АМУДАРЁ ИХТИСОСЛАШТИРИЛГАН МАКТАБИДА "МАРТАБАНГ БАЛАНД БЎЛСИН, ОНА ТИЛИМ!" МАВЗУСИДА ТАДБИР ЎТКАЗИЛДИ

Халқимиз севиб нишонлайдиган байрам саналари кўп. Бундай саналар инсонлар қалбида тинчлик-осойишталикка шукроналик, ўзаро меҳр-оқибат, миллатлараро тотувлик туйғуларини янада мустаҳкамлайди, миллий ўзликни англаш, бобомерос маънавий қадриятларга садоқат, ватанпарварлик ҳисси билан яшашга ундайди. Ана шундай байрам саналаридан бири шу кунларда 1 декабрь — қорақалпоқ тилига давлат тили мақоми берилган кун муносабати билан ўтказилаётган байрамона тадбирлар ҳам нафақат Қорақалпоғистон Республикаси, балки бутун мамлакатимиз халқлари учун миллатлараро тотувлик ва бағрикенглик байрами сифатида умумтаълим мактабларида, давлат ва жамоат ташкилотларида, олий таълим муассасаларида тантанали равишда нишонланмоқда.

Қорақалпоқ тили бу заминда яшовчи ҳар бир инсоннинг фахр-у ифтихори, миллатидан қатъий назар, оилаларда, таълим-тарбия муассасаларида фарзандларимиз севиб ўрганадиган, ушбу тилда мулоқот қилишдан ифтихор ҳиссини туядиган жарангдор тил сифатида қадрлидир. Шу билан бирга бу тил халқимизнинг кўрки, зийнати, қорақалпоқ миллатини дунёга танитувчи бетакрор кўзгусидир.

Бу ҳақда Амударё ихтисослаштирилган мактабида бўлиб ўтган, қорақалпоқ тилига давлат тили мақоми берилганлигининг 36 йиллигига бағишланган “Мартабанг баланд бўлсин, она тилим!” мавзусидаги байрам тадбирида мактаб ўқувчи-ёшлари, уларнинг устозлари ифтихор билан сўз юритдилар.

Тантанали байрам тадбирининг аввалида мазкур мактаб ўқувчилари қорақалпоқ тилининг тарихи, шаклланиш жараёнлари ва қардош халқлар орасидаги нуфузи хусусида маърузалар ўқидилар. Шунингдек, мактабнинг қорақалпоқ тили ва адабиёт тўгараги аъзолари қорақалпоқ халқ оғзаки ижоди намуналари, мақол ва маталлар асосида сўз ўйинлари ташкил этишиб, қорақалпоқ мумтоз ва ҳозирги замон адабиётининг таниқли намояндалари ижодларига мансуб асарлардан парчалар ва шеърларни ифодали ўқиб бердилар.

Тадбирнинг адабий қисми қизиқарли таассуротларга бой бўлди. Унда мактабнинг бадиий ҳаваскорлик тўгараги аъзолари томонидан кичик саҳна кўринишлари намойиш этилиб, унда қорақалпоқ тилининг ўзига хос жилвалари, сўз бойлиги, миллий-маънавий жиҳатдан тарбиявий аҳамияти маҳорат билан очиб берилди. Саҳна кўринишлари орқали ҳалоллик, тўғрисўзлик, халқпарварлик, она Ватанга чексиз меҳр-муҳаббат туйғуларига устуворлик берилгани тадбир иштирокчиларининг олқишларига сазовор бўлди.

“Мартабанг баланд бўлсин, она тилим!” мавзусидаги маънавий-маърифий ва адабий-мусиқий тадбирнинг мусиқий қисми барчага кўтаринки кайфият бағишлади. Унда Амударё тумани Маданият бўлими санъаткорлари томонидан махсус тайёрланган “Куйларимга жаранг берган она тилим!” деб номланган концерт дастури намойиш этилди. Амударё туманининг иқтидорли санъаткорлари томонидан маҳорат билан ижро этилган қорақалпоқ куй ва қўшиқлари, жозибадор рақслари байрам тадбирининг янада жўшқин таассуротларга бой ўтишини таъминлади.

РОБИЯ ЙЎЛДОШЕВА.