36-сонли умумтаълим мактабида “Касбий ривожланиш соати” машғулотлари юқори савияда ташкил этиляпти
Ўқитувчиларнинг билим ва маҳоратини доимий равишда ошириш, уларни замонавий педагогик ёндашувлар асосида қайта тайёрлаш — таълим сифати юксалишининг муҳим омили ҳисобланади. Бугунги кунда мамлакатимизда таълим соҳасини ислоҳ қилиш, педагоглар малакасини ривожлантиришга қаратилган қатор амалий чора-тадбирлар изчил татбиқ этилмоқда.
Жумладан, Президентимизнинг 2024 йил 21 июнь кунги “Мактабгача ва мактаб таълими ташкилотлари ходимларини узлуксиз касбий ривожлантириш тизимини такомиллаштириш бўйича қўшимча чора-тадбирлар тўғрисида”ги Қарорига мувофиқ, умумий ўрта таълим муассасаларида “Касбий ривожланиш соати” ва “Касбий ривожланиш куни” амалиёти жорий этилди.
Амударё тумани Мактабгача ва мактаб таълими бўлими тасарруфидаги 36-сонли умумтаълим мактабида ҳам ушбу жараён самарали йўлга қўйилган. Ҳар ҳафтанинг шанба куни ташкил этилаётган “Касбий ривожланиш соати” машғулотлари бошланғич синф ўқитувчилари учун замонавий педагогик билим ва кўникмаларни оширишга хизмат қилувчи фойдали платформага айланди. Ушбу машғулотларга мактабнинг етакчи ўқитувчиси, олий тоифали педагог Сарагул Юсупова раҳбарлик қилмоқда.
Сарагул Юсупова 1993 йилдан буён педагогик фаолият юритиб келмоқда. Унинг 32 йиллик бой тажрибаси ва юқори савиядаги билимлари бугунги ёш ўқитувчилар учун амалиётга асосланган намуна сифатида хизмат қилмоқда. Жонкуяр устознинг очиқ дарслари, маънавий-маърифий тадбирлари нафақат ўқувчилар, балки ҳамкасблари учун ҳам ибрат мактабига айланган. У ўз билим ва тажрибасини ёш педагоглар билан доимий равишда ўртоқлашиб келмоқда.
“Касбий ривожланиш соати” доирасидаги машғулотлар бошланғич синф ўқитувчиларига замонавий педагогик ёндашувлар, янги методлар билан танишиш, тажриба алмашиш ва шахсий педагогик маҳоратни ривожлантириш имкониятини яратади.
Яқинда ташкил этилган машғулотларда мактабнинг маънавий-маърифий ишлар бўйича директор ўринбосари Сарвар Қутлимуродов, метод бирлашма раҳбари Насиба Бобожонова ҳамда бошланғич синф ўқитувчилари фаол иштирок этди. Машғулотларда амалий дарс таҳлили, методик кўмак, дарс кузатуви ва рефлексия, шунингдек, малака ошириш каби фаолиятлар устувор аҳамият касб этди.
Устознинг меҳнат самаралари ўқувчиларининг ютуқларида ҳам яққол кўзга ташланмоқда. Хусусан, ментал арифметика бўйича ўтказилган халқаро танловларда юқори натижалар қўлга киритилди. Сарагул Юсупованинг энг билимдон ўқувчилари Туркия ва Бирлашган Араб амирликлари каби давлатларида бўлиб ўтган нуфузли беллашувларда муваффақиятли иштирок этишди. Бу эса устознинг билимга бўлган интилиши, замонавий ёндашувлари ва ўз касбига бўлган юксак масъулияти самарасидир.
Жонкуяр устоз Сарагул Юсупова фидойи хизматлари ва юқори педагогик салоҳияти учун Қорақалпоғистон Республикаси Халқ таълими вазирлигининг “Фахрий ёрлиғи” ҳамда туман Мактабгача ва мактаб таълими бўлимининг “Ташаккурнома”лари билан тақдирланган.
Ўқитувчиларнинг касбий ривожланиши — таълим сифати ва самарадорлигини оширишда муҳим аҳамият касб этади. “Касбий ривожланиш соати” ва “Касбий ривожланиш куни” амалиёти эса бу борадаги ютуқларнинг мустаҳкам асосига айланмоқда. Мазкур жараёнда билимдон, ташаббускор ва фидойи педагогларнинг иштироки айниқса муҳим.
Шоҳзод Қурбонбоев.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
