Муддатли ҳарбий хизматни тугатган йигитлар тантанали кутиб олинди
Ҳарбий хизмат – ёш йигитларнинг иродасини тоблайдиган, масъулият ва интизомини оширадиган, уларни мардлик ва жасорат синовидан ўтказадиган ҳаёт мактабидир. Ҳарбий либос кийиб, Ватан ҳимоясига бел боғлаш – фақат бурч эмас, балки юксак шараф ҳамдир. Ватан сарҳадларида ҳарбий хизматни ўтаган йигитлар нафақат юрт ҳимоячилари сифатида тарбия топади, балки мустаҳкам ирода, қатъият ва садоқат тамойилларини ўз ҳаёт тарзига айлантиради.
Шу маънода, Президентимизнинг 2025 йил 29 январда қабул қилинган “Ўзбекистон Республикаси фуқароларининг муддатли ҳарбий хизматга навбатдаги чақируви ҳамда хизмат муддатини ўтаб бўлган ҳарбий хизматчиларни Қуролли Кучлар резервига бўшатиш тўғрисида”ги Қарори билан юртимиз бўйлаб бир қатор тадбирлар ташкил этилмоқда. Яқинда Амударё туман Мудофаа ишлари бўлими биносида ҳам ҳарбий хизматни шараф билан адо этиб қайтган йигитларни тантанали кутиб олиш маросими бўлиб ўтди.
Тадбирда туман Мудофаа ишлари бўлими бошлиғи, майор Шуҳрат Маматов ҳамда масъуллар иштирок этишди. Шуҳрат Маматов хизматни шараф билан тугатган йигитларни самимий табриклаб, ҳарбий хизмат орқали орттирилган билим ва тажриба уларнинг келажагига мустаҳкам пойдевор бўлишини таъкидлади.
Йигитлар ўз сўзларида муддатли ҳарбий хизмат давомида ўрганган билимлари, ҳаётий тажрибалари, ҳарбий интизом ва жисмоний тайёргарликнинг аҳамияти ҳақида гапириб, улар учун яратилган шароитлар учун миннатдорлик билдиришди.
Ҳарбий хизматни ўтаб қайтган йигитларнинг ота-оналари ҳам тадбирда иштирок этиб, ўз фарзандлари билан фахрланишларини, улар қатъиятли, ватанпарвар, иродали ва тартибли ёшлар сифатида уйларига қайтганидан мамнун эканликларини таъкидлаб, давлат томонидан ҳарбий хизматчилар учун яратилган шароитлар учун миннатдорчилик билдиришди.
Президент қарорига мувофиқ 2025 йил март-апрель ойларида Ўзбекистон Республикасининг чақирув ёшидаги фуқаролари навбатдаги муддатли ҳарбий хизматга чақирилади. Ҳарбий хизматга яроқли, шу жумладан, чекловлар билан яроқли бўлган, бироқ ушбу чақирув даврида Қуролли Кучлар сафига чақирилмайдиган ёшлар эса сафарбарлик чақируви резерви хизматига олинади.
Шунингдек, Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари белгиланган тартибда ҳарбий хизматга чақирилган йигитларнинг ўз вақтида ҳозир бўлишларини таъминлаш ҳамда уларни тантанали кузатиш ва хизматни ўтаб қайтганларни муносиб кутиб олиш тадбирларини юқори савияда ташкил этишга масъул ҳисобланади.
Ҳарбий хизмат – жасур ва садоқатли йигитларни тарбиялайдиган олий мактабдир. Ватан ҳимояси – муқаддас бурч. Бу бурчни шараф билан адо этаётган барча ҳарбий хизматчиларимизга чуқур миннатдорчилик билдирамиз!
Шоҳзод Қурбонбоев.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
