FAOL MAʼNAVIYaT TARGʻIBOTChISI

Yurtimiz umumiy oʻrta taʼlim maktablarining maʼnaviy-maʼrifiy ishlar boʻyicha direktori oʻrinbosarlari zimmasiga maktab taʼlimini umummilliy harakatga aylantirish borasida amalga oshirilayotgan ishlarni yangi bosqichga koʻtarish, oʻquvchilarning kitobxonlik darajasini oshirish, ularni xalqimizning milliy qadriyat, anʼanalarini asrab-avaylashga, hurmat qilishga oʻrgatish asnosida ongida maʼnaviy immunitetni mustahkamlash kabi biri-biridan muhim vazifalar yuklangan.

Shuningdek, oʻqituvchilar jamoasida sogʻlom maʼnaviy muhitni yaratish, ilgʻor, oʻz kasbiga ijodiy yondoshadigan, intiluvchan oʻqituvchilarni qoʻllab-quvvatlash, ularga oʻz ustida ishlashlari uchun munosib sharoitlar yaratish, namunali oʻqituvchilar tajribalarini ommalashtirish orqali muassasada taʼlim sifatini oshirishga erishish ham ularning zimmasida.

Amudaryo tumanining Qipchoq shaharchasida faoliyat yuritayotgan 11-sonli maktab tumandagi eng yoshi ulugʻ taʼlim muassasalaridan biri sanaladi. Faoliyati davomida maktabda taʼlim olgan oʻquvchilardan turli sohalar boʻyicha olim-u fuzalolar, ijodkorlar, sanʼatkorlar, qishloq xoʻjaligi fidoyilari yetishib chiqqan maktabning nufuzi hozirgi kunda ham namunali, deyish mumkin.

Maktab oʻquvchilari “Eng namunali sinf sardorlari”, “Kamalak bilimdonlari”, “Eng namunali maktab sardorlari” tanlovlarida, asosiy fanlar olimpiadalarida munosib oʻrinlarni egallab kelishayapti. “Besh tashabbus olimpiadasi” sport musobaqalarida oʻquvchilar sportning mini futbol, yengil atletika, voleybol, shaxmat turlari boʻyicha tumanda 1-, 2-oʻrinlarni egallashdi. Joriy yilgi bitiruvchilarning 1 nafari Ichki ishlar akademiyasiga oʻqishga kirdi, 2 nafar oʻquvchi ingliz tilini bilish darajasi boʻyicha B2 sertifikatiga ega, 2 nafar oʻquvchi maktabni oltin medal bilan tugatdi. Bu natijalar joriy yilgi bitiruvchilarining oliygohlarga kirish reytingi yana ham oshishiga xizmat qiladi.

Muassasada qoʻlga kiritilayotgan yutuqlarda maʼnaviy-maʼrifiy ishlar boʻyicha direktor oʻrinbosari Qunduzoy Xolmurodovaning munosib hissalari bor. Asli oʻqituvchilar oilasi vakilasi boʻlgan Qundozoy ushbu maktabda taʼlim olgan, aʼlo baholarga oʻqish bilan birga sheʼrlar, hikoyalar yozib turar, ijod namunalari “Jetkinshek”, “Amudaryo haqiqati” (hozirgi “Taraqqiyot koʻzgusi”) gazetalari yoritilardi.

U 2005-yilda 11-sonli maktabni tugatib, shu yili Ajiniyoz nomidagi Nukus davlat pedagogika institutining filologiya fakultetiga oʻqishga kirdi. Oliygohda ham ilmiy-amaliy anjumanlarda faol ishtirok etib, iqtidorini namoyish etdi. 2009-yilda oliygohni tugatib, oʻzi oʻqigan maktabda ona tili va adabiyot fani oʻqituvchisi boʻlib ilk mehnat faolitini boshladi. Shuningdek, yoshlar yetakchisi vazifasida ishladi.

Ayni kunda esa maktab direktorining maʼnaviy-maʼrifiy ishlar boʻyicha oʻrinbosari lavozimida sidqidildan mehnat qilayapti. Shu boisdan ham maktabda turli mavzulardagi maʼnaviy-maʼrifiy tadbirlar yuksak saviyada oʻtkaziladi, taʼsirchanligiga erishiladi. Oliygohlarda taʼlim olayotgan talabalar, oliygohlarni bitirib, turli sohalarda mehnat qilayotgan maktabning sobiq oʻquvchilari bilan tez-tez oʻquvchilarning uchrashuvlarini oʻtkazib turishga alohida eʼtibor qaratadi. Hududning ulkan hayotiy tajribaga ega nuroniy otaxonlari, onaxonlari, ibratli oilalar vakillari bilan uchrashuvlar esa oʻquvchilar uchun ibrat maktabi boʻlayotir.

Qunduzoy Xolmurodova oʻquvchilarning kelajagi uchun qanday kasbni tanlashidan qatʼiy nazar, maʼnaviyatli, odobli va fidoyi boʻlib kamolga yetishiga intiladi. Bu niyatlari uni doimo gʻayrat-shijoat bilan ishlashga undayveradi.

Oygul RAJABOVA