Elektr energiyasidan qonunga xilof ravishda foydalanish holatlarining oldi olinmoqda

Prezidentimizning 2018-yildagi “Elektr energetikasi tarmogʻini jadal rivojlantirish va moliyaviy barqarorligini taʼminlash chora-tadbirlari toʻgʻrisida”gi Qaroriga koʻra yurtimizda aholi xonadonlariga ASKUE, yaʼni elektr energiyasini hisobga olish va nazorat qilishning avtomatlashtirilgan tizimiga mos keluvchi yangi elektr hisoblagichlar oʻrnatish ishlari yoʻlga qoʻyilgan boʻlib, mazkur jarayonlar hozirgi kunda ham jadal surʼatlarda davom etmoqda. Ayni paytda ushbu yangi tizim isteʼmolchi va taʼminotchi oʻrtasidagi shaffoflikni taʼminlash, yetkazib berilgan elektr energiyasi uchun hisob-kitoblarga aniqlik kiritish va isteʼmolchilar foydalangan elektr energiyasi uchun toʻlov intizomini mustahkamlashga xizmat qilmoqda.

Hududlardagi kabi Amudaryo tumanida ham aholi xonadonlariga ASKUE tizimiga mos keluvchi “aqlli” elektr hisoblagichlarni oʻrnatish ishlari amalga oshirildi. Tuman Elektr taʼminoti korxonasi tomonidan yuqori kuchlanishdagi 8 dona  podstantsiya hamda past kuchlanishdagi 577 dona transformator punktlari orqali jami 39012 nafar isteʼmolchilar, shundan  1750 nafar ulgurji isteʼmolchilar hamda 37262 nafar maishiy isteʼmolchilar elektr energiyasi bilan taʼminlanib kelinmoqda.

Hozirgi kunda “aqlli” elektr hisoblagichlar oʻrnatilgan xonadonlardagi elektr taʼminoti hisob-kitoblariga aniqlik kiritish, nazorat qilish maqsadida tuman Elektr tarmoqlari korxonasida “Kichik data markaz” tashkil qilingan boʻlib, isteʼmolchilarning xonadoniga bormasdan kunlik hamda oylik isteʼmolni aniqlash imkoniyati yaratildi. Ushbu “Kichik data markaz” ASKUE tizimining barqaror ishlashiga xizmat qilmoqda. Tizimga ulangan isteʼmolchilar bilan hisob-kitoblar avtomatik ravishda amalga oshirilmoqda va hisoblagichlar boʻyicha maʼlumot olinib, nazorat qilinmoqda. Foydalangan elektr energiyasidan qarzdorligi mavjud isteʼmolchilar avtomatik tarzda elektr tarmogʻidan ajratilib, qarzdorligini toʻlagandan keyin qayta ulanib borilmoqda.

Ushbu tizim amaliyotga joriy etilgandan soʻng, isteʼmolchi va taʼminotchi oʻrtasida shaffoflik taʼminlandi. Qarzdor isteʼmolchilarning avtomatik tarzda tarmoqdan uzilishi, elektr haqi toʻlangandan keyin qayta ulanishi jarayonlarida inson omili kamayishi har tomonlama qulayliklar yaratmoqda. Buning natijasida tarmoqqa noqonuniy ulanishlar, shuningdek, korruptsiya holatlarining oldi olinishi taʼminlanmoqda.

Lekin hududlarda ayrim isteʼmolchilar qarzdorlik sababli tarmoqdan ajratilgandan keyin noqonuniy ravishda elektr tarmogʻiga qayta ulanib olishmoqda. Shunisi eʼtiborliki, noqonuniy ulanish holatlari “Kichik data markaz”da “CAS” dasturi orqali aniqlanmoqda va joyiga chiqib oʻrganilmoqda. Shunday holatlarga yoʻl qoʻyilgan aholi xonadonlarida qoidabuzarlik holatlari boʻyicha dalolatnomalar tuzilib, tegishli choralar koʻrilmoqda va bunday holatlarga barham berilmoqda.

Aytish joizki, koʻp hollarda isteʼmolchilarda toʻlov madaniyati yetishmasligi turli qingʻir ishlarga sabab boʻladi. Ana shunday illatlar tufayli taʼminotchi korxona tomonidan isteʼmolchiga yetkazib berilayotgan energiya miqdorida tafovutlar yuzaga keladi.

Toʻlov madaniyatiga amal qilish har bir isteʼmolchining vazifasi hisoblanadi. Zero, kundalik hayotimiz energetika tizimi bilan chambarchas bogʻliq. Shu bois bu resurslardan oqilona foydalanish, qadriga yetish va taʼminotchi tomonidan yetkazib berilayotgan mahsulot uchun toʻlovni oʻz vaqtida amalga oshirish har bir fuqaroning burchi sanaladi.

O.Xudoyberganova.