Электр тармоқлари филиалида коррупцияга қарши курашиш масалалари муҳокама этилди

Жамиятда қонун устуворлигини таъминлаш, давлат ва хўжалик бошқаруви органлари фаолиятида шаффофликка эришиш, ходимларнинг ҳуқуқий онги ва маданиятини юксалтириш мамлакатимизда амалга оширилаётган ислоҳотларнинг узвий йўналишларидан бири ҳисобланади. Айниқса, аҳолига бевосита хизмат кўрсатувчи тизимларда бу борадаги ишлар доимий эътибор марказида турибди. Зеро, ҳар бир соҳада қонунчилик талабларига оғишмай амал қилиниши жамият тараққиётининг муҳим шартларидан саналади.

Электр энергетикаси тармоғи аҳоли ва тадбиркорлик субъектлари билан кундалик мулоқотда бўладиган соҳа экани инобатга олинса, ушбу тизим ходимларининг ҳалоллиги, интизоми ва касбий одоби нафақат корхона обрўсига, балки истеъмолчиларнинг давлат сиёсатига бўлган ишончига ҳам бевосита таъсир кўрсатиши табиий. Шу боис тизимда ходимлар билан профилактик ишларни мунтазам ташкил этиш, уларнинг ҳуқуқий билимини оширишга қаратилган учрашувлар ўтказиш муҳим аҳамият касб этади.

Шу мақсадда Амударё тумани ҳокимлиги биносида “Ҳудудий электр тармоқлари” акциядорлик жамиятининг Қорақалпоғистон ҳудудий филиали ходимлари иштирокида йиғилиш бўлиб ўтди. Унда коррупцияга қарши муросасиз курашиш, одоб-ахлоқ ва ички меҳнат тартиби қоидаларига риоя этиш масалалари кўриб чиқилди.

Йиғилиш кун тартибига, шунингдек, ходимларнинг ноқонуний хатти-ҳаракатлари юзасидан келиб тушган мурожаатларни ўрганиш ҳамда 2026 йилда содир этилган коррупциявий ҳуқуқбузарликлар таҳлили киритилиб, ҳар бир масала бўйича атрофлича фикр алмашилди.

Тадбир “Ҳудудий электр тармоқлари” акциядорлик жамиятининг Қорақалпоғистон ҳудудий филиали Коррупцияга қарши курашиш ва комплаенс назорат бўлими бошлиғи раислигида ўтказилди. Йиғилиш аввалида Ўзбекистон Республикаси Президенти томонидан 2026 йилда коррупцияга қарши курашиш бўйича “фавқулодда ҳолат” эълон қилингани алоҳида қайд этилди.

Раислик қилувчи филиалда коррупциянинг олдини олиш, унга нисбатан муросасиз муносабатда бўлиш ҳамда ходимларнинг ҳуқуқий савиясини ошириш бўйича қатор чора-тадбирлар олиб борилаётганига қарамасдан, жамоа орасида ҳуқуқбузарлик ҳолатлари ҳамон учраб келаётганига йиғилганлар эътиборини қаратди. Унинг таъкидлашича, бу каби ҳолатларнинг такрорланиши тизимда олиб борилаётган ишларнинг самарасини пасайтирмоқда.

Шу билан бирга, масъуллар жамият ҳамда тизим таркибидаги корхоналар ходимлари томонидан содир этилган жиноятлар устида тўхталиб, ўтказилаётган тадбирлардан тегишли хулоса чиқарилмаган тақдирда, бундай ҳолатлар оғир оқибатларга олиб келиши мумкинлиги бўйича иштирокчиларни яна бир бор огоҳлантирди. Ушбу масалада ҳар бир ходим шахсан жавобгар экани алоҳида уқтирилди.

Йиғилишда Халқ депутатлари Амударё тумани кенгашининг коррупцияга қарши курашиш ва хавфсизлик масалалари бўйича доимий комиссияси раиси Яхшимурод Аҳмедов ҳам сўзга чиқди. У профилактик чоралар кўрилаётганига қарамасдан, айрим ходимларнинг хатоларидан сабоқ чиқармаслиги юқоридаги каби ҳолатларга сабаб бўлаётганини алоҳида кўрсатиб ўтди.

Мажлис якунида “Ҳудудий электр тармоқлари” акциядорлик жамиятининг Қорақалпоғистон ҳудудий филиали Амударё тумани электр таъминоти корхонаси бошлиғи Жасур Салаев барча ходимларнинг ҳуқуқий онги ва ҳуқуқий маданиятини юксалтириш, жамоада коррупцияга нисбатан муросасиз муносабатни шакллантириш борасида амалга оширилаётган ишлар, тўғри ва ҳалол ишлашнинг аҳамияти ҳақида тўхталиб ўтди.

Белгиланган кун тартибидаги барча масалалар юзасидан билдирилган фикр-мулоҳазалар эшитилиб, улар атрофлича муҳокама қилинган ҳолда, йиғилиш якунида тегишли қарор қабул қилинди.