Амударёлик тадбиркорлар билан очиқ мулоқот бўлиб ўтди
Мамлакатимизда тадбиркорликни қўллаб-қувватлаш, кичик бизнес ва хусусий секторни ривожлантириш орқали аҳоли бандлигини таъминлаш ва турмуш даражасини ошириш давлат сиёсатининг устувор йўналишларидан бири ҳисобланади. Президент ташаббуси билан Қорақалпоғистон Республикасида тадбиркорликни ҳар томонлама рағбатлантириш, мавжуд муаммоларни жойида ҳал этиш, янги имкониятлар яратиш борасида кенг кўламли ислоҳотлар амалга оширилмоқда.
Бу борада учраётган муаммоларни аниқлаш ва ҳал қилиш ҳамда ишбилармонларнинг таклиф ва мурожаатларини тинглаш мақсадида Амударё тумани Маданият бўлими фаоллар залида тадбиркорлар билан очиқ мулоқот бўлиб ўтди.
Мазкур учрашувда туман ҳокими Собир Хўжаметов, Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил девони Қорақалпоғистон Республикаси шуъбаси бош инспектори Ерназар Досанов, Савдо-саноат палатасининг Қорақалпоғистон Республикаси бошқармаси бошлиғи Казбек Артиков, туман прокурори Баҳром Машарипов, туман ҳокими ўринбосарлари, ҳоким ёрдамчилари, тегишли ташкилотлар раҳбарлари, тижорат банклари вакиллари ҳамда фаол тадбиркорлар иштирок этдилар.
Учрашувни очиб берган туман ҳокими Собир Хўжаметов бугунги кунда юртимизда, хусусан, Қорақалпоғистонда тадбиркорликни ривожлантириш йўлида олиб борилаётган чора-тадбирлар, яратилаётган кенг имкониятлар, берилаётган молиявий кўмак турлари ва уларни олиш механизмлари хусусида сўз юритди.
Тадбир давомида Савдо-саноат палатаси бошқарма бошлиғи ҳамда тижорат банклари вакиллари ўз йўналишлари бўйича сўзга чиқиб, кредитлар ажратиш, субсидиялар, грантлар ва тадбиркорлик лойиҳаларини молиялаштириш бўйича мавжуд механизмларни атрофлича тушунтирдилар.
Тадбиркорлар ўзларини қизиқтирган саволлар, дуч келаётган муаммолар билан масъулларга очиқ мурожаат қилиш имкониятига эга бўлдилар. Кўтарилган масалалар орасида ер ажратиш, кредит олишдаги тўсиқлар, инфратузилма билан боғлиқ камчиликлар, рухсатнома ва лицензиялар олиш жараёнидаги мураккабликлар каби долзарб мавзулар муҳокама қилинди.
Хусусан, айрим тадбиркорлар ишлаб чиқариш, сервис ва хизмат кўрсатиш йўналишларида фаолиятни кенгайтириш учун ер майдонлари зарурлигини таъкидладилар. Баъзи банклар томонидан талаб этилаётган гаровлар ва ҳужжатлар тадбиркорлар учун қийинчилик туғдираётгани, баъзан ер майдонлари кадастр реестрига киритилмагани ёки ҳужжатларда аниқлик йўқлиги сабабли айрим лойиҳалар амалга ошмай қолаётганига урғу берилди.
Шу билан бирга ишлаб чиқариш билан шуғулланувчи тадбиркорлар электр энергияси барқарорлиги ва қуввати етарли эмаслиги каби масалаларни кўтардилар, хизмат кўрсатиш ва савдо фаолияти билан шуғулланувчилар эса шаҳар марказида доимий савдо жойларига эҳтиёж борлигини билдирдилар.
Шунингдек, тадбиркорлик фаолиятини юритишда юзага келадиган умумий муаммолар, жумладан, ҳужжатлаштириш жараёнларини соддалаштириш ва бозордаги мавжуд муаммоларни ҳал этиш бўйича ҳам таклифлар билдирилди. Бу мурожаатлар тадбиркорлар дуч келаётган долзарб муаммоларни ва уларга тизимли ечим топиш лозимлигини яққол кўрсатиб берди.
Муҳими, бу масалаларнинг аксарияти жойида тегишли ташкилотлар вакиллари томонидан ҳал этилди. Айрим тизимли муаммолар эса республика даражасида кўриб чиқилиши ва тез орада ижобий ечим топилиши таъкидланди.
Бундай очиқ мулоқотлар маҳаллий даражада муаммоларни аниқлаш, уларни ҳал қилиш ва тадбиркорлик муҳитини яхшилашда муҳим аҳамият касб этади. Айниқса, ислоҳотлар бевосита ҳаётга татбиқ этилаётган ҳозирги шароитда тадбиркорнинг овози эшитилиши, унинг муаммосига эътибор қаратилиши ижтимоий барқарорлик ва иқтисодий ўсиш гаровидир.
Амударё туманида тадбиркорлар билан ўтказилган очиқ мулоқот Ўзбекистонда тадбиркорликни ривожлантиришга қаратилаётган эътиборнинг яна бир ёрқин далилидир. Бу каби учрашувлар тадбиркорларнинг муаммоларини бевосита тинглаш, уларга амалий ёрдам кўрсатиш ва келгусидаги фаолиятлари учун зарур шарт-шароитларни яратишда муҳим аҳамият касб этади.
Мулоқот давомида билдирилган мурожаатларнинг тингланиб, муаммоларнинг ҳал қилиниши ва йирик лойиҳаларнинг амалга оширилиши туман иқтисодиётининг ўсишига, янги иш ўринларининг яратилишига ва аҳоли фаровонлигининг янада ошишига хизмат қилади. Зеро, тадбиркорни қўллаб-қувватлаш – бу жамиятни қўллаб-қувватлашдир.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
