ИНГЛИЗ ТИЛИНИ ЎҚИТИШ БЎЙИЧА 36-СОНЛИ ТАЯНЧ МАКТАБИДА ХОРИЖИЙ МУТАХАССИС ЎЗ ФАОЛИЯТИНИ БОШЛАДИ
Бугунги глобаллашув даври барча соҳа мутахассисларидан ўз она тилидан ташқари, дунё халқлари учун ўзаро мулоқот тили сифатидаги бир ёки бир неча хорижий тилларни билишни талаб этади. Чунки тил билиш нафақат шахснинг камолотида, балки мамлакат тараққиётида ҳам муҳим аҳамиятга эга.
Мамлакатимизда бу борадаги ишларни юқори босқичга кўтариш мақсадида Президентимиз томонидан 2021 йил 19 майда қабул қилинган "Ўзбекистон Республикасида хорижий тилларни ўрганишни оммалаштириш фаолиятини сифат жиҳатидан янги босқичга олиб чиқиш чора-тадбирлари тўғрисида"ги Қарорида кенг кўламли вазифалар белгилаб берилди.
Мазкур Қарор билан Ўзбекистон Республикаси Вазирлар Маҳкамаси ҳузурида Хорижий тилларни ўрганишни оммалаштириш Агентлиги ташкил этилди. Айни пайтда ушбу Агентлик томонидан мамлакатимизнинг энг чекка ҳудудларидаги таълим-тарбия муассасаларида хорижий тилларни ўқувчиларга мукаммал ўргатиш, чет тиллари бўйича фан ўқитувчиларининг касбий маҳоратларини оширишга қаратилган амалий ишлар самарали йўлга қўйилиб, соҳага хорижий давлатлардан малакали мутахассисларни жалб қилган ҳолда иш олиб борилмоқда.
Жорий йилнинг 5 декабрь санасида Президент Фармон ва Қарорларида белгиланган вазифалар ижросини таъминлаш мақсадида Амударё туманидаги 36-сонли инглиз тили фанини ўқитиш бўйича таянч мактабида инглиз тилини ўрганишни самарали ташкил этиш мақсадида ушбу фан бўйича тажрибали хорижий мутахассис шартнома асосида ўз фаолиятини бошлади.
Касби юқори малакали инглиз тили фани ўқитувчиси бўлган 39 ёшли Эммануэл Панога Санчез Филиппин давлатида туғилган. Ўзбекистонга келишидан аввал Вьетнамда фаолият олиб борган.
Меҳмонни туман таълим тизими масъуллари ва мактаб ўқитувчилари ҳамда ўқувчилари эҳтиром билан кутиб олдилар. Сўнгра у тумандаги 56-сонли мактабнинг инглиз тили ўқитувчиси томонидан ташкил этилган тажриба алмашув соатида иштирок этиб, ўз фикрларини билдирди. Эммануэл Санчез 36-сонли мактабда 1 йил давомида фаолият юритади. У мактаб ўқувчиларига ҳафтасига 20 соат дарс ўтади ва 6 соат тўгарак машғулотларини ўтказади.
Хорижий мутахассис томонидан тумандаги инглиз тили ўқитувчиларининг малакасини ошириш учун махсус тизим йўлга қўйилган. Амударё тумани Мактабгача ва мактаб таълими бўлими тасарруфидаги 86 та мактабларнинг ҳар биридан 1 нафар, жами 86 нафар инглиз тили ўқитувчилари учун ҳар ойнинг иккинчи ҳафтасидаги жума кунлари "Касбий ривожланиш куни" доирасида 2 соатлик маҳорат дарсларини олиб боради.
Хорижий мутахассиснинг маҳорат дарслари орқали амалий кўникмаларга эга бўлган 86 нафар инглиз тили ўқитувчилари эса ойига 4 марта, ҳар ҳафтанинг жума куни ўзлари фаолият олиб борувчи умумтаълим мактабларининг инглиз тили ўқитувчилари учун тажриба алмашув асосида маҳорат дарсларини ўтказадилар.
Таълим тизимида амалга оширилаётган бу каби ишлар ёш авлоднинг хорижий тилларини мукаммал ўрганишлари билан бирга хорижий тиллар ўқитувчиларининг касбий маҳоратини ошириш, ривожланган давлатларнинг таълим тизимига оид инновацион ғояларини самарали ўзлаштириш ва амалиётга кенг жорий этиш имконини беради.
РОБИЯ ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
