ЮРТ ТИНЧЛИГИ ВА ХАЛҚ ОСОЙИШТАЛИГИНИ ТАЪМИНЛАШ ЙЎЛИДА

2006 йил 6 декабрда қабул қилинган Қонун билан 25 октябрь мамлакатимизда Ўзбекистон Республикаси Ички ишлар органлари ходимлари куни этиб белгиланган эди. Шундан буён ушбу сана юрт тинчлиги ва хавфсизлигини сақлаш, жамиятнинг барқарорлиги, жамоат тартиби ва қонун устуворлигини таъминлашни ўз олдиларига мақсад қилиб қўйган соҳа ходимларининг касб байрами сифатида кенг нишонлаб келинмоқда.

Сўнгги йилларда давлатимиз раҳбари бошчилигида ички ишлар органларини чинакам халқчил тузилмага айлантириш, аҳоли учун барча шаҳар ва қишлоқларда хавфсиз яшаш ва меҳнат шароитини яратиш мақсадида тизимли ишлар амалга оширилди ва бу борадаги ислоҳотлар давом этмоқда.

Амударё тумани Ички ишлар бўлими ходимлари ҳам фуқароларнинг ҳуқуқлари, эркинликлари ва қонуний манфаатларини ҳимоя қилиш, жамоат тартибини сақлаш ва хавфсизлигини таъминлаш, жиноятчилик ва терроризмга, одам савдосига қарши курашиш, ҳуқуқбузарликлар профилактикаси, уларнинг сабабларини ва содир этилишига имкон бераётган шарт-шароитларни аниқлаш ҳамда бартараф этиш борасида самарали ишларни амалга ошириб келмоқдалар.

Шунингдек, бўлим ходимлари ҳуқуқбузарликларни содир этишга мойил шахсларни аниқлаш ва улар билан тизимли ишлаш, жиноий жазони ва жиноий-ҳуқуқий таъсир кўрсатишнинг бошқа чораларини ижро этиш, маъмурий ҳуқуқбузарликлар тўғрисидаги ишларни юритиш, йўл ҳаракати хавфсизлигини, паспорт тизими талабларининг бажарилишини таъминлаш ҳамда ўз ваколатларига кирувчи бошқа масалалар бўйича хизмат бурчлари ҳамда вазифаларини виждонан бажариб келмоқдалар.

Жорий йилнинг ўтган даври мобайнида туман ҳудудида жамоат хавфсизлигини таъминлаш, ҳуқуқбузарлик ва жиноятларнинг барвақт олдини олиш мақсадида 38 минг 76 та хонадонлар ўрганилиб, ҳуқуқбузарлик содир этиш ёки ундан жабрланиш эҳтимоли юқори бўлган 1 минг 572 нафар шахслар билан ижтимоий-профилактик тадбирлар ўтказиш бўйича “Маҳалла еттиликлари”га хулосалар тақдим этилди. Ушбу даврда ўтказилган “Профилактика куни” тадбирлари давомида 146 та жиноятлар муҳокама қилиниб, маҳалла фаоллари томонидан 1 минг 218 нафар ижтимоий профилактика объекти бўлган шахсларнинг муаммоларини ижобий ҳал этиш чоралари кўрилди. 1 минг 239 нафар шахслар профилактик ҳисобга олиниб, улар билан якка тартибдага профилактик ишлар олиб борилди.

Ҳуқуқбузарлик содир қилган 6 минг 679 нафар шахсларга маъмурий чоралар кўрилди. Спиртли ичимликка ружу қўйган шахслар ва руҳий касаллар даволанишга ётқизилди. Қолаверса, босим ва зўравонликка учраган хотин-қизларга ҳимоя ордерлари берилиб, пробация назоратидаги шахсларнинг суд томонидан белгиланган жазоларини ўташи таъминланди. Ўтказилган тезкор тадбирлар натижасида жиноят содир этиб, қидирувда бўлган 16 нафар шахс ушланди, гиёҳвандлик ва психотроп моддаларни ноқонуний сотиш билан боғлиқ 3 та жиноятлар фош этилди.

Амалга оширилган самарали профилактик ишлар натижасида тумандаги 26 та маҳалла жиноятчиликдан ҳоли ҳудудга яъни “яшил” тоифага киритилиб, ушбу маҳаллаларда бирорта жиноят содир этилишига йўл қўйилмади. Ўтган йилнинг шу даврига нисбатан олдини олиш мумкин бўлган, фирибгарлик, номусга тегиш, баданга оғир тан жароҳати етказиш, енгил тан жароҳати етказиш каби жиноятларнинг камайишига эришилди.

Биометрик паспорт ўрнига жорий этилган идентификация ID карталарини олиш ва алмаштириш бўйича мурожаат қилган 14 минг 766 нафар фуқароларга ID карталар расмийлаштирилиб берилди. 1 минг 953 нафар фуқароларнинг маълумотлари қабул қилиниб, уларга хорижга чиқиш биометрик паспортлари расмийлаштирилиб берилди. Фуқаролиги бўлмаган шахс гувоҳномасининг амал қилиш муддати тугаган 37 нафар шахсларнинг мурожаатлари бўйича уларга гувоҳномалар расмийлаштириб берилди. Бундан ташқари, 65 нафар чет эл фуқаролари Ўзбекистон Республикасида яшаш гувоҳномасининг амал қилиш муддати тугаганлиги сабабли уларнинг мурожаатлари ҳам қонуний ўрганиб чиқилиб тўлиқ қаноатлантирилди.

Туманимиздаги 3-секторга 12 та шаҳарча, овул ва маҳаллалар киритилган бўлиб, жами аҳоли сони 54 минг 105 кишини ташкил қилади. Муҳтарам Президентимизнинг “Ҳар бир раҳбар фақат хизмат хонасида ўтирмасдан, жойларга бориб, аҳолини безовта қилаётган энг долзарб масалаларнинг амалий ечими билан шуғулланиши, халқ билан яқиндан мулоқот қилиб, унинг дарду ташвишлари, ҳаётий муаммоларини самарали ҳал этиш бўйича янгича қараш билан фаолият олиб бориши лозим” деган ғояси сектор фаолиятининг асосий мезонига айланди.

Жорий йил бошидан жойларда 52 та сайёр қабул ўтказилди. Ушбу сайёр қабулларда жами 250 та мурожаатлар келиб тушди ва уларнинг 210 таси қаноатлантирилиб, 19 нафар мурожаат қилган шахсларга тушунтиришлар берилди.

“Бандлик” дастурига мувофиқ йил бошидан шу кунга қадар 173 нафар фуқаролар ишга жойлаштирилди. 2 марта бўш иш ўринлари ярмаркаси ташкил қилиниб, 26 нафар фуқаролар касбга ўқитилди.

Сектор раҳбарияти томонидан ҳудудларда ижтимоий инфратузилмани яхшилаш, тадбиркорликни ривожлантириш, янги иш ўринларини яратиш, аҳолининг эҳтиёжманд қатламини ижтимоий ҳимоя қилиш, ёшлар, хотин-қизлар билан тизимли равишда ишлашиш бўйича ҳам самарали ишлар амалга оширилмоқда.

Бир сўз билан айтганда туман Ички ишлар бўлими ходимлари нафақат тинчлик ва осойишталикни таъминлаш, балки халқ фаровонлигини таъминлаш, мамлакат тараққиётига ҳисса қўшишдек хайрли ишларда ҳам жонбозлик кўрсатмоқдалар. Фаолиятимизнинг асосий принциплари қонунийлик, фуқароларнинг ҳуқуқлари, эркинликлари ва қонуний манфаатларига риоя этиш ҳамда ҳурмат қилиш, очиқлик ва шаффофликдан иборат.

Фурсатдан фойдаланиб, барча ҳамкасбларимизни, туман Ички ишлар бўлими шахсий таркибини, соҳа фаҳрийларини ҳамда хизмат вазифасини бажариш вақтида ҳалок бўлган ходимларнинг оила аъзоларини касб байрамимиз – Ички ишлар идоралари ходимлари куни билан чин қалбимдан табриклаб, уларнинг юрт тинчлиги ва халқ осойишталигини таъминлашдек машаққатли ва шарафли ишларида омад ёр бўлишини тилайман!

Мухамметали Хожамуратов, Амударё тумани Ички ишлар бўлими бошлиғи, подполковник