14-сонли мактабда “Буюкларни ёд этиб” номли маънавий-маърифий тадбир бўлиб ўтди
Ҳар бир халқнинг маънавий тараққиётида буюк мутафаккир ва адибларнинг ўрни беқиёс. Уларнинг ижоди, фикрлари ва илмий қарашлари асрлар оша халқ тафаккури, маданияти ва маънавий тараққиётининг шаклланишига хизмат қилади. Айниқса, ўзбек адабиётининг икки забардаст намояндаси – Алишер Навоий ва Заҳириддин Муҳаммад Бобур ижоди миллий маънавиятимиз хазинасининг дурдоналаридир. Уларнинг ижоди ва тарихий фаолияти бугунги кунда ҳам ёш авлод учун ибрат ва илҳом манбаи бўлиб хизмат қилмоқда.
Ҳар йили мазкур буюк сиймоларнинг таваллуд айёмига бағишлаб турли маънавий-маърифий тадбирлар ўтказилади. Бундай тадбирлар ёшларнинг миллий қадриятларга ҳурматини ошириш, тарихий шахсларга бўлган қизиқишини кучайтириш, уларда ватанпарварлик ва ифтихор туйғуларини мустаҳкамлашга хизмат қилади.
Амударё туманидаги 14-сонли мактабда ана шундай адабиёт кечаларидан бири – “Буюкларни ёд этиб” номли маънавий-маърифий тадбир бўлиб ўтди. Ушбу тадбир мактабнинг она тили ва адабиёт ҳамда давлат тили фани ўқитувчилари Дилфуза Гаипова, Садоқат Давлетова ва Дилнора Сафарбоевалар ташаббуси билан ташкил этилди ва юқори савияда ўтказилди.
Тадбирда юқори синф ўқувчилари Алишер Навоий ва Заҳириддин Муҳаммад Бобур ижодидан намуналарни ифодали тарзда ўқишди. Ушбу шеърий чиқишлар орқали ёшлар буюк адибларнинг теран фикрлари ва юксак маънога эга шеърияти билан янада яқинроқ танишдилар. Бу буюк сиймоларнинг ижоди кишига нафақат адабий завқ бағишлайди, балки инсон маънавиятини юксалтириш, комил шахсни тарбиялашда ҳам муҳим ўрин тутади. Улар қолдирган маънавий мерос Ватанга муҳаббат, инсонийлик, адолат ва билимга интилиш каби эзгу фазилатларни тарғиб қилади.
Тадбирда сўзга чиққанлар буюк алломалар, адабиёт ва санъат намояндаларининг ижодини ўрганиш ва тарғиб этишга катта эътибор қаратилаётган юртимизда ҳар йили Алишер Навоий ва Заҳириддин Муҳаммад Бобур таваллуди кенг нишонланишини, саналар муносабати билан халқаро илмий анжуманлар ва ижодий кечалар ташкил этилишини алоҳида таъкидладилар. Юртимизда буюк мутафаккирлар асарлари қайта нашр этилиб, уларни чуқур ўрганиш ва тарғиб қилиш мақсадида илмий-тадқиқотлар олиб борилмоқда. Бундан ташқари, мактаб ва олий таълим муассасаларида ушбу ижодкорларнинг асарларини ўрганишга алоҳида эътибор қаратилади.
Маънавий-маърифий кечада шунингдек, буюк шоирлар ҳаёти ва ижодига бағишланган саҳна кўринишлари ҳам намойиш этилди. Айниқса, 6-синф ўқувчилари ижросида саҳналаштирилган “Нон ҳиди” асари томошабинларда катта таассурот қолдирди.
Нафақат адабий, балки миллий анъаналар ва маданиятни ўзида мужассам этган мусиқий чиқишлар ҳам тадбирдан ўрин олди. Ўқувчилар ўзбек ва қозоқ халқларининг миллий қўшиқ-куйларига ҳамоҳанг рақслар ижро этиб, тадбирга ўзига хос жўшқинлик бағишлашди.
“Буюкларни ёд этиб” тадбири ёшларнинг миллий тарих ва адабиётга бўлган қизиқишини янада ошириш, аждодлар меросини чуқурроқ англашга чорлаш, уларда маънавий бойликларга эҳтиром уйғотиш борасида муҳим аҳамият касб этади.
Бундай тадбирлар нафақат ёш авлоднинг бадиий савиясини ошириш, балки уларни тарихий шахсларга ҳурмат руҳида тарбиялаш, ўзлигини англаш ва миллий ғурур туйғусини кучайтиришда муҳим роль ўйнайди.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
