Фаровон маҳалласида янги замонавий боғча биноси фойдаланишга топширилди
Амударё туманининг Фаровон маҳалласи аҳли ҳаётида яна бир қувончли воқеа рўй берди — маҳаллада 90 ўринга мўлжалланган 55-сонли давлат мактабгача таълим ташкилотининг янги биноси тантанали равишда фойдаланишга топширилди.
Мазкур таълим-тарбия маскани биноси давлатимиз раҳбарининг махсус қарори асосида, Ислом тараққиёт банки ва ОПEК халқаро тараққиёт ташкилоти иштирокида амалга оширилаётган йирик лойиҳа доирасида бунёд этилди. Қурилиш ишлари юқори сифат билан, замонавий талабларга тўлиқ жавоб берадиган тарзда “Замин қурилиш транс сервис” МЧЖ томонидан бажарилди.
Тантанали очилиш маросимида Амударё тумани ҳокими Собир Хўжаметов, туман прокурори Баҳрам Машарипов, туман ҳокими ўринбосарлари, соҳа масъуллари, қурувчилар, таълим соҳаси мутасаддилари ҳамда маҳалла фаоллари иштирок этди.
Тадбир аввалида туман ҳокими Собир Хўжаметов сўзга чиқиб, мамлакатимизда мактабгача таълим тизимини ривожлантириш, фарзандларимизнинг таълим-тарбия олишлари учун қулай шарт-шароитлар яратиш давлат сиёсатининг устувор йўналишларидан бири эканини таъкидлади. Шунингдек, ушбу замонавий боғча биносининг фойдаланишга топширилиши Фаровон маҳалласи аҳли учун катта қувонч ва ёш авлод тарбияси йўлида муҳим восита эканини қайд этди.
Тадбирда қурувчи ташкилот вакиллари томонидан боғча биносининг рамзий калити туман Мактабгача ва мактаб таълими бўлими бошлиғи Ялғаш Шомуратовга тантанали равишда топширилди. Ялғаш Шомуратов ўз сўзида мазкур лойиҳани ҳаётга татбиқ этишда кўмак ва эътибор кўрсатган мутасадди ташкилотлар ҳамда қурувчиларга ўз миннатдорлигини билдирди.
Тадбир мобайнида туман ҳокимлиги томонидан қурувчиларга миннатдорчилик тариқасида эсдалик совғалари топширилди. Бу уларнинг фидокорона меҳнатига бўлган юксак эътибор ва ҳурмат ифодаси бўлди. Шундан сўнг 40-сонли мактабгача таълим ташкилоти тарбияланувчилари томонидан тайёрланган ранг-баранг рақслар ва бадиий чиқишлар тадбирга янада байрамона руҳ бағишлаб, меҳмонларга кўтаринки кайфият улашди.
Туман ҳокими Собир Хўжаметов бошчилигидаги маҳалла нуронийлари рамзий тасмани қирқиб, янги боғча биноси билан танишдилар. Отахонлар эзгу ниятлар билан дуога қўл очиб, бу бино болажонлар учун файзли маскан, илм-маърифат йўлида илҳом манбаи бўлишини тиладилар.
Янги таълим-тарбия масканида болажонлар учун барча зарур қулайликлар яратилган — ёруғ ва шинам, кенг хоналар, замонавий мебеллар, ўйин майдончаси ва ўқув-тарбиявий жиҳозлар билан таъминланган. Бу каби боғча биноларининг қурилиши ёш авлоднинг баркамол, билимли, ва юрт равнақига ҳисса қўшадиган инсонлар бўлиб вояга етишига хизмат қилади.
Амударё туманида таълим инфратузилмасини модернизация қилиш, ёш авлод таълим-тарбия олишлари учун замонавий шароитлар яратиш йўлида амалга оширилаётган бундай амалий ишлар – юртимиз келажагига сармоя, эртанги кунимизга ишончли пойдевор бўлиб хизмат қилиши, шубҳасиз.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
