Oʻziga xos tajriba maktabiga aylangan gazeta

Matbuot – shunchaki axborot manbai, xalqni jamiyatimizda roʻy berayotgan yangiliklardan, oʻzgarishlardan voqif etuvchi vositagina emas, balki har bir xalqni ilmiy-maʼrifiy mushohada yuritishga undovchi kuchdir. Qolaversa, bugungi matbuot – har bir insonga zamon bilan hamnafas ravishda ijtimoiy-iqtisodiy hayotda roʻy berayotgan taraqqiyot omillaridan ijobiy xulosalar chiqarib, oʻz hayot tarzini oʻzgartirish, yangilash imkonini beruvchi maʼnaviy-maʼrifiy tarbiya dorilfununidir. Buni Amudaryo tumani matbuoti misolida yaqqol koʻrish mumkin. Sababi, ilk soni 1934-yildan chiqa boshlagan tuman gazetasi oʻzining 80 yillik faoliyati davomida tuman xalqiga sadoqat bilan xizmat qilib qelmoqda. Turli yillarda har xil nomlar bilan chop etilib kelingan "Taraqqiyot koʻzgusi” gazetasi oʻz faoliyatining barcha bosqichlarida matbuot soʻzining, haqiqat va adolatning qudratini amalda namoyon etib, xalq qalbidan munosib joy ola bildi va Amu elining ishonchiga, qaynoq mehriga sazovor boʻldi. Bugungi tezkor axborot asrida koʻpchilik tuman gazetalari inqirozga yuz tutayotgan, oʻz davriyligini taʼminlay olmayotgan bir paytda "Taraqqiyot koʻzgusi” gazetasi salkam 6000 nusxada, har haftada chop etilib, oʻz vaqtida obunachilariga yetib borayotgani tuman gazetasi nufuzining nechogʻlik yuqoriligidan dalolatdir.

Avvalo shuni alohida qayd etish kerakki, tuman gazetasining bunday mavqega yetishishidagi eng birinchi omil bu – tahririyatda yetuk va bilimdon, malakali jurnalistlardan iborat ahil ijodiy jamoaning shakllanganligidir. Oʻz kasbining fidoyilari boʻlgan oliy maʼlumotli jurnalistlar – gazetaning sobiq muharrirlari Qoraqalpogʻiston Respublikasida xizmat koʻrsatgan madaniyat xodimi Xonimjon Rajabova, Qoraqalpogʻiston Respublikasida xizmat koʻrsatgan jurnalistlar Gulnora Matyoqubova, Saʼdulla Xoʻjaniyozov, Robiya Yoʻldosheva, Oʻzbekiston Jurnalistlari ijodiy uyushmasi aʼzosi, "Shuhrat” medali sohibi Allambergan Jumaniyozov, tajribali jurnalist Oygul Rajabovalar yaratgan oʻziga xos ijod boʻstoni bugungi kunda nafaqat Qoraqalpogʻiston Respublikasi, balki Oʻzbekiston miqyosidagi ibratli jurnalistika maktabi darajasiga yetdi, desam mubolagʻa boʻlmaydi.

Bugungi kunda oʻziga xos tajriba maktabini yaratgan ijodiy jamoa erishayotgan yutuqlar salmogʻi yanada ulkan. Gazetaning yosh muharriri Gʻulomjon Yeshniyozov rahbarligida 2012-yildan boshlab Qoraqalpogʻiston Respublikasida birinchi boʻlib internetda oʻzining mustaqilveb saytiga, 2014-yilning mart oyidan boshlab mustaqil "Mening oilam” ilova nashriga ega boʻlgan gazetatahririyati xodimlarining barchasi uchun oʻqish, izlanish, yutuqlarni yanada boyitib borish doimiy ijodiy anʼanaga aylangan. Shu bois, gazetaning har bir sonida yoritilayotgan maqolalarning qamrov maydoni keng, rang-barang, xalqchil. Shunisi eʼtiborga loyiqki, tahririyat jurnalistlari har bir matn ustida oʻzlariga yuksak talablar qoʻygan holda ishlaydilar, hatto respublika miqyosidagi gazetalar darajasidan oʻtib ijod qilishga intiladilar.

Agar gazeta taxlamlari bilan tanishsangiz, uning deyarli har bir sonida tuman hayotining barcha sohalari aks etib turganligiga guvoh boʻlasiz. Eng muhimi, sahifalarda qaynoq va joʻshqin hayot nafasi ufurib turadi. Gazeta shuning uchun ham tuman xalqi hayotining ajralmas bir qismiga – yuksak maʼnaviyat maktabiga aylangan.

Mana, bir oydirki, amudaryoliklar Mustaqillikning 23 yilligi va tuman matbuotining 80 yilligi munosabati bilan tuman hokimining 2014-yil 7-iyuldagi "Mustaqillikni mustahkamlash va milliy istiqlol gʻoyalarini targʻib qilishda "Taraqqiyot koʻzgusi” gazetasining oʻrni va ahamiyati” mavzusida targʻibot oyligini oʻtkazish toʻgʻrisida”gi qaroriga muvofiq gazeta ijodkorlari bilan yuzma-yuz muloqotlarda, davra suhbatlari, adabiy-badiiy, musiqiy tadbirlarda ishtirok etishmoqda. Hech bir zamonda mahalliy rahbariyat tomonidan matbuotga bunchalik eʼtibor va ragʻbat koʻrsatilmagan. Va yana shuni baralla aytamanki, Qoraqalpogʻiston Respublikasi jurnalistikasi tarixida bunday targʻibot oyligi hech bir tahririyatda oʻtkazilgan emas! Bu – avvalo mahalliy rahbariyatning matbuotga eʼtibori kuchliligidan, qolaversa, "Taraqqiyot koʻzgusi” gazetasining xalqqa nihoyatda yaqinligi, xalqning hur va erkin fikrlar ayta oladigan chinakkam minbariga aylanganidandir. Bu – haqiqiy ibrat maktabi, hozirgi zamon oʻzbek jurnalistikasining tom maʼnodagi tajriba Dorilfununidir. Bu ibrat maktabidan, bu tajriba Dorilfununidan barcha hamkasblarimiz saboq olsa arziydi va ommalashtirishga munosibdir.

Men "Taraqqiyot koʻzgusi” gazetasiningjoʻshqin kalbli ijodiy jamoasini, jamoatchi muxbirlarini, gazetasini sevgan, maʼnaviyatga oshno barcha amudaryoliklarni tuman matbuotining 80 yilligi hamda yaqinlashib kelayotgan mustaqillikning 23 yilligi bilan samimiy tabriklayman. Tahririyat ijodkorlariga joʻshqinlik, sogʻlik, el-yurtga osoyishtalik tilayman.

Kengesboy REYMOV,

Oʻzbekiston Jurnalistlari ijodiy uyushmasining Qoraqalpogʻiston Respublikasi boʻlimi raisi.