Хавфсиз маҳалла — жамият тараққиёти ва фаровон ҳаёт кафолати
Амударё туманида Қорақалпоғистон Республикаси прокурорининг биринчи ўринбосари Ойбек Шамуратов бошчилигида Давлат раҳбарининг 2026 йил 5 январдаги “Республика маҳаллаларида хавфсиз муҳитни яратиш йўналишида яхлит манзилли ишлаш тизимини жорий этишга қаратилган қўшимча чора-тадбирлар тўғрисида”ги 1-сонли ва “2026 йилда Республика маҳаллаларида жиноятчиликнинг барвақт профилактикаси самарадорлигини янада ошириш бўйича ташкилий чора-тадбирлар тўғрисида”ги 2-сонли қарорлари ижроси юзасидан амалга оширилаётган ишлар танқидий-таҳлилий руҳда муҳокама қилинди.
Мазкур йиғилишда туман ҳокими Собир Хўжаметов, ҳоким ўринбосарлари, тегишли идора ва ташкилотлар мутасаддилари, маҳалла “еттилиги” вакиллари, жамоатчилик фаоллари ҳамда оммавий ахборот воситалари ходимлари иштирок этди.
Йиғилиш аввалида сўз олган Ойбек Шамуратов мамлакатимизда тинчлик-осойишталикни мустаҳкамлаш, аҳоли хавфсизлигини таъминлаш, жиноятчилик ва ҳуқуқбузарликларнинг олдини олиш борасида Президентимиз томонидан қабул қилинаётган қарор ва фармонлар бугунги кунда муҳим дастуруламал бўлиб хизмат қилаётганини алоҳида таъкидлади.
Дарҳақиқат, жамият тараққиёти, халқ фаровонлиги ва эртанги кун барқарорлиги, аввало, тинч ва хавфсиз муҳит билан чамбарчас боғлиқдир. Қаерда осойишталик ҳукм сурса, ўша ерда бунёдкорлик бўлади, инвестициялар кириб келади, тадбиркорлик ривожланади, ёшларнинг илм олиш ва касб эгаллашга бўлган интилиши кучаяди. Шу боис жиноятчилик ва ҳуқуқбузарликларнинг олдини олиш масаласи нафақат ҳуқуқни муҳофаза қилувчи органларнинг, балки бутун жамиятнинг устувор вазифасига айланиши зарур.
Бугунги кунда “Обод ва хавфсиз маҳалла” тамойили асосида олиб борилаётган ислоҳотлар инсон қадри ва манфаатларини таъминлашга хизмат қилмоқда. Маҳалла тизимининг кучайтирилаётгани, “маҳалла еттилиги” фаолиятининг йўлга қўйилгани, профилактик ишларнинг манзилли ташкил этилаётгани — буларнинг барчаси жиноят илдизига барҳам бериш, унинг оқибатлари билан эмас, сабаб ва омиллари билан курашишга қаратилгани билан аҳамиятлидир.
Йиғилиш давомида туманда амалга оширилаётган ижтимоий профилактика тадбирларида ҳамда “йўл харита”лари ижросида хато ва камчиликларга йўл қўйилаётгани танқид қилинди. Жумладан, “намунали хавфсиз кўча” ва “намунали хавфсиз йўлак”ларни ташкил этишда сусткашлик кузатилаётгани, масъул идоралар ҳамда маҳалла еттилиги ўртасида ҳамкорлик ва тизимли ишлаш етарли даражада йўлга қўйилмагани қайд этилди.
Таъкидланганидек, жиноятчиликка қарши кураш фақат содир этилган ҳуқуқбузарликларни фош этиш билангина чекланиб қолмаслиги керак. Энг муҳими — жиноятга олиб келаётган омилларни ўз вақтида аниқлаш, ижтимоий муаммоларни бартараф этиш, ёшлар бандлигини таъминлаш, оилаларда соғлом маънавий муҳитни шакллантириш ва аҳоли билан манзилли ишлашдир. Зеро, биргина жиноятнинг олди олиниши — бир оиланинг кўз ёшдан, бир ёшнинг эса нотўғри йўлдан қайтиши деганидир.
Мутасаддиларга ижтимоий профилактика тадбирларини самарали ташкил этиш, “йўл харита”лари ижросини қатъий назоратга олиш, жиноятларнинг сабаб ва шарт-шароитларини чуқур ўрганиб, уларни барвақт бартараф этиш юзасидан аниқ вазифалар белгилаб берилди.
Йиғилиш якунида маҳаллаларда хавфсиз муҳитни яратиш, фуқароларнинг ҳуқуқий онги ва маданиятини ошириш, айниқса ёшлар ўртасида ҳуқуқбузарликларнинг олдини олиш бўйича барча масъуллар бир ёқадан бош чиқариб ишлаши лозимлиги таъкидланди.
Зеро, тинч ва хавфсиз маҳалла — тараққиёт пойдевори, халқ фаровонлиги ва жамият барқарорлигининг энг муҳим кафолатидир.
Чарос Арслонова, туман ҳокимлигининг Ахборот хизмати раҳбари.
