Нукусда “TalabaExpo – 2025” касб кўргазмаси бўлиб ўтди

Мамлакатимизда ёшлар бандлигини таъминлаш ва уларнинг ҳаётда ўз ўрнини топиши учун барча имкониятларни яратиш энг устувор вазифаларидан биридир. Айнан шу мақсадда Қорақалпоғистон Республикасида битирувчиларнинг касбий йўналишини аниқлаш ва бизнес ташаббусларини қўллаб-қувватлашга қаратилган “TalabaExpo – 2025” касблар кўргазмаси бўлиб ўтди.

Тадбир Қорақалпоғистон Республикаси Жўқорғи Кенгеси ҳамда Вазирлар Кенгаши, Ўзбекистон Республикаси Ташқи иқтисодий фаолият Миллий банки ва Олий таълим, фан ва инновациялар вазирлиги ҳамкорлигида ташкил этилди.

Очилиш маросимида таъкидланганидек, мамлакат келажаги бўлган ёшлар билан ишлаш, уларнинг муаммоларини эшитиш ва бартараф этиш, ҳаётда ўзининг муносиб ўрнини топиши учун ҳар томонлама кўмаклашиш ва қўллаб-қувватлаш давлат ва ҳукуматнинг бош мақсадидир. Президентимизнинг юксак ишончи, алоҳида эътибори ва ғамхўрлиги натижасида ёшларимиз учун барча имкониятлар яратиб берилмоқда. Ўтган йилларга назар ташлайдиган бўлсак, ёшлар ҳаётида улкан тарихий ўзгаришлар ва янгиланишлар юз бераётганини кўплаб мисолларда кўришимиз мумкин.

Хусусан, юртимиз ёшларини қўллаб-қувватлаш бўйича жорий йилнинг ўзида 2 та фармон ва 3 та қарорнинг қабул қилингани, тадбиркорлик йўналиши бўйича кўплаб имтиёзлар берилгани, олий ўқув юртларида қорақалпоғистонлик ёшлар учун қўшимча квоталар ажратилгани уларга бўлган ғамхўрликнинг амалий ифодаси ҳисобланади.

Шу йилнинг 14 февраль куни ёшлар масаласида ўтказилган видеоселектор йиғилишида ишсиз ёшларнинг, айниқса олий ўқув юртлари битирувчиларининг бандлигини таъминлаш, ижтимоий ёрдамга муҳтож ёшларни қўллаб-қувватлаш, сифатли таълим бериш, касб-ҳунарга ўқитиш каби устувор вазифалар белгилаб берилган эди. Ушбу тадбир ҳам ана шу топшириқлар ижроси доирасида ташкил этилди.

Ўзбекистон Республикаси Президентининг 2025 йил 14 февраль кунги “Олий таълим муассасалари битирувчиларининг ишга жойлашишига кўмаклашиш бўйича қўшимча чора-тадбирлар тўғрисида”ги қарори асосида ёшлар бандлигини таъминлашда Миллий банк асосий масъул банк этиб белгиланди. Ушбу банк томонидан битирувчи ёшларнинг бандлигини таъминлашга кўмаклашувчи “Келажакка биринчи қадам”, “Келажак учун старт”, “Ёрқин келажак сари” каби дастурлар амалга оширилмоқда.

Бугунги кунда банк билан ҳудуддаги олий таълим муассасалари ўртасида ўзаро ҳамкорлик йўлга қўйилган бўлиб, ёшлар тадбиркорлигини қўллаб-қувватлаш мақсадида Қорақалпоқ давлат университети ва Нукус давлат педагогика институтида “Келажакка қадам” марказининг маслаҳат маркази ташкил этилди. Шу кунга қадар “Миллий банк” акциядорлик жамияти Қорақалпоғистон Республикаси бошқармаси томонидан 364 нафар битирувчи талабага 8 миллиард сўмдан ортиқ миқдорда кредит маблағи ажратилди.

Кўргазмада республиканинг барча олий таълим муассасалари қатори Қорақалпоғистон қишлоқ хўжалиги ва агротехнологиялар институти жамоаси ҳам фаол иштирок этди. Институтнинг раҳбарияти, профессор-ўқитувчилари ва кўплаб битирувчи талабалари ушбу муҳим тадбирда фаоллик кўрсатдилар. Бу институтнинг нафақат юқори сифатли таълим беришга, балки ўз битирувчиларини ишга жойлаштириш ва уларнинг тадбиркорлик ташаббусларини қўллаб-қувватлашга ҳам катта эътибор қаратаётганидан далолат беради.

Кўргазма давомида институт вакиллари аграр соҳадаги замонавий иш ўринлари ва қишлоқ хўжалигидаги кластер корхоналари таклиф этаётган вакансиялар ҳақида битирувчиларга маълумот бердилар. Шунингдек, улар талабалар ва фермерлар, агрокластерлар ва тижорат банклари вакиллари ўртасида тўғридан-тўғри мулоқот ўрнатишга кўмаклашдилар.

Битирувчиларнинг ишга жойлашишига кўмаклашиш, уларнинг касбий йўлини белгилаш ҳамда бизнес ташаббусларини қўллаб-қувватлаш мақсадида ўтказилган “TalabaExpo – 2025” кўргазмасида 80 га яқин корхона ва ташкилот ўзларида мавжуд 700 дан зиёд бўш иш ўрни билан иштирок этди. Тадбирга 10 минг нафарга яқин битирувчи ёш ташриф буюрди.

Кўргазма давомида талабалар корхоналар фаолияти билан танишдилар, “Келажакка қадам” маркази томонидан тақдимотлар ўтказилди. Энг муҳими, 3,5 минг нафар яқин битирувчининг иш берувчилар билан тўғридан-тўғри суҳбати ташкил этилди. Бунинг натижасида 755 нафар битирувчининг иш ўрни аниқланди. Қолаверса, 33 нафар битирувчи талабанинг бизнес лойиҳаси тақдим этилиб, тадбиркорликка йўналтирилди.

Тадбир якунида истиқболли бизнес лойиҳаларининг ғолибларига имтиёзли кредитлар учун сертификатлар топширилди. Бу каби амалий чора-тадбирлар ёшларнинг иқтисодий мустақиллигини таъминлаш ва жамиятдаги фаоллигини оширишда муҳим восита бўлиши шубҳасиз.