МТТДА КЎРГАЗМАЛИ СЕМИНАР: БОЛА ҚАЛБИГА ЙЎЛ ТОПИШ УЧУН НИМАЛАР ҚИЛИШ КЕРАК?

Мактабгача таълим ташкилотларида фаолият олиб борувчи педагог-тарбиячиларнинг касбий маҳоратларини ошириб боришларига шароит яратиш, соҳада амалга оширилаётган инновацион лойиҳаларни амалиётга татбиқ этиш мақсадида Амударё туман Мактабгача ва мактаб таълими бўлимининг Мактабгача таълим ташкилотлари ишини мувофиқлаштириш шуъбаси томонидан турли саналар муносабати билан тадбирлар ўтказиб келинмоқда

Жорий йилнинг 3 март куни тумандаги 24-сонли мактабгача таълим ташкилотида бўлиб ўтган “Гўзал баҳор” мавзусидаги кўргазмали семинар ҳам ёш авлод камолотида мактабгача таълим ташкилотларининг тутган ўрни ва педагог-тарбиячиларнинг замонавий билимларни эгаллаш борасидаги маҳоратларини оммалаштиришга бағишланди. Семинарда Тўлқин, Қипчоқ, Қангли, Чойкўл, Оқ олтин овулларида фаолият олиб борувчи 13та мактабгача таълим ташкилотлари раҳбарлари ва педагог-тарбиячилар иштирок этишди.

Семинар ўтказиш учун мазкур 24-сонли мактабгача таълим ташкилоти бежизга танланмаган. 2022 йилда, “Обод қишлоқ” дастури доирасида қайта таъмирланган ва замонавий қиёфа касб этган ташкилотнинг барча хоналари шинам ва ёруғ, иситиш тизимлари билан тўлиқ таъминланган.

Айни пайтда ташкилотда асосий гуруҳларда 105 нафар, мажбурий мактабгача таълим гуруҳида 25 нафар, шунингдек, 5та қисқа муддатли гуруҳларда 106 нафар болажонлар таълим-тарбия олишмоқда.

МТТда болажонларнинг замон талаблари даражасида таълим-тарбия олишлари учун зарур шароитлар яратилган. Жамоанинг барча педагог-тарбиячилари олий маълумотли мутахассислар бўлиб, режавий-жадвал асосида ўтказиладиган ҳар бир машғулотнинг болалар ёшига мутаносиб равишда, давлат таълим меъёрлари даражасида амалга оширилишига алоҳида эътибор қаратилади.

Кичкинтойларнинг қизиқишларини ҳисобга олган ҳолда кўргазмали воситалар билан безатилган ўйин хоналари, жонли табиат бурчаги, ўсимликлар дунёси ҳақида ҳикоя қилувчи манзарали сурат-лавҳалар, уларнинг “Бу нима?” “Қачон?” “Қаерда?” каби саволларига амалий жавоб сифатида ташкил этилган инновацион альбомлар, ҳар бир гуруҳ тарбияланувчиларининг қизиқиш ва интилишларини акс эттирувчи болажонлар томонидан ясалган ўйинчоқлар, чизилган суратлар тўпламларининг мавжудлиги ташкилот педагог-тарбиячиларининг изланувчан ва маҳоратли ходимлар эканлигидан яққол далолатдир.

Тўртта гуруҳда ташкил этилган очиқ тарбиявий машғулотларни тайёрлов гуруҳи тарбиячиси Шаҳло Шомуродова, 2-катта гуруҳ тарбиячиси Зилола Холманова, 3-ўрта гуруҳ тарбиячиси Маржона Давлатбаева, мажбурий мактабга тайёрлов гуруҳи тарбиячиси Дилфуза Йўлдошевалар юксак савияда олиб бордилар.

Хусусан, баҳор байрамлари ­– 1 март – халқимизнинг севимли шоираси Зулфияхоним таваллудининг 110 йиллиги, 8 март – Халқаро хотин-қизлар куни ҳамда Наврўз айёми тўғрисида инновацион технологиялардан фойдаланган ҳолда ўтказилган қизиқарли машғулотлар иштирокчиларда катта таассурот қолдирди.

Айниқса, баҳор байрамларининг халқимиз ҳаётида тутган ўрни, миллий ўзликни англаш борасидаги аҳамияти, шунингдек, ўзбек халқининг буюк фарзанди Зулфияхонимнинг шахсий ҳаёти ва ижоди билан болажонларни таништириш, улар қалбида бадиий адабиётга, айниқса, шеъриятга ихлос ва қизиқиш уйғотиш борасидаги машғулотлар ўтказиш бўйича тажрибалари ҳамда услубий ишланмалари семинар иштирокчилари томонидан юқори баҳоланди.

Семинар давомида  иштирокчилар гуруҳларида халқимизнинг ўзига хос бой тарихий мероси ва миллий қадриятлари орқали мактабгача ёшдаги болаларда оила, Ватан, она табиатга бўлган маънавий-ахлоқий муносабат ҳамда эстетик қарашларни шакллантириш, давлат рамзларига, она тилига ҳурмат, киндик қони томган тупроққа муҳаббат ва ғурур туйғуларини уйғотиш мақсадида ташкил этилган ўзбек халқ эртаклари асосидаги композициялар, маънавият ва ватанпарварлик бурчаклари билан безатилган машғулотлар хоналари билан яқиндан танишдилар.

Семинар якунида Амударё туман Мактабгача ва мактаб таълими бўлимининг мактабгача таълим ташкилотлари фаолиятини мувофиқлаштириш шуъбаси услубчиси Шаҳноза Қиличева ҳамда семинар иштирокчилари МТТ педагог-тарбиячилари томонидан ўтказилган очиқ машғулотларни таҳлил қилишиб, машғулотлардан олган таассуротлари юзасидан ўз фикрларини билдирдилар. Улар, айниқса, МТТдаги тартиб-интизом, педагог-тарбиячиларнинг маданияти, машғулотларни ташкиллаштириш ва бола қалбига йўл топиш борасидаги юксак педагогик маҳоратларига юқори баҳо бердилар. Шу билан бирга, мазкур муассасанинг ўзига хос иш фаолиятини педагог-тарбиячиларининг услубий тажрибаларини кенг оммалаштириш зарурлигини таъкидладилар.

РОБИЯ ЙЎЛДОШЕВА.