59-сонли мактабнинг янги биноси: ёшлар учун замонавий имкониятлар ва инклюзив таълим муҳити
Сўнгги йилларда мамлакатимизда таълим тизимини тубдан ислоҳ қилиш, ўсиб келаётган ёш авлодга сифатли таълим-тарбия бериш ҳамда уларнинг ҳар томонлама баркамол шахс бўлиб вояга етиши учун зарур шарт-шароитларни яратиш давлат сиёсатининг энг устувор йўналишларидан бирига айланди. Ушбу эзгу ишларнинг амалий ифодаси сифатида Амударё тумани Мактабгача ва мактаб таълими бўлимига қарашли Чойкўл овули ҳудудида жойлашган 59-сонли умумий ўрта таълим мактабининг янги биноси фойдаланишга топширилди.
Очилиш маросимида туман ҳокимининг биринчи ўринбосари Фахриддин Юсупов, туман Мактабгача ва мактаб таълими бўлими бошлиғи Ялғаш Шомуродов, таълим соҳаси фаоллари, мактаб жамоаси ва маҳалла аҳли вакиллари иштирок этди.
Давлатимиз томонидан таълим соҳаси инфратузилмасини яхшилаш мақсадида ажратилган маблағлар доирасида пудратчи ташкилот — “Амударё хизмат кўрсатиш маркази” МЧЖ томонидан кенг кўламли қурилиш-таъмирлаш ишлари олиб борилди. Мазкур йирик лойиҳани амалга ошириш учун давлат томонидан жами 4 млрд. 687 млн. сўм маблағ йўналтирилди. Натижада 180 ўқувчи ўрнига мўлжалланган қўшимча ўқув биноси ҳамда ўқувчиларнинг жисмоний чиниқиши, соғлом турмуш тарзини шакллантириши учун хизмат қиладиган 12×24 метр ўлчамдаги замонавий спорт зали биноси сифатли қурилиб, фойдаланишга топширилди.
Бино 2 қаватдан иборат бўлиб, махсус лифт билан таъминланган. Бу мамлакатимизда инклюзив таълимни ривожлантириш, алоҳида таълим эҳтиёжлари бўлган ва жисмоний имконияти чекланган болаларнинг бошқа тенгдошлари қаторида ҳеч қандай тўсиқларсиз, тенг ҳуқуқли асосда таълим олишларини таъминлашга қаратилган юксак эътиборнинг яққол намунасидир.
Таълим жараёни самарадорлигини белгиловчи муҳим омиллардан яна бири — бу ўқув биносидаги микроиқлим ва қулайликдир. Шу боисдан, бинонинг иситиш тизимига илғор, инновацион технологиялар жалб қилинган. Хусусан, янги бинони иситиш тизими замонавий chiller–fankoil ускуналари асосида ташкил этилган. Ушбу марказлашган ва юқори технологик тизим хоналарда нафақат қиш мавсумида иссиқликни, балки йил давомида меъёрий ҳароратни барқарор сақлаш имконини беради. Шунингдек, иситиш радиаторлари термостатик ҳарорат созлагичлари билан жиҳозланган, ҳар бир хонада ҳароратни алоҳида тартибга солиш имконияти мавжуд.
Таълим муассасасида бугунги кунда 155 нафар ўқувчи таълим-тарбия олиб келмоқда. Уларга ўз касбининг фидойиси бўлган, замонавий педагогик технологияларни ўзлаштирган 28 нафар малакали педагог илм-фан сирларини ўргатмоқда. Янги ўқув биносининг фойдаланишга топширилиши педагогларга ҳар бир ўқувчи билан индивидуал ишлашиш, уларнинг иқтидорини эрта аниқлаш ва рўёбга чиқариш учун кенг имкониятлар яратади.
Чойкўл овули ҳудудида бунёд этилган 59-сонли мактабнинг мазкур қўшимча ўқув биноси ва спорт мажмуаси нафақат мактаб ўқувчилари ва педагоглар жамоаси, балки маҳалла аҳолиси учун ҳам муҳим ижтимоий объектлардан бирига айланди.
Ёшларимизнинг бундай замонавий, шинам, хавфсиз ва барча қулайликларга, шу жумладан инклюзив таълим воситаларига эга масканларда таълим-тарбия олиши, келажакда юртимиз равнақига ўзининг муносиб ҳиссасини қўшадиган, юксак маънавиятли, чуқур билимли ва жисмонан баркамол кадрлар бўлиб етишиб чиқишининг мустаҳкам кафолати бўлиб хизмат қилади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
