Ватанпарварлик руҳидаги тарбиянинг муносиб эътирофи
Келажак бунёдкорларини мардлик ва жасорат руҳида тарбиялаётган фидойи устозларнинг меҳнати ҳар доим ҳам юксак эътироф этиб келинади. Туманимиздаги 17-сонли умумтаълим мактабида фаолият юритаётган ёш ва ғайратли педагоглардан бири Асадбек Қурбонбоев ҳам ана шундай масъулиятли касб эгаларидан ҳисобланади.
2000 йилда Холимбег овулида таваллуд топган Асадбек Қурбонбоев ўз ҳаётини бевосита ёшлар тарбиясига бағишлашга қарор қилган фидойилардан биридир. У 2026 йилнинг январь ойидан бошлаб мазкур 17-сонли мактабда Чақириққа қадар бошланғич тайёргарлик раҳбари лавозимида иш бошлаб, қисқа вақт ичида ўқувчилар ўртасида ҳарбий билимларни оммалаштириш ва уларнинг жисмоний тайёргарлигини оширишда сезиларли натижаларга эришди.
Унинг тинимсиз изланишлари ва педагоглик маҳорати туфайли мактаб ўқувчилари турли ҳарбий-спорт мусобақаларида юқори кўрсаткичларни қайд этиб келмоқда. Жумладан, яқинда бўлиб ўтган "Ёш чегарачилар" ҳарбий-спорт мусобақасида Асадбек Қурбонбоев бошчилигида тайёргарлик кўрган ўқувчилар жамоаси Амударё тумани босқичида фахрли 1-ўринни эгаллашга муваффақ бўлди. Бу муваффақиятли одимнинг мантиқий давоми сифатида, 29 апрель куни ўтказилган мазкур мусобақанинг Қорақалпоғистон Республикаси босқичида ҳам "Сарҳад" жамоаси муносиб иштирок этиб, фахрли 2-ўринни қўлга киритди. Бундай юқори натижалар, шубҳасиз, ёш раҳбарнинг тўғри танланган ўқув методикаси ва тинимсиз меҳнатининг ёрқин самрасидир.
Асадбекнинг ана шундай фидокорона меҳнатлари ва ёшлар авлодини ҳарбий-ватанпарварлик руҳида тарбиялашга қўшаётган улкан ҳиссаси муносиб эътироф этилиб, мактабда махсус тантанали йиғилиш ташкил этилди.
Мактабнинг бутун жамоаси иштирок этган ушбу маънавий-маърифий тадбирда Ўзбекистон "VETERAN" жангчи-фахрий ва ногиронлари бирлашмаси вакиллари меҳмон бўлишди. Учрашувда бирлашманинг Қорақалпоғистон бўлими Амударё туманидаги вакили Баҳодир Жуманиёзов ҳамда бирлашма фаоллари ва фахрийлари Озод Жуманиёзов ва Шавкат Саидбоевлар иштирок этиб, йиғилганларга ўзларининг дил сўзларини изҳор қилдилар.
Улар ёшларни ватанпарварлик руҳида тарбиялашнинг бугунги кундаги муҳим аҳамияти ҳақида тўхталиб ўтиб, мактабнинг Чақириққа қадар бошланғич тайёргарлик раҳбари Асадбек Қурбонбоевни нуфузли мукофот билан тақдирладилар. Ёш мутахассисга унинг машаққатли меҳнатларининг муносиб эътирофи сифатида «Ёшларни ватанпарварлик руҳида тарбиялаш учун» медали ва махсус гувоҳномаси тантанали равишда топширилди.
Ушбу эътироф ва юксак мукофот нафақат биргина ўқитувчининг, балки бутун мактаб жамоасининг улкан ютуғи бўлиб, келгусида ёшларни янада баркамол, жисмонан соғлом ва маънан етук этиб тарбиялаш йўлида янги куч ҳамда илҳом бағишлаши шубҳасиз.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
