БАЙРАМ АРАФАСИДА “ТИЛ – ДИЛ КАЛИТИ” ДЕБ НОМЛАНГАН ТАДБИР ЎТКАЗИЛДИ

Ўзбек тили жаҳондаги бой ва қадимий  тиллардан бири ҳисобланади. Халқимизнинг кўп асрлик  маданий, илмий-маърифий тафаккури, интиллуктуал салоҳиятининг ёрқин ва бебаҳо маҳсули бўлган она тилимизни айни пайтда дунё халқлари севиб ўрганишмоқда.

Мамлакатимизда 1989 йил 21 октябрда халқимиз асрлар давомида орзу қилиб, интилиб, она тилимизнинг мустақиллиги учун курашиб келган давлат тили ҳақидаги Қонуннинг қабул қилиниши Ўзбекистоннинг суверенитети ва мустақиллиги сари қўйилган дастлабки дадил қадам бўлди. Чунки айнан ана шу ҳужжат – Давлат тили ҳақидаги тарихий Қонунга мувофиқ Ўзбек тилимиз мустаҳкам ҳуқуқий асос асосан ва юксак мақомга эга бўлди.

Айнан ана шу тарихий  ҳужжат туфайли Истиқлол йилларида тилимиз том маънода давлат тилига айланиб, халқимизни юртимизда эркин ва озод, фаровон ҳаёт қуришдек буюк марралар сари руҳлантирувчи беқиёс маънавий қудрат сифатида майдонга чиқди.

Янгиланаётган Ўзбекистоннинг бугунги босқичи – миллий юксалиш даври талабларидан келиб чиқиб, бугунги кунда она тилимизнинг нуфузини янада ошириш борасида кенг кўламли ишлар амалга оширилмоқда. Хусусан, 2019 йилда “Ўзбек тилининг давлат тили сифатидаги нуфузи ва мавқеини ошириш чора-тадбирлари тўғрисида” Президент Фармони қабул қилинди. Ушбу Фармонга мувофиқ, 21 октябрь – “Ўзбек тили байрами куни” деб эълон қилинди.

Мана 32 йилдирки, 21 октябрь – Ўзбек тилига давлат тили мақоми берилган сана – 2019 йилдан бери эса “Ўзбек тили байрами куни” сифатида мамлакатимизда кенг нишонланади.

Амударё туманидаги 42-сонли умумтаълим мактабида ҳам “Ўзбек тили байрами куни” арафасида “Тил – дил калити” мавзусида маънавий-маърифий тадбир бўлиб ўтди. Тадбирни мактаб директори Қурол Мамутов очди ва барчани Ўзбек тили байрами муносабати билан самимий  табриклади. Шунингдек, Қурол Мамутов Ўзбек тилининг Истиқлол йилларида тобора ошиб бораётган нуфузи, халқимизни янги марралар сари руҳлантирувчи қудратли кучи хусусида тўхталиб ўтди.

Маънавий-маърифий ишлар бўйича директор ўринбосари Фарҳод Бекберганов Ўзбек тилига Давлат тили мақоми берилиши муносабати билан халқимиз ҳаётида юз берган беқиёс ўзгаришлар, тилимизнинг халқаро миқёсдаги обрўсини янада мустаҳкамлаш мақсадида қабул қилинган Президент Фармон ва Қарорлари, ҳукумат Қарорлари ҳақида ўқувчи-ёшларга, батафсил маълумотлар берди.

Тадбир давомида ЎзЁИ бошланғич ташкилоти етакчиси Нодира Давлатмуродова сўзга чиқиб, тадбир иштирокчиларини Ўзбек тили байрами билан табриклади ва тил – миллат кўзгуси, она Ватан кўрки эканлигини, ҳар бир миллат ўз она тилининг қадр-қимматини  баланд тутиши кераклигини таъкидлади. Шунингдек, у  Ўзбекистонда салкам 26 млн., Афғонистонда1,5 млн., Тожикистонда 1,1 млн., Қирғизистонда 800 мингга  яқин, Қозоғистонда 500 минг ва Туркманистон давлатида 455 минг, Россияда 300 минг нафардан зиёд ўзбек тилида сўзлашувчи миллатдошларимиз борлигини, ҳатто Японияда, Америка Қўшма Штатларида, Жанубий Кореяда, Ҳиндистонда, қўйингки, дунёнинг кўплаб давлатларида Ўзбек тилини севиб ўрганаётган, ўзбек тилига ҳурмати беқиёс инсонлар борлигини  фахр билан айтиб ўтди.

Тадбирда мактабнинг 4-, 11-синф ўқувчилари томонидан тайёрланган адабий-бадиий қисм ҳам намойиш этилди. Ўқувчи-ёшлар ўзбек тили ҳақида таниқли шоирлар ижод этган шеърларни айтишди, куй-қўшиқлар ижро этишди. Ўзбек тилининг беқиёс бойлиги, гўзал ва жилвадорлигини ўз чиқишлари билан ифода қилдилар. Тадбир ўтказилган жойнинг ўқувчилар томонидан ҳар хил кўргазмали воситалар билан безатилгани “Тил – дил калити” деган мавзунинг жозибадорлигини янада оширди.

Бўлиб ўтган байрамона тадбир ўқувчи-ёшлар қалбида она тилимизга чексиз меҳр-муҳаббат туйғуларини янада мустаҳкамлагани билан муҳим аҳамият касб этди.

Робия ЙЎЛДОШЕВА, 42-сонли умумтаълим мактабининг ижодий-маданий масалалар бўйича тарғиботчиси.