67-сонли мактабда бўлиб ўтган байрам тадбиридан таассуротлар
Ҳеч ким сизнинг ҳаётингизга дахл қила олмайди, ҳақ-ҳуқуқларингизни поймол қилиб, сизга зўравонлик қилишга ҳеч кимнинг ҳаққи йўқ. Ҳар ким ўз қилган иши учун ўзи жавоб беради, бировнинг қилмиши учун биров товон тўламайди... Чунки биз қонун устувор бўлган жамиятда яшаяпмиз. Чунки бизда ҳар қадамда, ҳар нафасда ҳақ-ҳуқуқларимизни ҳимоя қиладиган, “Ўзбекистон Республикасида барча фуқаролар бир хил ҳуқуқ ва эркинликларга эга бўлиб, жинси, ирқи, миллати, тили, дини, эътиқоди, ижтимоий келиб чиқиши, ижтимоий мавқеидан қатъи назар, қонун олдида тенгдирлар” дея эътироф этилган Конституция бор! Ҳа, Конституция ана шундай муҳим ҳужжат.
Ҳар йили қомусимиз қабул қилинган сана муносабати билан юртимиздаги барча таълим масканларида, идора ва ташкилотларда, мактабларда турли хил тадбирлар, байрам кечалари ўтказилади. Албатта бундай тадбирларнинг мақсади ёш авлодга, фуқароларга Конституциямизнинг мазмун-моҳиятини англатиш, ундаги ҳар бир модданинг жамият ва инсонлар ҳаётида тутган ўрнини уқтириш, ўсиб келаётган ёш авлод қалбига қонун устуворлиги, адолат, ҳуқуқ каби кенг тушунчаларни сингдириш ва уларнинг ҳуқуқий саводхонлигини оширишдан иборат.
Ўзбекистон Республикаси Президентининг 2024 йил 17 октябрдаги “Ўзбекистон Республикаси Конституцияси куни байрамига тайёргарлик кўриш ва уни ўтказиш тўғрисида”ги фармойиши ижросини таъминлаш мақсадида Амударё тумани Мактабгача ва мактаб таълими бўлимига қарашли 67-сонли мактабда байрам тадбири ўтказилди.
Тадбирда мактаб ўқитувчилари ҳамда ўқувчилари қатнашди. Дастлаб, тадбирни мактаб директори Ҳамро Турсунбоев кириш сўзи билан очиб берди ва барча ўқитувчилар ва ўқувчиларни Бош қомусимиз бўлган Конституциямизнинг 32 йиллиги билан муборакбод этди. Юракларни фахр ва ифтихор туйғуларига тўлдириб Ўзбекистон ва Қорақалпоғистон Республикалари давлат мадҳиялари янгради. Йиғилганлар қўлларини кўксида тутиб, бугунги дориламон кунларга шукроналар айтишди.
Тадбирда мактабнинг ҳуқуқ фани ўқитувчиси Ойбек Болтабоев сўзга чиқиб, ўқувчиларни байрам билан табриклади, Конституция ва қонунларнинг ҳаётимизда тутган аҳамияти тўғрисида сўз юритди.
Шундан сўнг, тадбир давомида ўқувчиларнинг ҳуқуқий саводхонлигини ошириш мақсадида янги таҳрирдаги Конституцияга оид бир қанча маълумотлар бериб ўтилди. Ўқувчилар Бош қомусимиздан ўрин олган моддаларнинг айримларига тўхталиб, уларни тенгдошларига ёддан айтиб беришди.
Шундан кейин, тадбирнинг бадиий қисмига навбат берилди. Мактаб ўқувчилари ижросида дилрабо қўшиқлар янгради. Ўқувчи қизлар Конституция ҳақидаги ёд олган шеърларини айтиб бердилар.
Тадбир сўнгида 67-сонли мактабнинг бошланғич синф ўқувчилари ўртасида “Ҳуснихат ҳам бир санъат” мавзусида ўтказилган кўрик танловнинг ғолиблари аниқланди ва танловда қатнашиб, ғолибликни қўлга киритган ўқувчиларга фахрий ёрлиқлар топширилди, совға тариқасида ўқувчиларга бадиий китоблар тақдим этилди.
Бугунги кунда инсон қадр-қиммати, унинг ҳуқуқлари, эркинликлари ва қонуний манфаатларини таъминлаш ғояси давлатимизнинг бутун ички ва ташқи сиёсатининг тамал тошига, Янги Ўзбекистонда олиб борилаётган демократик ислоҳотларнинг энг муҳим ҳаракатлантирувчи кучига ҳамда ушбу эзгу саъй-ҳаракатларни ўзаро боғлаб турувчи муҳим омилга айланди. Шундай экан, Бош қомусимиздан жой олган моддаларнинг моҳиятини англаш, ҳақ-ҳуқуқларимизни билишимиз ва амалда уларни қўллай олишимизда ҳуқуқий онг ва ҳуқуқий саводхонликнинг аҳамияти катта. Шу жиҳатдан олиб қарайдиган бўлсак, ўтказиладиган бу каби тадбирлар ўқувчилар учун ҳам, жамоатчилик учун ҳам бирдай аҳамиятлидир.
Азиза Мадраҳимова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
