Ibroyim Yusupov nomidagi ijod maktabi vakillari tumanimizga tashrif buyurishdi

Hozirgi kunda mamlakatimizda kelajagimiz bunyodkorlari boʻlmish yoshlarni har tomonlama qoʻllab-quvvatlash, ularni yetuk, bilimli, salohiyatli shaxs, komil inson sifatida tabriyalash masalasiga alohida eʼtibor berilayapti.

Joylarda tashkil etilayotgan Prezident maktablari, Prezident taʼlim muassasalari agentligi tizimidagi ixtisoslashtirilgan va ijod maktablarida yoshlarga bilim berishning eng zamonaviy uslublaridan foydalanilmoqda. Jumaladan 2017-yilda Nukus shahrida Oʻzbekiston Qahramoni, Oʻzbekiston va Qoraqalpogʻiston Xalq shoiri Ibroyim Yusupov nomini abadiylashtirish maqsadida tashkil etilgan ijod maktabida ham bugungi kunda yoshlarni bilimli, ijodkor va ona Vatanga sodiq insonlar qilib tarbiyalash yuzasidan koʻlamli ishlar amalga oshirilayapti.

Joriy yilning 12-may kuni ana shu taʼlim maskani – Ibroyim Yusupov nomidagi ijod maktabi oʻqituvchilari tumanimizdagi 56-sonli maktabga tashrif buyurishib, maktabning 6- va 8-sinflari oʻquvchilarini videoroliklar orqali ijod maktabi hayoti va u yerda amalga oshirilayotgan maʼnaviy-maʼrifiy ishlar bilan tanishtirdilar.

Ijod maktabi oʻqituvchisi Mansur Pirmanov oʻz maʼruzasida maktabda 13 ta fan, informatika va axborot texnologiyalari, kimyo-biologiya, fizika laboratoriya hamda texnologiya xonalari, shuningdek, bir qancha fan, sport, yosh tarjimonlar, veb-dizayn, kompyuter grafikasi, tasviriy va raqamli sanʼat, avdiovizual asarlarni yaratish va qayta ishlash, aktyorlik mahorati va milliy musiqa yoʻnalishi kabi ixtisoslashtirilgan toʻgaraklar ham mavjud ekanligi, ushbu taʼlim muassasasida oʻqish bepul ekanligi, shinam yotqoxona, barcha qulayliklarga ega boʻlgan sport zali oʻquvchilar ixtiyorida ekanligi va oʻquvchilarga kuniga 4 maxal issiq ovqat berilishi haqida maʼlumotlar berdi.

Shundan keyin ijod maktabi oʻqituvchisi Baxtli Saribayev videorolik orqali oʻquvchilarni joriy yilda ijod maktabida oʻtkazilgan ijodiy tanlovlar va oʻquvchilar tomonidan amalga oshirilgan ijodiy ishlar haqidagi maʼlumotlar bilan tanishtirdi.

Bu maʼlumotlarda koʻrsatilishicha ijod maktabi oʻquvchilari joriy oʻquv yilda Xalq shoiri, Oʻzbekiston Qahramoni Erkin Vohidov tavalludining 85 yilligi munosabati bilan oʻtkazilgan “Tong nafasi ilhomlari” tanlovida, Yoshlar ishlari agentligi qoshida tashkil etilgan “Yosh ijodkorlar klubi” tashabbusi bilan oʻtkazilgan “Duyel” tanlovida va boshqada koʻplab tanlovlarda ishtirok etishib, faxrli oʻrinlarni egallashga muvaffaq boʻlishgan.

Ijod maktabida oʻquvchilarning ijodiy ishlarini kitob holida chop etish masalasiga ham alohida eʼtibor berilgan.

Prezident taʼlim muassasalari agentligi tomonidan nashr etilgan “Ijod bogʻidan guldasta” deb nomlangan toʻplamga maktab oʻquvchilaridan Quroltoyev va Reymboyevalarning ham ijodiy ishlari kiritilgan. Yaqinda yana shundy toʻplamga 12 nafar yosh ijodkorning ijodiy ishlari ham tavsiya qilingan.

Ijod maktabi oʻqituvchisi Baxtli Saribayev maʼruzasidagi maʼlumotlar – 10-sinf oʻquvchisi Tilavniyazovaning “Immerse Education” Xalqaro insholar tanlovida qatnashib, 2022-yilda dunyoning eng nufuzli 4 ta oliy taʼlim dargohi - Oksford hamda Kambridge, shuningdek, London va Sidney universitetlarida bilim olish va yozgi taʼtilni ham shu joylarda oʻtkazish imkoniyatlarini qoʻlga kiritganligi hamda bitiruvchilarning oliy taʼlim muassasalariga imtiyozli ravishda qabul qilinishi haqidagi maʼlumotlar maktab oʻquvchilarida katta qiziqish uygʻotdi. Uchrashuv yakunida oʻquvchilar tomonidan maʼruzalar yuzasidan berilgan barcha savollarga javoblar berildi.

56-sonli maktabning ijodiy-madaniy masalalar boʻyicha targʻibotchisi, faxriy jurnalist Allambergan Jumaniyozov tashabbusi bilan oʻtkazilgan bu uchrauv maktab oʻquvchilarida katta taassurot qoldirdi.

M.Shomurodov