BAYRAM ARAFASIDA “TIL – DIL KALITI” DEB NOMLANGAN TADBIR OʻTKAZILDI

Oʻzbek tili jahondagi boy va qadimiy  tillardan biri hisoblanadi. Xalqimizning koʻp asrlik  madaniy, ilmiy-maʼrifiy tafakkuri, intilluktual salohiyatining yorqin va bebaho mahsuli boʻlgan ona tilimizni ayni paytda dunyo xalqlari sevib oʻrganishmoqda.

Mamlakatimizda 1989-yil 21-oktyabrda xalqimiz asrlar davomida orzu qilib, intilib, ona tilimizning mustaqilligi uchun kurashib kelgan davlat tili haqidagi Qonunning qabul qilinishi Oʻzbekistonning suvereniteti va mustaqilligi sari qoʻyilgan dastlabki dadil qadam boʻldi. Chunki aynan ana shu hujjat – Davlat tili haqidagi tarixiy Qonunga muvofiq Oʻzbek tilimiz mustahkam huquqiy asos asosan va yuksak maqomga ega boʻldi.

Aynan ana shu tarixiy  hujjat tufayli Istiqlol yillarida tilimiz tom maʼnoda davlat tiliga aylanib, xalqimizni yurtimizda erkin va ozod, farovon hayot qurishdek buyuk marralar sari ruhlantiruvchi beqiyos maʼnaviy qudrat sifatida maydonga chiqdi.

Yangilanayotgan Oʻzbekistonning bugungi bosqichi – milliy yuksalish davri talablaridan kelib chiqib, bugungi kunda ona tilimizning nufuzini yanada oshirish borasida keng koʻlamli ishlar amalga oshirilmoqda. Xususan, 2019-yilda “Oʻzbek tilining davlat tili sifatidagi nufuzi va mavqeini oshirish chora-tadbirlari toʻgʻrisida” Prezident Farmoni qabul qilindi. Ushbu Farmonga muvofiq, 21-oktyabr – “Oʻzbek tili bayrami kuni” deb eʼlon qilindi.

Mana 32-yildirki, 21-oktyabr – Oʻzbek tiliga davlat tili maqomi berilgan sana – 2019-yildan beri esa “Oʻzbek tili bayrami kuni” sifatida mamlakatimizda keng nishonlanadi.

Amudaryo tumanidagi 42-sonli umumtaʼlim maktabida ham “Oʻzbek tili bayrami kuni” arafasida “Til – dil kaliti” mavzusida maʼnaviy-maʼrifiy tadbir boʻlib oʻtdi. Tadbirni maktab direktori Qurol Mamutov ochdi va barchani Oʻzbek tili bayrami munosabati bilan samimiy  tabrikladi. Shuningdek, Qurol Mamutov Oʻzbek tilining Istiqlol yillarida tobora oshib borayotgan nufuzi, xalqimizni yangi marralar sari ruhlantiruvchi qudratli kuchi xususida toʻxtalib oʻtdi.

Maʼnaviy-maʼrifiy ishlar boʻyicha direktor oʻrinbosari Farhod Bekberganov Oʻzbek tiliga Davlat tili maqomi berilishi munosabati bilan xalqimiz hayotida yuz bergan beqiyos oʻzgarishlar, tilimizning xalqaro miqyosdagi obroʻsini yanada mustahkamlash maqsadida qabul qilingan Prezident Farmon va Qarorlari, hukumat Qarorlari haqida oʻquvchi-yoshlarga, batafsil maʼlumotlar berdi.

Tadbir davomida OʻzYoI boshlangʻich tashkiloti yetakchisi Nodira Davlatmurodova soʻzga chiqib, tadbir ishtirokchilarini Oʻzbek tili bayrami bilan tabrikladi va til – millat koʻzgusi, ona Vatan koʻrki ekanligini, har bir millat oʻz ona tilining qadr-qimmatini  baland tutishi kerakligini taʼkidladi. Shuningdek, u  Oʻzbekistonda salkam 26 mln., Afgʻonistonda1,5 mln., Tojikistonda 1,1 mln., Qirgʻizistonda 800 mingga  yaqin, Qozogʻistonda 500 ming va Turkmaniston davlatida 455 ming, Rossiyada 300 ming nafardan ziyod oʻzbek tilida soʻzlashuvchi millatdoshlarimiz borligini, hatto Yaponiyada, Amerika Qoʻshma Shtatlarida, Janubiy Koreyada, Hindistonda, qoʻyingki, dunyoning koʻplab davlatlarida Oʻzbek tilini sevib oʻrganayotgan, oʻzbek tiliga hurmati beqiyos insonlar borligini  faxr bilan aytib oʻtdi.

Tadbirda maktabning 4-, 11-sinf oʻquvchilari tomonidan tayyorlangan adabiy-badiiy qism ham namoyish etildi. Oʻquvchi-yoshlar oʻzbek tili haqida taniqli shoirlar ijod etgan sheʼrlarni aytishdi, kuy-qoʻshiqlar ijro etishdi. Oʻzbek tilining beqiyos boyligi, goʻzal va jilvadorligini oʻz chiqishlari bilan ifoda qildilar. Tadbir oʻtkazilgan joyning oʻquvchilar tomonidan har xil koʻrgazmali vositalar bilan bezatilgani “Til – dil kaliti” degan mavzuning jozibadorligini yanada oshirdi.

Boʻlib oʻtgan bayramona tadbir oʻquvchi-yoshlar qalbida ona tilimizga cheksiz mehr-muhabbat tuygʻularini yanada mustahkamlagani bilan muhim ahamiyat kasb etdi.

Robiya YOʻLDOShEVA, 42-sonli umumtaʼlim maktabining ijodiy-madaniy masalalar boʻyicha targʻibotchisi.