtkazildi. Tanlovda qizlar milliy soch oʻrimlarini, turmaklarini koʻrsatib, ularning qizlarga alohida koʻrk bagʻishlashini namoyish etishdi.

Oʻsib kelayotgan yosh avlod, oʻquvchi-qizlar qalbiga milliy liboslar iftixorini singdirish, “moda” ortidan quvib, maʼnaviyatimizga zid kiyinish “madaniyati”ning salbiy taʼsiridan saqlash maqsadida oʻtkazilgan tadbirda ishtirok etgan qizlar tashkilotchilar tomonidan ragʻbatlantirildi.

O.Xudoyberganova.