TUMANIMIZ AHOLISIGA TELEKOMMUNIKATsIYa XIZMATI KOʻRSATISh AHVOLI NAZORAT QILINDI

Hozirgi davrda hayotimizni axborot-kommunikatsion texnologiyalarisiz tasavvur etishimiz qiyin. Barcha sohalarda boʻlgani kabi mazkur sohada ham uzluksiz islohotlar olib borilayotir. Natijada aholiga sifatli telekommunikatsiya xizmatlari koʻrsatilishiga erishilayotir. Bu boradagi ishlarning sifati, liniya kabel xoʻjaligi ahvoli Raqamli texnologiyalar vazirligi Qoraqalpogʻiston Respublikasi hududiy sektori va “Oʻzkomnazorat” inspektsiyasi Qoraqalpogʻiston Respublikasi hududiy boʻlimi tomonidan muntazam nazorat qilinib borilmoqda. Shuningdek, xizmatlar sifatini oshirish maqsadida eski mis kabellar oʻrniga shisha tolali kabellar oʻrnatilayotir.

Oʻzbekiston Respublikasi Prezidentining tegishli Qaroriga asosan “Oʻzkomnazorat” inspektsiyasi Qoraqalpogʻiston Respublikasi hududiy boʻlimi xodimlari tomonidan bu ishlarning surʼati, sifatli bajarilishi, yangidan qurilayotgan infrastruktura obʼektlarida telekommunikatsiya tarmoqlarini tortish jarayonida belgilangan qoidalarga amal qilinishi taʼminlanishiga oid koʻpgina chora-tadbirlar amalga oshirilayotir.

Yaqinda shu maqsadda boʻlim xodimlari Amudaryo tumani “Gulzor” mahallasi hududida qurilayotgan qoʻp qavatli turar joy binolarini borib koʻrdi. Quruvchilarga mazkur turar joy binolarida telekommunikatsiya obʼektlarini oʻrnatish uchun tegishli maydonlar va infratuzilmalarning ajratilishini, binolar ichida telefoniya, maʼlumotlar uzatish va internet tarmoqlari, kabel televideniya va efir televideniyasini jamoaviy qabul qilish tizimlari, shuningdek, «xavfsiz uy» va qoʻriqlash signalizatsiyasi kabellarini oʻtkazish uchun past tokli kabel shaxtalarini sifatli oʻrnatish yuzasidan targʻibot va tashviqot ishlari olib borildi.

Oʻrganish jarayonida qoʻp qavatli turar joy binolarni barpo etayotgan qurilish tashkilotlari masʼullariga Oʻzbekiston Respublikasi Prezidentining maxsus Qarori talablari va shaharsozlik normalarida belgilangan talablar tushuntirildi unga amal qilish lozimligi yuzasidan topshiriqlar berildi.

Shuni unutmaslik lozimki, koʻrsatilayotgan telekommunikatsiya xizmatlarining uzluksiz va sifatli ishlashida magistral optik tolali aloqa liniyalarining toʻgʻri eksplutatsiya qilinishi ham muhim jihatlardan biri hisoblanadi. Bu borada ham telekommunikatsiya operatorlarining liniya kabel xoʻjaliklari va inshootlarining xavfsizligi va butunligini taʼminlash boʻyicha amalga oshirayotgan ishlari koʻzdan kechirildi.

2022-yil boshidan shu kunga qadar Qoraqalpogʻiston Respublikasi hududida jami 22 marotoba magistral optik tolali aloqa liniyalarida uzilishlar kuzatildi. Shuning 7 tasi oʻgʻirlik sababli sodir boʻlgan boʻlsa, qolganlarida jismoniy va yuridik shaxslarning ehtiyotsizligi hamda ruxsatsiz yerda qazish ishlarini amalga oshirganligi sababli sodir boʻlgan.

Oʻzbekiston Respublikasi Vazirlar Mahkamasining tegishli qarori bilan “Telekommunikatsiya liniyalari va inshootlarini muhofaza qilish qoidalari” tasdiqlangan. Mazkur qoida bilan kabel va havo kommunikatsiyalari uchun shu kommunikatsiyalar boʻylab oʻtgan, yer osti kabel trassasidan yoki havo liniyalarining chekka simlaridan har qaysi tomondan 2 metr masofadagi toʻgʻri chiziqqa parallel ravishda belgilangan yer uchastkasidan iborat muhofaza hudud belgilangan. Aloqa kommunikatsiyalari trassalaridagi muhofaza hududlar va ochiq joylar doirasida ushbu kommunikatsiyalar egalarining yozma ravishdagi roziligisiz 30 santimetrdan ortiq chuqurlikda har qanday qurilish, yer qazish, montaj va portlatish ishlari, qishloq xoʻjaligi dalalarida qishloq xoʻjaligi zarurati uchun yerni yumshatish, shuningdeq sugʻorish tarmoqlarini tozalashni amalga oshirish, xoʻjalik uylari va boshqa inshootlar barpo etish, daraxtlar ekish, dala shiyponlarini joylashtirish, chorva mollari boqish, materiallar, yem-xashak va oʻgʻitlarni toʻplab qoʻyish, gulxanlar yoqish, oʻq otish maydonlari tashkil qilish taʼqiqlanadi. Ushbu qoida talablarini buzgan shaxslar Oʻzbekiston Respublikasining “Maʼmuriy javobgarlik toʻgʻrisida”gi Kodeksining tegishli moddalariga asosan javobgarlikka tortilishi mumkin.

“Oʻzkomnazorat” inspektsiyasi Qoraqalpogʻiston Respublikasi hududiy boʻlimi xodimlari tomonidan 2022-yil boshidan shu kunga qadar jami 9 nafar shaxslarga nisbatan “Telekommunikatsiya liniyalari va inshootlarini muhofaza qilish qoidalari” talablarini buzganligi uchun Maʼmuriy javobgarlik toʻgʻrisidagi Kodeksning 154-moddasi 1-qismiga asosan jazolar qoʻllanilgan. Koʻrinib turibdiki, qars ikki qoʻldan chiqadi deganlariday, aholining sifatli telekommunikatsiya xizmatlaridan foydalanishi koʻp jihatdan ularning oʻzlariga ham bogʻliq. Nazorat tadbiri davomida bu haqda fuqarolarga keng tushuntirishlar berildi.

Oygul Rajabova