KEKSALAR UChUN TURIZM OYLIGI DOIRASIDA KONTsERT DASTURI NAMOYISh ETILDI

Vazirlar Mahkamasining “Keksalarni davlat tomonidan qoʻllab-quvvatlash tizimini yanada takomillashtirishning qoʻshimcha chora-tadbirlari toʻgʻrisida” 2020-yil 28-maydagi qaroriga asosan yurtimizda har yili noyabr oyida “Keksalar uchun turizm oyligi” doirasida turli tadbirlar tashkil etiladi. Oylik doirasida Amudaryo tumanida ham keksalarni qoʻllab-quvvatlash, ularning vaqtini mazmunli tashkil etish maqsadida turli ijtimoiy loyihalar amalga oshiriladi, uchrashuv va davra suhbatlari oʻtkaziladi, yurtimizning diqqatga sazavor joylariga sayohatlar uyushtiriladi.

26-noyabr kuni tuman Madaniyat boʻlimining kontsertlar zalida oylik doirasida “Yangi Oʻzbekistonni barpo etishda nuroniylarning oʻrni” deb nomlangan katta musiqiy kontsert dasturi boʻlib oʻtdi. Tuman Mahalla va nuroniylarni qoʻllab-quvvatlash boʻlimi hamda Madaniyat boʻlimi hamkorligida tashkil etilgan ushbu tadbirga 250 nafardan ziyod faxriylar, nuroniy otaxon va onaxonlar tashrif buyurishdi.

Tadbir boshlanishida tuman “Nuroniylar” jamoatchilik kengashi raisi oʻrinbosari Bekman Allaberganov oylik doirasida oʻtkazilgan tadbirlar haqida maʼlumot berdi hamda yurtimizda keksa avlod vakillariga koʻrsatilayotgan hurmat va eʼtibor, gʻamxoʻrliklar haqida soʻzladi. Keksalarni hurmat qilish, ularga eʼtibor va gʻamxoʻrlik koʻrsatish jamiyatimizning oʻziga xos yuksak maʼnaviy, madaniy belgisiga aylanganini alohida eʼtirof etdi. Shuningdek, shu kunga qadar tumanimizdagi ovul va mahallalarda yashovchi koʻplab nuroniylar respublikamizning diqqatga sazovor joylari, tarixiy va madaniy maskanlari, ziyoratgohlar boʻylab sayohatda boʻlishganini, turli tadbirlar, maʼnaviy-maʼrifiy kechalar, uchrashuvlar tashkil etilganini gapirib oʻtdi.

Shundan soʻng, tuman Madaniyat boʻlimi tomonidan tayyorlangan katta musiqiy dastur nuroniylar eʼtiboriga havola qilindi. Dastur davomida ustoz sanʼatkorlar ijrosida mumtoz kuy va qoʻshiqlar yangradi. Shuningdek, tadbirga tashrif buyurgan otaxon va onaxonlar turli yoʻnalishidagi shoʻx navolarga raqs tushib, kayfiyatlarini yanada koʻtarishdi. Keksalarga, ayniqsa, “Uchqun” ashula va raqs ansambli, “Ofarin” folklor-etnografik xalq jamoasi ijrosidagi kuy va qoʻshiqlar juda manzur boʻldi.

Taʼkidlash joizki, “Keksalar uchun turizm oyligi” doirasida tumanimizning olis va chekka hududlarida ham turli tadbirlar oʻtkazilib, keksa otaxon va onaxonlar holidan xabar olingan holda, ularga hurmat va ehtirom koʻrsatilib, turli sovgʻalar berilmoqda. Nuroniylar tarixiy va ziyoratgoh maskanlarga sayohatlarga, sport va sogʻlomlashtirish mashgʻulotlariga jalb etilmoqda. Bepul tibbiy koʻriklar tashkil etilib, salomatliklari tekshiruvdan oʻtkazilmoqda. Undan tashqari, boy hayotiy tajribaga ega nuroniylar ishtirokida “Uch avlod uchrashuvlari” tashkil etilib, “Yashil makon” umummilliy loyihasi doirasida hududlarda yangidan barpo etilayotgan bogʻlarga mevali va manzarali daraxtlar koʻchatlari oʻtqazish marosimlari uyushtirilmoqda.

Oylik doirasida tuman Madaniyat boʻlimida tashkil etilgan katta kontsert davomida nuroniylar miriqib hordiq chiqardilar. Namuna mahallasida yashovchi faol nuroniy Farhod Avezov barcha nuroniylar nomidan bu kabi ehtirom, eʼzoz, elimiz faxriylariga koʻrsatilayotgan gʻamxoʻrlik, yosh avlod kelajagi yoʻlida qilinayotgan olijanob ishlar uchun Prezidentga, qolaversa tumanimiz masʼullariga, tadbir tashkilotchilariga minnatdorchilik bildirdi.

O.Xudoyberganova.