НАМУНА МАҲАЛЛАСИНИНГ НАМУНАЛИ ЁШЛАР ЕТАКЧИСИ

Асли Амударё туманининг Намуна маҳалласида туғилиб-ўсган Шамшод Қурбонбоев ўқувчилик давридаёқ ўзининг намунали хулқ-атвори, жамоат ишларида фаоллиги билан тенгдошларининг ва устозларининг эътиборини қозонди.

Умумтаълим мактабини муваффақиятли тугатган Шамшод Нукус давлат педагогика институтининг педагогика-психология факультетида таҳсил олди. Илк меҳнат фаолиятини 2017 йилда Амударё тумани Мактабгача ва мактаб таълими бўлими тасарруфидаги 78-сонли умумтаълим мактабида ёшлар етакчиси сифатида ишлашдан бошлаган Шамшод Қурбонбоев нафақат ўзи ишлаётган педагогика жамоасида, балки туман миқёсида ташаббускор ва изланувчан, ёшлар ҳаётига оид муаммоларни ҳал этишда ўзига хос тажрибага эга мутахассис сифатида танилди.

Мактабда ўқувчиларнинг ўқишдан бўш вақтларини мазмунли ўтказиш, давоматини яхшилаш борасида амалга оширган саъй-ҳаракатлари боис, қисқа фурсат ичида ўз йўналиши бўйича туман мактабларида фаолият олиб борувчи ёшлар етакчилари орасида энг фаол ва ташаббускор мутахассисга айланди. Қаторасига 3 йил – 2018-2020 йиллар давомида умумтаълим мактаблари ёшлар етакчилари ўртасида ўтказилган “Энг намунали ёшлар етакчиси” кўрик-танловида туманда фахрли 1-ўринни эгаллади.

Билимдон ва изланувчан, ёш мутахассисларнинг билими, тажрибаси у қаерда, қайси соҳада ишлашидан қатъий назар, нафақат ўзи ишлайдиган жамоа, балки халқ учун ҳам манфаатлидир. 2022 йилнинг январь ойидан Намуна МФЙ ёшлар етакчиси сифатида ўз фаолиятини давом эттирган Шамшод Қурбонбоевнинг иш кўлами янада кенгайди.

У аввало маҳалла ёшларининг ҳаёти, касб-кори, турмуш тарзи ва қизиқишлари билан яқиндан танишди. 527 та хонадон таркибидаги 719та оилага бирма-бир кириб, 30 ёшгача бўлган 1772 нафар ёшларнинг рўйхатини шакллантирди. 14 ёшдан 30 ёшгача бўлган 862 нафар ёшлар ва ўсмирлар билан алоҳида суҳбатлар ташкил этиб, уларнинг қизиқишлари ҳамда интилишларини қўллаб-қувватлашга қаратилган чора-тадбирлар режасини ишлаб чиқди.

Натижада 2021 йилда 168 нафар, 2022 йилда 57 нафар, 2023 йилда 90 нафар ижтимоий ҳимояга муҳтож ёшлар “Ёшлар дафтари” рўйхатига киритилиб, уларни ижтимоий қўллаб-қувватлаш чоралари кўрилди. “Маҳалла еттилиги” аъзолари билан ҳамкорликдаги саъй-ҳаракатлар туфайли мазкур дафтар рўйхатига киритилган ёшлар йил сайин камайиб, 2024 йилда бу рақам 7 нафарни ташкил этди.

Шамшод Қурбонбоев учун намуналиклар шунчаки маҳалладошлар эмас, балки тақдирлари бир-бирига туташган қон-қариндошлар каби азиз инсонлардир. Шу боис, у ҳар бир иш кунини ана шу азиз инсонлар, асосан ёшлар даврасида ўтказади. Маҳалла ҳудудидаги таълим-тарбия муассасаларида бўлиб, ўқувчи-ёшларнинг сабабсиз дарс қолдиришларининг олдини олишга қаратилган маънавий-маърифий суҳбатлар ўтказади. Педагогика жамоалари билан ҳамкорликда китобхонлик кечалари, ”Беш ташаббус олимпиадаси” доирасида синфлараро, мактаблараро ва маҳаллалараро спорт мусобақаларини ташкиллаштириб, бу тадбирлар орқали ёшларнинг дарсдан бўш вақтларини мазмунли ўтказишларини таъминлайди.

Маҳалла ёшлар етакчисининг иш вақти чегараланмаган. Чунки кундалик иш фаолиятидан сўнг уйида, оиласи бағрида бироз ҳордиқ чиқарган Шамшод Қурбонбоев деярли ҳар куни кечқурун маҳалла кўчаларини бирров айланиб, ҳудуддаги хусусий савдо-сотиқ шохобчалари атрофини кўздан кечиришга одатланган.

– Ота-оналари ёки уларнинг ўрнини босувчи шахслар назоратисиз бундай тадбиркорлик шохобчалари атрофида ўсмир болаларнинг ўралашиб юриши уларнинг тарбиясига салбий таъсир қилмай қолмайди. – дейди Шамшод. – Шунинг учун биз катталар доимо огоҳ бўлишимиз керак.

Ҳудуддаги уюшмаган ёшлар, хориж давлатларида ишлаб қайтган ёшлар билан ишлашиш Шамшод Қурбонбоев учун доимий долзарб масала. Айниқса, хориж давлатларидан қайтган ёшларни тиббий кўрикдан ўтказиш, ишсиз ёшларни ўз қобилиятларига мувофиқ касб-корга ўқитиш, ўзини-ўзи банд қилиш тамойили асосида ижтимоий фойдали меҳнатга жалб этиш борасида амалга оширилган чора-тадбирлар натижасида маҳалла ёшларининг бандлиги таъминланаётганидан намуналиклар мамнун.

Айни кунларда эса маҳаллада ишсиз, бекорчи одамнинг ўзи йўқ. Вақтинча ишсиз ёшлардан тузилган кўнгилли ҳашарчилар бригадаси таркибида ҳудуддаги фермер хўжаликлари далаларида пахта йиғим-теримида деҳқонларга қўл-қанот бўлаётган ёшлар ҳар куни терган пахтаси учун камида 60-70 минг сўм, ҳатто ундан ҳам кўпроқ иш ҳақи олишаётганидан мамнун.

Шамшод Қурбонбоев эса маҳалла ёшларининг ҳаётига ўзгаришлар олиб кириш, уларнинг ижтимоий фаоллигини ошириш, доимий даромад манбаига эга, фаровон турмуш кечиришларини таъминлаш йўлида ҳамиша сафарбар. Зеро, маҳалла ёшларинг ҳаётдан рози яшашлари, турмушлари фаровон бўлиши учун фидойи меҳнат қилиш, наинки унинг касбий масъулияти, балки инсоний бурчи ҳамдир.

Робия Йўлдошева.