ZAMONAVIY ISSIQXONALARDAN SAMARALI FOYDALANISh MASALALARIGA BAGʻIShLANGAN SEMINAR BOʻLIB OʻTDI
Butun dunyoda oziq-ovqat xavfsizligi dolzarb masala boʻlib turgan hozirgi pandemiya davrida mamlakatimiz bozorlarining toʻkinligi, xalqimiz turmushi obodligi qishloq xoʻjaligi mahsulotlari yetishtirish salmogʻi va sifati tobora ortayotgani natijasidadir.
Keyingi yillarda mamlakatimizda, shu jumladan tumanimizda ham zamonaviy issiqxonalarning yanada koʻpaytirilayotgani – qishloq aholisini ish bilan taʼminlashda va yilning hamma fasllarida turli sabzavotlar bilan bozorlarimiz toʻkinligiga erishishda muhim omil boʻlayotir.
Shu yilning 19-fevralida tumanimizning Oq oltin ovulida faoliyat yuritayotgan Anvar Xolimbetov rahbarligidagi “Oq oltin – Amudaryo” fermer xoʻjaligida yangidan 50 sotix maydondagi zamonaviy issiqxona oʻz faoliyatini boshladi.
Issiqxona 1 mlrd. soʻm mablagʻ evaziga “Asaka innovatsiya fayz” masʼuliyati cheklangan jamiyati ishchilari tomonidan bunyod etildi.
Yer va suv resurslaridan oqilona foydalanish, energiya tejamkor texnologiyalarga asoslangan issiqxonada kelgusida yil davomida pomidor, bodring, baqlajon, bulgʻori qalampiri kabi roʻzgʻorbop mahsulotlarni yetishtirib, xalqimiz dasturxoniga tortiq qilish rejalashtirilgan.
Issiqxona qurib bitkazilishi munosabati bilan bu yerda zamonaviy issiqxonalarda qishloq xoʻjalik mahsulotlari yetishtirish hajmini oshirishga bagʻishlangan seminar boʻlib oʻtdi.
Seminarga tumanimizdagi toʻrtta sektor rahbarlari, Qoraqalpogʻiston Respublika Prokurorining oʻrinbosari Aybek Shomurodov, qishloq xoʻjaligi masʼul xodimlari, ovuldagi fermer xoʻjaliklari raislari, issiqxonalar egalari qatnashdilar.
Tadbirda zamonaviy issiqxonalar soni va ekin maydonlari hajmini koʻpaytirish, mahsulot yetishtirishni oshirish, issiqxonalarda yil davomida hosil olish amaliyotini joriy etish boʻyicha fikrlar almashildi.
Mazkur fermer xoʻjaligining 154 gektar ekin maydonining mavjud. Shuning 30 gektariga 2022-yil hosili uchun gʻalla ekilgan. Qolgan maydonlarga paxta va boshqa qishloq xoʻjalik ekinlari ekiladi.
Xoʻjalikda qator yillardan beri mahsulot yetishtirishning barcha turlari boʻyicha belgilangan rejalar ortigʻi bilan ado etib kelinayapti. Olinayotgan daromadlar hisobidan esa yangi-yangi loyihalar amalga oshirilayapti. Shularning biri 50 sotixlik maydondagi elektr energiya va suv tejovchi texnologiyalari asosida qurilgan zamonaviy issiqxona boʻlsa, yana biri 10 gektarlik hududda zamonaviy bogʻ barpo etilayapti.
Hozirgi kunda ushbu yerlar lazer qurilmasi yordamida tekislanib, bahorgi sugʻorishga tayyor qilib qoʻyilgan. Yerlar tobiga kelgach, iqlim sharoitimizga mos, hosildor mevalar koʻchatlari olib kelib oʻtqaziladi. Buning uchun 220 million soʻm mablagʻ sarflanadi.
Seminar ishtirokchilari fermer xoʻjaligida amalga oshirilayotgan ishlarga yuqori baho berdilar. Bunday ilgʻor loyihalar qishloq xoʻjalik mahsulotlari yetishtirishni koʻpaytirishda va aholi bandligini taʼminlashda muhim omil boʻlishini taʼkidladilar.
Oygul RAJABOVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
