Биз буюк юрт фарзандларимиз!

Дунё тамаддунига улкан ҳисса қўшган ота-боболаримиз ҳокини ўз бағрига олган юртимизда, не-не зулмлар, жабр-жафолар чекса-да ўзлигини йўқотмаган, дунёда тенгсиз асл миллий илдизларидан куч олиб тобора равнақ топиб бораётган халқимизнинг бугунги ворислари - ёшларимиз ўзлари улғайган осуда бешик – Она юрт хизматига шай, камарбаста бўлиб вояга етмоқда. Замонавий услубда қурилган, илғор технологиялар билан жиҳозланган, барча шароитларга эга мактаблар, ўрта махсус, касб-ҳунар таълими, олий таълим муассасалари ёшларимизнинг илм-фан сирларини пухта эгаллаши, касб-ҳунарли бўлиб, илк меҳнат кўникмаларига эга бўлишига, билимдон ва фидойи бўлиб вояга етишларига хизмат қилмоқда.

Шуни назардан қочирмаслик керакки, бугунги кунда ёшларимизга яратилаётган имкониятлар билан бир қаторда уларни тўғри йўлдан оздиришга уринаётган манфур кучлар ҳам бор. Бутун дунёда глобаллашув жараёнининг чуқурлашуви ва ахборот технологияларининг такомиллашиб боргани сари миллий маданиятимизнинг, қадриятларимизнинг ва асрлар оша яшаб келаётган азалий урф-одатларимизнинг турмушимизда ўз жилосини сақлаб қолишига эришиш долзарб вазифа бўлиб қолмоқда. Чунки Ғарб "оммавий маданияти” тобора кенгроқ ҳудудларни қамраб олмоқда. Уни янада кенг ёйишга уринаётган кучларнинг мақсади эса инсонларни миллий маданиятидан узоқлаштириш, дунёни бир тизимга солиб, битта оқим бўйлаб ҳаракатланишини таъминлаш, антимиллий ғояларни осонликча сингдириш, маънавий бегоналашувни юзага келтиришдан иборат.

Юртимизда ёшларимиз тарбиясига, маънавиятига салбий таъсир кўрсатиши мумкин бўлган ҳар қандай кучлар таъсиридан сақланиш, ҳаётимизда уларга йўл бермаслик учун кўпгина чора-тадбирлар амалга оширилмоқда.Мамлакатимиз ёшлари камолига хизмат қилувчи кўплаб чора-тадбирлар дастурлари ишлаб чиқилиб, амалга оширилмоқдаки, булар албатта ўз самараларини бермоқда.

Шу йилнинг 13 май куни туманимизда "Биз буюк юрт фарзандларимиз!” шиори остида бўлиб ўтган ёшлар фестивали ҳам ана шундай тадбирлардан биридир.

Фестивални ўтказишдан мақсадёшларни "оммавий маданият”нинг турли ёт ғояларидан асраш, халқимизнинг миллий қадриятларига ҳурмат ва садоқат руҳида тарбиялаш, мамлакатимиз ижтимоий-иқтисодий, маънавий-маданий тараққиёти йўлида ўз ҳиссаларини қўшаётган иқтидорли ва истеъдодли ёш ижодкорлар, ижтимоий фаол ёшларни ҳар томонлама қўллаб-қувватлаш, иқтидорли ёшларнинг илм-фан соҳаларида қўлга киритаётган ютуқларини рағбатлантириш, уларнинг ақл-заковати ва интеллектуал қобилиятларини тўла намоён этишига кўмаклашиш, ёшлар орасида соғлом турмуш тарзини кенг тарғиб қилишдан иборатдир.

Фестивалнинг очилиши ва "Сиз севган қаҳрамонлар” мавзусида таниқли ёзувчилар, шоирлар, кино актёрлари ҳамда эстрада хонандалари билан ижодий учрашув Амударё академик лицейида бўлиб ўтди. Она юртга муҳаббат, садоқат туйғуларини мадҳ этувчи, ўз туғилган маконини ёт кучлардан ҳимоя қилишга чорловчи қўшиқлар барча иштирокчилар қалбида акс садо берди.

Фестивал доирасидаги тадбирлардан бири Манғит иқтисодиёт коллежида ўтказилди. Бу ерда "Президент асарлари билимдони” лойиҳасида Ўзбекистон Республикаси Президенти Ислом Каримовнинг "Ўзбекистон мустақилликка эришиш остонасида” номли китоби бўйича қатнашчиларнинг билимлари синовдан ўтказилди. Шунингдек, олимлар ва ёзувчилар иштирокида китобнинг мазмун-моҳиятини тушунтиришга қаратилган семинар-тренинг ташкил этилди.

250 нафар ёшлар иштирок этган "Биз соғлом турмуш тарзи тарафдоримиз” номли лойиҳада туманимиздаги ўрта махсус, касб-ҳунар таълими муассасалари ўқувчилари ўртасида футбол ва волейбол бўйича Дўрман қишлоқ хўжалик касб-ҳунар коллежида мусобақалар ўтказилди.

Туман маданият ва спорт ишлари бўлими биносида 300 нафар ёшлар "Гумроҳлар” номли кинофильмни томоша қилдилар.

Амалга оширилган тадбирлар туманимизнинг ёшларини юрт равнақи йўлида бир танбир жон бўлиб бирлашишга, ҳар қандай ёт ғоялар турмушимизга кириб келишининг олдини олишда якдил курашишга чорлади.

Ёшлар фестивали доирасидаги тадбирларда Ўзбекистон халқ артисти Ражаб Адашев, актёрлар Пўлат Норматов, Юнус Асқаров, Ўзбекистонда хизмат кўрсатган артист Самандар Ҳамроқулов, эстрада хонандаси Тоҳир Усмонов, актёр Нурбек Маматов, ёш олима Гулмира Шомуродова, Олий Мажлис Қонунчилик палатаси депутати Жолдасбай Абдужамилов, "Ўзбекистон белгиси” кўкрак нишони соҳибаси Гўзал Эргашева, Зулфия номидаги давлат мукофоти соҳибаси Шаҳзода Бозорбоевалар иштирок этдилар.

Ойгул РАЖАБОВА.