Бутунжаҳон меҳнат муҳофазаси куни муносабати билан ўқув семинари ўтказилди

Ҳар бир фуқаронинг муносиб ва барча хавфлардан холи бўлган шароитларда меҳнат қилиши, ўз касбий фаолиятини хотиржамлик ҳамда юқори унумдорлик билан амалга ошириши нафақат унинг шахсий ва оилавий фаровонлиги, балки бутун мамлакатнинг барқарор иқтисодий ўсиши ҳамда ижтимоий тараққиётининг асосий гаровидир. Шу сабабли ҳам турли соҳаларда меҳнат қилаётган ишчи-ходимларнинг меҳнат муҳофазасини таъминлаш, ишлаб чиқариш жараёнидаги турли бахтсиз ҳодисалар ва касб касалликларининг олдини олиш энг долзарб вазифаларидан бирига айланган. Дунё миқёсида ҳар йили 28 апрель санасининг "Бутунжаҳон меҳнат муҳофазаси куни" сифатида нишонланиши ҳам бежиз эмас, албатта. Бу кун дунё бўйлаб йирик корпорациялардан тортиб кичик корхоналаргача бўлган барча тузилмаларнинг эътиборини иш жойларида соғлом ва хавфсиз муҳитни яратишга, меҳнат хавфсизлиги қоидаларига қатъий амал қилишга қаратиш учун берилган муҳим имкониятдир.

Амударё туманида ҳам ушбу муҳим санага бағишланган тадбир ўтказилди. Туман Маданият бўлимининг мажлислар залида "Хавфсиз меҳнат асослари" мавзусида ташкил этилган ўқув семинарининг кириш қисмида Ўзбекистон касаба уюшмалари Федерацияси раиси ўринбосари, Қорақалпоғистон кенгаши раиси Улуғбек Жалменов сўзга чиқиб, "Меҳнатни муҳофаза қилишнинг янги босқичи" мавзусида маъруза қилди. У ўз нутқида бугунги кунда меҳнат қонунчилиги ва хавфсизлиги борасида давлатимиз томонидан амалга оширилаётган кенг кўламли ислоҳотлар, ходимларнинг ҳуқуқ ва қонуний манфаатларини ҳимоя қилишда касаба уюшмаларининг роли ҳақида атрофлича тўхталиб ўтди.

Шундан сўнг, Қорақалпоғистон Республикаси Камбағалликни қисқартириш ва бандлик вазирлигининг Давлат меҳнат инспекцияси инспектори Маманбий Сейдуллаев сўзга чиқиб, "Меҳнатни муҳофаза қилиш бўйича ишларни ташкил этиш" мавзусида батафсил сўз юритди. У ўз нутқида ҳар бир корхона ва ташкилотда хавфсизлик тизимини қандай қилиб ҳуқуқий ва техник жиҳатдан тўғри, энг асосийси, самарали йўлга қўйиш, иш жойларидаги эҳтимолий хавф-хатарларни олдиндан баҳолаш ва уларни зудлик билан бартараф этишнинг замонавий усуллари ҳақида йиғилганларга зарур маълумотларни тақдим этди.

Бундан ташқари, ўқув семинари давомида ташкилотларда бевосита мазкур йўналишга масъул бўлган шахсларнинг қонуний мақоми, вазифалари ва масъулияти ҳам кенг муҳокама қилинди. Ўзбекистон касаба уюшмалари Федерациясининг Қорақалпоғистон кенгаши Меҳнат техник инспектори Бекполат Утепбергенов йиғилганлар эътиборига "Меҳнатни муҳофаза қилиш бўйича мутахассис ва вакил тўғрисида тушунчалар" мавзусида сўзга чиқиб, бу борадаги саволларга тўлиқ жавоб берди.

Семинарда Қорақалпоғистон Республикаси Камбағалликни қисқартириш ва бандлик вазирлигининг Давлат меҳнат инспекцияси инспектори Раҳмон Шомуратов "Меҳнат ва меҳнат қонунчилигига доир масалалар" тўғрисида сўз юритар экан, ходимлар билан иш берувчилар ўртасидаги меҳнатга оид муносабатларни ҳуқуқий жиҳатдан тўғри ва адолатли шакллантириш, тузилаётган меҳнат шартномаларининг бандларига ҳар икки томондан қатъий риоя этиш ҳамда иш вақти ва дам олиш вақтларини қонун доирасида аниқ белгилаш каби жиҳатларни содда ва тушунарли тарзда баён этди.

Тадбирда, шунингдек, ўзига хос, мураккаб ва соғлиқ учун хавф туғдириши мумкин бўлган шароитларда меҳнат қилаётган фуқароларни ижтимоий ва ҳуқуқий қўллаб-қувватлаш масаласи ҳам муҳокамалар марказида бўлди. Ўзбекистон соғлиқни сақлаш ходимлари касаба уюшмаси Республика Кенгашининг Қорақалпоғистон Республикаси бўйича техник инспектори Полат Абдиязов "Зарарли ва хавфли иш шароитида ишловчи ходимларга яратилган имтиёзлар" тўғрисида маълумотлр бериб ўтди.

Семинарнинг якуний қисми ўзаро эркин мулоқот, қизғин фикр алмашинув ва очиқ савол-жавоблар руҳида ўтди. Йиғилиш иштирокчилари, жумладан, ташкилот раҳбарлари ва меҳнат муҳофазаси вакиллари ўзларининг кундалик иш фаолиятида, ишлаб чиқариш жараёнларида бевосита дуч келаётган турли муаммоли вазиятлар, ечимини кутаётган мураккаб масалалар ҳамда ўзларини қизиқтирган барча ҳуқуқий ва техник саволлар билан соҳа мутахассисларига мурожаат қилдилар. Соҳанинг ҳақиқий билимдонлари бўлган инспектор ва раҳбарлар эса ҳар бир берилган мурожаатга аниқ ва асосли жавоблар қайтардилар.

Бу каби маърифий тадбирлар меҳнат муҳофазаси йўналишидаги билим ва кўникмаларни янада мустаҳкамлашга, жамиятда меҳнат маданиятини юксалтиришга ва энг асосийси, ҳар бир иш жойида инсон ҳаёти ҳамда соғлиғини ишончли асрашдек эзгу ва улуғвор мақсадга хизмат қилиши шубҳасиздир.