BOLAJONLARNING SEVIMLI MASKANI
Ilmiy izlanishlarda aniqlanishicha, inson umri davomida oladigan barcha maʼlumotlarining yarmidan ortigʻini besh yoshigacha boʻlgan davrida olar ekan.
Besh yoshgacha boʻlgan bola dunyoni taniydi, oʻz ona tilida muloqot qila oladi, oʻz oilasi, ota-onasi, yaqinlari, qoʻni-qoʻshnilariga nisbatan koʻnglida begʻubor mehr-muhabbat shakllanadi. Uning qanday inson boʻlib voyaga yetishi avvalo oila va qolaversa, uzluksiz tizimining ilk pogʻonasi boʻlgan maktabgacha taʼlim tashkiloti taʼlim-tarbiyasiga koʻp jihatdan bogʻliq.
Mamlakatimizda maktabgacha taʼlim tizimini rivojlantirish, bolalarning maktabgacha taʼlim tashkilotlariga qamrovini oshirish, tizimda faoliyat yuritayotgan muassasalarda bolajonlarning zamon talablari asosida taʼlim-tarbiya olib, yayrab-quvnab ulgʻayishlari uchun barcha sharoitlar yaratilmoqda, sohadagi tashkilotlar zamonaviy talablarga javob beradigan binolar inventar, uskunalar, oʻquv-metodik qoʻllanmalar bilan taʼminlanmoqda.
Jumurtov shaharchasida yakka tadbirkor Sanobar Safarboyeva tashkil etgan oilaviy nodavlat maktabgacha taʼlim tashkiloti oʻz faoliyatini boshlaganiga endigina ikki yilgina vaqt boʻldi. Hududning 25 nafar bolajonlarini bagʻriga olgan, chor-atrofi mevali, manzarali daraxtlar, gullar bilan oʻralgan bu xushmanzara va bahavo maskan kichkintoylarga juda yoqib qoldi.
Asli oʻzi juda bolajon, maktabgacha taʼlim tashkiloti tarbiyachisi yoʻnalishi boʻyicha imtiyozli diplom sohibasi boʻlgan Sanobar Safarboyeva uzoq yillar oʻzining besh nafar qizi, kenjatoy oʻgʻli tarbiyasi bilan shugʻullandi. Besh qizni oʻqitib, voyaga yetkazib, ikkovini uyli-joyli qilib boʻlgach, oʻz sevgan sohasi boʻyicha ishlashni istadi. Aksiga u yashaydigan shaharchada maktabgacha taʼlim tashkiloti umuman yoʻq boʻlganligi uchun oila aʼzolari bilan kengashib, boʻsh turgan oʻzlarining sakkiz xonali turarjoy binosida oilaviy maktabgacha taʼlim tashkiloti tashkil etishga qaror qildi. Hujjatlashtirish ishlari bitgunicha qabul qilinadigan kichkintoylar roʻyxati ham shakllandi. Tashkilot aslida 25 nafar bolajonlarni qabul qilishga moʻjallangan boʻlsa-da, hududda “mening farzandimni ham oling” deyotgan ota-onalar koʻpchilik. Qamrab olingan bolajonlar esa har kuni bu maskanga talpinib, intiqib keladilar.
Sanobar Safarboyeva ushbu tashkilot faoliyatini yoʻlga qoʻyish bilan oʻzidan tashqari 4 nafar yoshlarni ish bilan taʼminladi.
Tashkilot faoliyat yuritayotgan ulkan hovlida bolalar maydonchasi, yashilhudud, oshxona, dam olish va ovqatlanish xonalari, yotoqxona, mashgʻulotlar xonalari mavjud. Bogʻchada bolajonlar ertalab chiniqish mashgʻulotlarini oʻtagach, xush kayfiyatda nonushtaga oʻtirishadi. Dars mashgʻulotlari, didaktik oʻyinlarda ham kichkintoylar biri-biridan qolishmaslikka, bilagʻon, chaqqonligini koʻrsatishga harakat qilishadi. Hovli tomorqasida yetishtirilgan sabzavotlardan tayyorlanadigan xushtaʼm taomlar bolalarga manzur boʻlayotir, uzum, olmalar yangi uzilib, dasturxonga tortiladi.
Oilaviy nodavlat maktabgacha taʼlim tashkiloti tashkil etilgani hududdagi ishlaydigan ayollarga juda qoʻl keldi. Boisi, farzandlari bogʻchada, ulardan onalarning koʻngli toʻq. Tashkilot xodimlari esa bolajonlarning yayrab oʻsib-ulgʻayotganidan, bunda oʻzlarining ham hissasi borligidan xursand. Biz mana shunday fidoyi, oʻz kasbiga mehr qoʻyib, tarbiyalanuvchilarga farzandidek mehr va eʼtibor koʻrsatib, voyaga yetkazayotgan, taʼlim va tarbiya berayotgan tarbiyachilarni, oʻqituvchilarni, maktabgacha taʼlim sohasida faoliyat yuritayotgan har bir ustoz va murabbiyni 1-oktyabr – kasb bayramlari bilan muborakbod etamiz! Oʻqituvchi va murabbiylar kuni muborak boʻlsin, aziz ustozlar!
Oygul RAJABOVA
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
