Оила — жамиятнинг мустаҳкам таянчи, инсон камолотининг бебаҳо маскани

15 май — Халқаро оила куни муносабати билан Амударё туманида тантанали байрам тадбири бўлиб ўтди. Ушбу қутлуғ сана нафақат оиланинг жамият ҳаётидаги ўрнини мустаҳкамлаш, балки меҳр-оқибат, садоқат ва миллий қадриятларимиз улуғланган айёмга айланди.

Тадбирда туман нуронийлари, узоқ йиллар давомида аҳил ва намунали ҳаёт кечириб келаётган ибратли оилалар, маҳалла фаоллари, хотин-қизлар, ёшлар ҳамда кенг жамоатчилик вакиллари иштирок этди. Байрам давомида оилавий қадриятларни асраш, фарзанд тарбиясида ота-она масъулияти, маҳаллаларда соғлом маънавий муҳитни шакллантириш каби масалалар хусусида самимий суҳбатлар бўлиб ўтди.

Тадбирни Амударё тумани ҳокимининг биринчи ўринбосари Фаҳриддин Юсупов очиб берди. У ўз нутқида оила инсон ҳаётидаги энг муқаддас маскан, жамиятнинг энг мустаҳкам бўғини эканини алоҳида таъкидлади. Зеро, инсоннинг маънавий қиёфаси, ҳаётга бўлган муносабати, ватанпарварлик туйғуси аввало оилада шаклланади. Меҳр-муҳаббат, ҳурмат, оқибат ва тарбия ҳукм сурган хонадонда улғайган фарзанд эса келажакда жамиятнинг муносиб вакили бўлиб вояга етади.

Таъкидланганидек, оила — бу ижтимоий барқарорликнинг энг муҳим кафолатидир. Мустаҳкам оилаларда улғайган фарзандлар ҳаётда ўз йўлини топган, мақсадли, билимли, ватанпарвар ва маънавий баркамол инсонлар бўлиб вояга етади. Бундай ёшлар эса жамиятнинг илмий, иқтисодий ва маънавий тараққиётига муносиб ҳисса қўшади. Чунки ҳар қандай буюк жамиятнинг илдизи аввало соғлом ва аҳил оилаларга бориб тақалади.

Байрам тадбири Ўзбекистон Республикаси Вазирлар Маҳкамасининг 2023 йил 2 сентябрдаги 437-сонли қарорига мувофиқ таъсис этилган “Ибратли оила” кўкрак нишонини топшириш маросими билан давом этди. Амударё туманидан муносиб деб топилган 9 та намунали оилага мукофотлар тантанали равишда топширилди.

Мазкур оилалар узоқ йиллик аҳил турмуши, фарзанд тарбиясидаги ибратли фаолияти, маҳалладаги фаоллиги, қўни-қўшничилик муносабатларидаги самимийлиги ҳамда ёш оилаларга намуна бўлиб келаётгани билан алоҳида эътироф этилди. Уларга кўкрак нишонлари билан бирга эсдалик совғалари топширилиб, жамият равнақига қўшаётган ҳиссаси учун миннатдорлик билдирилди.

Бугунги кунда мамлакатимизда оилани қўллаб-қувватлаш, хотин-қизлар ва ёшларнинг ҳуқуқ ҳамда манфаатларини ҳимоя қилиш, соғлом ва мустаҳкам оилаларни шакллантириш давлат сиёсатининг устувор йўналишларидан бирига айланган. Айниқса, ёш оилаларни қўллаб-қувватлаш, фарзанд тарбиясида ота-оналарнинг масъулиятини ошириш, оилаларда маънавий муҳитни мустаҳкамлаш борасида кенг кўламли ишлар амалга оширилмоқда.

Оила институтини янада мустаҳкамлашга қаратилган қонунлар, ижтимоий дастурлар, маданий-маърифий тадбирлар, тарғибот ва учрашувлар жамият тараққиёти, юрт тинчлиги ҳамда халқ фаровонлигини таъминлашга хизмат қилмоқда. Чунки мустаҳкам оила — тинч ва фаровон жамиятнинг таянчидир. Оиладаги аҳиллик ва тотувлик маҳалла осойишталигини, маҳалла осойишталиги эса юрт тараққиётини таъминлайди.

Дарҳақиқат, оилани мустаҳкам қиладиган энг катта куч — бу ўзаро ҳурмат, ишонч ва меҳрдир. Меҳрга асосланган хонадонда тарбия топган фарзанднинг қалбида Ватанга муҳаббат, катталарга ҳурмат, кичикларга иззат туйғуси камол топади. Шу боис ҳам “Оила тинч — юрт тинч” деган ҳикмат бугун ҳам ўз аҳамиятини йўқотмаган.

Тадбир давомида янграган куй-қўшиқлар, ижро этилган дилбар рақслар ва маданий чиқишлар байрамга янада файз ва кўтаринки руҳ бағишлади. Айниқса, оилавий қадриятларни мадҳ этувчи саҳна кўринишлари йиғилганларда илиқ таассурот қолдирди.

Халқаро оила куни муносабати билан ташкил этилган ушбу тадбир барчага бир ҳақиқатни яна бир бор эслатди: оила — инсоннинг энг катта бойлиги, ҳаётининг суянчи ва келажак пойдеворидир. Жамият тараққиёти, юрт тинчлиги ва миллат равнақи ҳам аввало соғлом, маънавий баркамол ва аҳил оилалардан бошланади. Шундай экан, оиладаги меҳр-оқибатни асраш, фарзандларни миллий ва умуминсоний қадриятлар руҳида тарбиялаш ҳар биримизнинг шарафли ва муқаддас бурчимиздир.

Чарос Арслонова, туман ҳокимлигининг Ахборот хизмати раҳбари.