31-сонли мактабда Навоий таваллудига бағишланган бадиий кеча ўтказилди

Сўз мулкининг султони Алишер Навоий даҳоси ва унинг шоҳ асарлари, ғазаллари мактаб даврларидан бошлаб бизга таниш. Китобларини ҳар гал варақлаганимизда шоирнинг янги-янги қирраларини кашф этамиз, ғазал ва рубоийларини ўқишимиз мобайнида худдики ижодкор яшаган даврларга тушиб қолгандек бўламиз. Буюк бобокалонимиз таваллуд топган 9 февраль санаси эса ҳар йили юртимиз бўйлаб кенг нишонланади. Жойларда бадиий кечалар, мушоиралар, ижод учрашувлари ўтказилади. Адабиётга бефарқ бўлмаган, катта-кичик давраларда баҳр-у байт мусобақалари ўтказилади. Шу тариқа, шоир шахсини яна бир бора қайтадан кашф этамиз. “Хамса”ни яна бир бора қўлимизга оламиз.

Яқинда Амударё тумани Мактабгача ва мактаб таълими бўлимига қарашли 31-сонли умумтаълим мактабида ҳам шоир таваллудининг 584 йиллиги муносабати билан бадиий кеча уюштирилди.

Мактабнинг она тили ва адабиёт фани ўқитувчилари Гўзал Камолова, Умида Юлдашева, Сайёра Раимовалар бошчилигида, юқори синф ўқувчилари иштирокида ўтказилган тадбир Алишер Навоий таваллуди, шоирга исм қўйилиш саҳналари ва умрининг сўнгги лаҳзаларигача бўлган даврлардаги воқеаларни ўз ичига олди.

Дастлаб, ўқувчилар Гули Собирова ҳамда Шоҳруз Раҳимбоевлар ижросида Навоий болалиги саҳналари гавдалантирилди. Унда Навоийнинг болалик даврлари, шоирнинг сўз дунёсига болаликдан бошлаб ўзгача муҳаббат қўйгани акс эттирилди. Шундан сўнг, мактабнинг 6-синф ўқувчилари Саидбек Давлетбоев ҳамда Гулкамар Соатбоева ижросида “Гули” монологи ўқиб эшиттирилди. “Ҳамон ёдимдадур куз чоғи эрди, кўришган масканим гул боғи эрди…” дея жаранглаган байтларни ўқувчилар зўр иштиёқ билан тингладилар.

Маълумки, Алишер Навоий икки тилда мукаммал ижод қилган. Туркий тилда “Навоий”, форсий тилда эса “Фоний” тахаллусларини қўллаган. Алишер Навоийнинг адабий ва илмий меросини 4 фаслга бўлиш мумкин: девонлари, достонлари, форсий тилдаги шеърий мероси, илмий-филологик, насрий ва тарихий асарлари. Шоир ҳазратларининг ўзбек тилида яратган шеърий мероси асосан “Хазойин ул-маоний” девонига жамланган.

Шунингдек, Навоий ижодининг энг муҳим ва машҳур асарларидан бири бўлган “Хамса” тўплами шоирнинг адабий маҳоратини, фалсафий ва маънавий қарашларини акс эттирган юксак ижод маҳсули сифатида эътироф этилади. Асар неча асрки, ўз жозибасини йўқотмасдан авлоддан авлодга ўтиб, яшаб келмоқда.

Тадбир давомида 7-синф ўқувчилари ижросида ушбу тўпламдан ўрин олган, севги, машаққат ва умид тараннум этилган “Фарҳод ва Ширин” достони саҳналаштирилиб, ўқувчилар эътиборига ҳавола этилди.

Шундан сўнг, бадиий кеча ўқувчилар ёд олган Навоий ижодига мансуб ғазаллар ва рубоийлар билан давом этди. 6-синф ўқувчилари “Тановар” миллий куйига рақсга тушдилар. Албатта, ўтказилаётган бу каби тадбирлар шоир хотирасини абадийлаштиришга хизмат қилиб, унинг бебаҳо адабий меъроси келажак авлодларга ҳам етиб боришида муҳим восита бўлади. Бир тарафдан, ўқувчилар ўртасида ўзаро ҳамжиҳатликни, жамоавийликни шакллантирса, яна бир тарафдан, янгидан-янги истеъдодларни кашф этишга ёрдам беради.

Азиза МАДРАҲИМОВА