«Инсон» ижтимоий хизматлар маркази фаолияти Олмазор маҳалласидаги амалий ишлар ва эришилган натижалар мисолида

Давлатимиз раҳбарининг 2023 йил 6 июндаги фармони асосида Ўзбекистон Республикаси Президенти ҳузуридаги Ижтимоий ҳимоя миллий агентлигининг ташкил этилиши жойларда аҳолини ижтимоий ҳимоя қилиш соҳасида ягона ва самарали давлат сиёсатини юритиш имконини яратди. Ушбу тизимнинг қуйи бўғини сифатида ҳудудларда ташкил этилган “Инсон” ижтимоий хизматлар марказлари бугунги кунда том маънода халқ дардига малҳам бўлмоқда.

Бу тизимнинг йўлга қўйилиши одамлар ҳаётида қандай ижобий ўзгаришлар яратганини Амударё туманидаги Олмазор маҳалла фуқаролар йиғини мисолида ҳам яққол кўриш мумкин. 2024 йилнинг сентябрь ойидан бошлаб мазкур маҳаллада “Инсон” ижтимоий хизматлар марказининг ижтимоий ходими сифатида ўз фаолиятини бошлаган Шарофат Қурбониёзова қисқа вақт ичида кўплаб хайрли ишларни амалга оширишга муваффақ бўлди.

Бугунги кунда Олмазор маҳалласида жами 664 та хонадон мавжуд бўлиб, уларда 1114 та оила ва 3244 нафар аҳоли истиқомат қилиб келмоқда. Ижтимоий ходимнинг асосий вазифаси мана шу катта ҳудудда яшовчи ҳар бир фуқаронинг, айниқса, кўмакка муҳтож инсонларнинг муаммоларини ўрганиш ва уларга амалий ёрдам кўрсатишдан иборатдир.

Маҳаллада 150 нафар ногиронлиги бўлган шахслар рўйхатга олинган бўлиб, 87 та оила ижтимоий реестрга киритилган. Ушбу реестрдаги оилаларнинг 18 таси бевосита давлат таъминотига олинган бўлса, яна 6 та оила камбағаллик чегарасида кун кечирмоқда. Бундан ташқари, ҳудудда тазйиқ ва зўравонликка учраган 7 нафар хотин-қизлар ҳамда васийлик ва ҳомийликка олинган 15 нафар вояга етмаган болалар истиқомат қилади.

Ижтимоий ходим томонидан мазкур оилалар ва шахслар билан манзилли ишлаш тизимли равишда йўлга қўйилган. Жумладан, яқиндагина ижтимоий ходим фуқаролар йиғинлари масъуллари ҳамроҳлигида 1-гуруҳ ногиронлиги бўлган фуқаролар — Сарвиноз Артиқбаева, Норгул Тажибоева ва Шохида Куклановаларнинг хонадонларига ташриф буюриб, уларнинг яшаш шароитлари, соғлиғи ва кундалик аҳволидан хабар олди.

Жорий йил бошидан буён бир қатор ногиронлиги бўлган шахсларга ногиронлик аравачалари, қўлтиқтаёқлар, ҳассалар, эшитиш мосламалари каби турли хил протез-ортопедия буюмлари ва реабилитация техник воситалари етказиб берилди. Айниқса, ногиронлиги бўлган 1 нафар ёш болага замонавий қўл протезининг тақдим этилиши, нафақат ўша гўдакнинг, балки бутун оиланинг ҳаётига қувонч олиб кирди.

“Фаол ҳаётга қадам” дастури доирасида 3 та 1-гуруҳ ногиронлиги бўлган шахслар кундузги қатнов асосида қараб туриш хизматига жалб қилинган ва бунинг натижасида мазкур оилаларнинг жамиятга ижтимоийлашуви таъминланмоқда. Ёш авлод тарбияси ва уларнинг таълим олиши учун тенг имкониятлар яратиш мақсадида маҳаллада “Илк ривожланиш маркази” ўз фаолиятини бошлади. Бу марказ мактабгача таълим тизимига қамраб олинмаган болаларни, айниқса, ижтимоий ҳимояга муҳтож, эҳтиёжманд оилалар фарзандларини бепул таълимга жалб қилишдек эзгу мақсадга хизмат қилмоқда.

Жорий йилги Рамазон ойида Олмазор маҳалласидаги давлат таъминотидаги 21 та оиланинг ҳар бирига 1 млн. сўмдан, 41 та камбағал оиланинг ҳар бирига эса 500 минг сўмдан давлатимиз томонидан бир марталик моддий ёрдам маблағлари ажратилди. Шунингдек, 2 та оиланинг коммунал тўловлардан бўлган қарздорликлари тўлиқ қоплаб берилди. 13 та оилага кундалик озиқ-овқат харажатларини қоплаш бўйича махсус ваучерлар берилди. Яна битта оилага фарзандининг саломатлигини тиклаш учун даволаниш харажатларини қоплашга, шунингдек, бошқа бир оилага эса зарур кийим-кечак харажатларини қоплаш учун ваучерлар ажратилди.

Маҳалладаги таълимга тортилмаган 2 нафар ногиронлиги бўлган мактаб ёшидаги бола умумтаълим мактабларида ташкил қилинган инклюзив синфларга жалб этилди. Бундан ташқари, Вазирлар Маҳкамасининг тегишли қарорига мувофиқ, 3 ёшдан 18 ёшгача бўлган ногиронлиги бўлган болалар учун кундузги парвариш хизмати Амударё туманида ҳам ташкил қилинган бўлиб, ушбу хизматга маҳалладан 1 нафар ногиронлиги бўлган бола жалб этилди.

Маҳаллада истиқомат қилувчи тазйиқ ва зўравонликдан жабрланган 7 нафар аёл-қизларга ҳам маҳалланинг хотин-қизлар фаоли ҳамда “Инсон” ижтимоий хизматлар маркази психологлари ҳамкорлигида зарур психологик маслаҳатлар берилиб, оилалардаги нотинчликларга барҳам беришга яқиндан кўмаклашилмоқда.

Хулоса ўрнида таъкидлаш жоизки, давлатимиз томонидан жорий этилган ижтимоий хизматлар тизими бугун ўзининг ёрқин ва ижобий самарасини бермоқда. Амударё туманидаги Олмазор маҳалласида олиб борилаётган бу каби кенг кўламли, манзилли ва инсонпарварлик тамойилларига асосланган ишлар шунчаки қоғоздаги ҳисоботлар эмас, балки минглаб инсонларнинг ҳаётини яхши томонга ўзгартираётган, уларнинг эртанги кунга бўлган ишончини мустаҳкамлаётган ҳаётий ҳақиқатдир.