Axborot-kutubxona markazida jadidlar ijodi va faoliyatiga bagʻishlangan tadbir hamda “Zakovat” intellektual oʻyini tashkil qilindi

Mamlakatimizda kitobxonlik madaniyatini rivojlantirish, faol kitobxonlar safini kengaytirish, aholi, ayniqsa yosh avlodning intellektual salohiyatini oshirish maqsadida joylarda turli tadbirlar, adabiy-badiiy kechalar, maʼnaviy-marifiy davra suhbatlari hamda intellektual oʻyinlar tashkil qilinmoqda.

Amudaryo tumani Axborot-kutubxona markazida ham yoshlar oʻrtasida kitobxonlikni targʻib qilib, keng ommalashtirish maqsadida jadidlar ijodi va faoliyatiga bagʻishlangan tadbir hamda bilimdonlar bellashuvi – “Zakovat” intellektual oʻyini tashkil qilindi.

Axborot-kutubxona markazidagi jadid adabiyoti namoyondalari asarlaridan tayyorlangan maxsus koʻrgazma tadbirga tashrif buyurgan oʻquvchilarda katta qiziqish uygʻotdi.

Tadbirda tuman Maʼnaviyat va maʼrifat markazi mutaxassisi Zarifa Soatboyeva, 3-sonli umumtaʼlim maktabi kutubxonasi xodimi Tazaxan Qidirniyazova, shu maktabning yuqori sinf oʻquvchilari hamda Axborot-kutubxona markazi xodimlari ishtirok etdi.

Tadbir avvalida markaz mutaxassislari Roxatoy Ramanova, Sohiba Bozorboyeva va Munojat Safarboyevalar soʻzga chiqib, vatanimiz ozodligi va obodligi, xalq maʼrifati va soadati uchun umrini bagʻishlagan jadid bobolarimiz, ularning hayot yoʻli, milliy uygʻonish gʻoyalari haqida fikrlarini aytib oʻtdi.

Shundan keyin “Bilimli va maʼnaviyatli yoshlar bilan uchinchi Renessans sari” shiori ostida tuman Maʼnaviyat va maʼrifat boʻlimi bilan hamkorlikda 3-sonli umumtaʼlim maktabi oʻquvchilari orasida bilimdonlar bellashuvi – “Zakovat” intellektual oʻyiniga satart berildi.

Intellektual oʻyinda “Bilimdonlar” va “Ayazbiy” guruhlari oʻzaro kuch sinashdi. Jarayon davomida oʻquvchilar bilimini tuman Maʼnaviyat va maʼrifat markazi xodimi Zarifa Soatboyeva, 3-sonli umumtaʼlim maktabi kutubxonasi xodimi Tazaxon Qidirniyazova hamda Axborot-kutubxona markazi mutaxassislari Roxatoy Ramanova hamda Gulasal Qoʻchqarovalardan iborat hakamlar hayʼati baholab bordi. Oʻyinni Axborot-kutubxona markazi xodimi Sohiba Bozorboyeva boshqardi. Intellektual oʻyinda oʻquvchilar bilimini sinovdan oʻtkazib, ular yangi maʼlumotlarga ega boʻlishdi.

Tadbir davomida oʻquvchilar jadid bobolarimiz va qoroqalpoq shoirlari ijodidan yod olgan sheʼrlarni ifodali oʻqishdi. Bu sheʼrlarda vatanparvarlik tuygʻulari va ilm – yagona najot degan gʻoya targʻib qilingani yigʻilganlarga nihoyatda manzur boʻldi.

3-sonli umumtalim maktabining 5-sinf oʻquvchisi Nurbek Amanbayev dutor xalq cholgʻu asbobini chalib ijro qilgan qoʻshiqlari barchaga xush kayfiyat bagʻishladi. Yurtga muhabbat va sadoqat aks etgan musiqa sadolari barchani taʼsirlantirdi.

Oʻquvchi qizlar tamonidan tayyorlanib, ijro qilingan raqs esa kechaga yanada fayz kiritdi. Raqqosaning nafis harakatlari begʻubor yoshlikning goʻzal damlarini, unitilmas xotiralarni eslatdi, goʻyo.

Tadbir yakunida faol oʻquvchilarga tashkilotchilar tomonidan diplom va estalik sovgʻalari topshirildi. Tuman Axborot-kutubxona markazi xodimlari yoshlardan doimiy ravishda kutubxonaga kelishlarini soʻrab, ishtirok uchun samimiy minnatdorchilik izhor qilishdi.

Mana shunday ommaviy kitobxonlik targʻiboti va maʼnaviy-maʼrifiy tadbirlar yoshlar qalbida kitoblarga mehr va ehtirom tuygʻularini yanada kuchaytirishi shubhasiz. Bu esa jamiyatda kitobxonlarning, ilm-maʼrifat egalarining mavqayeini yanada oshiradi.

Ilm ziyosi tafakkurimizni teranlashtirib, ezgu gʻoyalarga chorlar ekan, har doim ham kitob va kutubxonalarga ehtiyojimiz ortaveradi.

Shohzod Qurbonboyev