1-SONLI KASB-HUNAR MAKTABIDA “KASBLAR FESTIVALI” OʻTKAZILDI

Bugungi kunda mamlakatimizda yoshlar bilan yangicha ishlash tizimi yaratilganligi, bunda ularning ijodiy, sport sohasidagi qobiliyatini rivojlantirish barobarida bandligini taʼminlashga alohida eʼtibor berilayotganligi oʻzining ijobiy samaralarini berayapti.

Ayni kunlarda tumanimizdagi barcha umumiy oʻrta taʼlim maktablarining 9-11-sinflari bitiruvchilari qoʻllariga shahodatnomalarini olib, olam-olam orzular bilan oʻz kelajagi sari dadil qadam qoʻyish arafasida turishibdi. Ularning ayrimlari taʼlim olishni davom ettirish istagida boʻlishsa, ayrimlari kasb-hunar egallashni niyat qilishgan.

Yaqinda Qipchoq shaharchasi hududidagi 1-sonli kasb-hunar maktabida tashkil etilgan “Kasblar festivali” tadbiri bitiruvchi sinflar oʻquvchilarining kasb-hunarlar haqida toʻliq maʼlumot olishlarida, maʼlum bir kasbni qatʼiy tanlashida muhim vosita boʻldi.

“Kasblar festivali”da hudud maktablarining 9-sinflari bitiruvchilar,i ularning ota-onalari, maktablar psixologlari, tumandagi boʻsh ish oʻrni mavjud korxonalar masʼullari ishtirok etdilar.

Tadbirda bitiruvchi oʻquvchilar maktab hovlisida ushbu maskanda yoshlarga oʻrgatilayotgan kasb-hunarlar haqida maʼlumotlar beruvchi koʻrgazma bilan batafsil tanishdilar. Kasblar ustalari, pedagoglar oʻquvchilarga kasb tanlash – inson hayotida muhim ahamiyatga egaligi, inson aynan kasbiy faoliyati tufayli hayotda oʻz oʻrinni topishi, sharafga ega boʻlishi haqida maʼruzalar qildilar.

Kasb tanlash... bu juda oddiy tuyulsa-da, aslida insonning oʻz iqtidori, qiziqishiga yarasha kasb tanlashi uning hayoti mazmunini belgilaydi. Kasbning yaxshi yomoni boʻlmaganidek, osoni ham boʻlmaydi. Har kim oʻzi egallagan kasbida halol va ixlos bilan ishlashi muhim.

Bayramona bezatilgan kasb-hunar maktabi hovlisida ushbu muassasada faoliyat olib borayotgan turli yoʻnalishlar, toʻgaraklar, qisqa muddatli kurslar, ishlab chiqarish tsexlari haqida axborot-maʼlumotlar joylashtirilganligi oʻquvchilar eʼtiborini tortdi. Shuningdek, barcha oʻquv-amaliyot xonalari, oʻquvchilar uchun yaratilgan sharoitlar bilan tanishish yorqin taassurot qoldirdi.

Mazkur kasb-hunar maktabida ayni kunda 12 ta guruhda 303 nafar yoshlar kasb-hunar oʻrganishmoqda.

Ularning 166 nafari bitiruvchilardir. 2023-2024 oʻquv yilida muassasaga yana 9 ta yoʻnalishga 330 nafar maktablarning 9-sinflari bitiruvchilari oʻqishga qabul qilinadi. Tikuvchilik, issiqxona va parnik xoʻjaligi laboranti, avtomabillar dvigatellarini tashxislash va taʼmirlash, elektrik, asalarichi, traktorchi-mashinst, yigiruvchi, raqamli axborotlarni qayta ishlash ustasi, baliqchilik yoʻnalishlarida taʼlim olishni istaydigan, olisdan kelib oʻqiydigan oʻquvchilar uchun 100-oʻrinli yotoqxona mavjud.

“Kasblar festivali” ishtirokchilari boʻlgan 9-sinflar bitiruvchilariga tadbirda bu haqda batafsil maʼlumotlar berildi, oʻquv-amaliyotxonalari bilan tanishtirildi.

Tadbir oʻquvchilarning oʻz keladagi uchun kasb tanlashida muhim qarorlarga kelishiga zamin boʻldi.

Oygul RAJABOVA.