ИСТИҚЛОЛ ИЛҲОМЛАРИ

Жонажон ўлкам

Тарих саҳфасида номи табаррук,

Жўшқин наволарда куйланган Ватан.

Илм-у ирфонлари шунчалар суюк,

Довруғи дунёни титратган Ўлкам.

Ватанимнинг битта толмас қаноти-

Қорақалпоқ эли обод, фаровон.

Қоратов, Устюртнинг минг синоатин

Ҳайратда кузатиб турибди жаҳон.

Далалар хазина – боғ-бўстон ҳар ён,

Неча достонларга бўлгулик мавзу.

Алпомиш, Барчинлар қайта туғилиб,

Ҳурлик кириб келди Ватанга мангу.

Келинг-ей, юртимга меҳмонга келинг,

Тахиатош нури порлоқ, чароғон.

Аму соҳилларин бир бора кезинг,

Қўр тўкиб турибди Ватан - жонажон!

Турсунбой ЎРОЗИМБЕТОВ,

Хитой қишлоғи.

Ўйнайлик омон-омон

Интилиб нурлар томон,

Кун-кундан яшнар жаҳон.

Истиқлол берган даврон,

Ўйнайлик омон-омон.

Илм-у фан, замин, очун-

Ҳаммаси ёшлар учун.

Йигитлар, қизлар дуркун,

Ўйнайлик омон-омон.

Завқ олиб тинчлик дамдан,

Ўт чақнаб ҳар қадамдан.

Қулф урсин дилда чаман,

Ўйнайлик омон-омон.

Миллатлар қаторимда,

Ҳур-тенглик шиоримда.

Бағри кенг диёримда,

Ўйнайлик омон-омон.

Амалда, тилда, сўзда,

Қиш, баҳор, ёз-у кузда.

Ватанни асраб кўздай,

Ўйнайлик омон-омон.

Турсунбой АБДУЛЛАЕВ.

Ватан мадҳияси

Ҳур Ватанда дўст, ўртоқ,

Қорақалпоқ ва ўзбек.

Аҳил-иноқ яшарлар

Худди бир туғишгандек.

Гуллаган чамандир бу,

Дўстларга Ватандир бу.

Ёш-у қари – ҳар киши,

Яратувчилик иши.

Мард инсоннинг ҳар қачон,

Эл ғами – ғам-ташвиши.

Мурувватга кондир бу,

Яшнаган бўстондир бу.

Ким эдигу, ким бўлдик,

Эркимиз қўлга олдик.

Режалар тузиб буюк,

Келажакка йўл солдик.

Зафардан нишондир бу,

Авлодларга шондир бу.

Қурдик кошона, қасрлар,

Жаҳон лол қолар асрлар.

Унда бизларнинг келажак –

Яшар навқирон насллар.

Шижоат, суръатдир бу,

Бизларнинг қудратдир бу.

Аҳмад НАФАСОВ, "Жайхун илҳомлари” ННТ раиси.

Она юртим

Бепоён қумларинг, бийдай далалар,

Тарихни эслатган кўҳна қалъалар,

"Бадай тўқай”даги кийик болалар,

Барчаси бизники, азиз Ватаним!  

Бошимда порлаган иқбол қуёши,

Қувончдан тўкилган кўзимнинг ёши.

Истиқлолимизнинг йигитлик ёши,

Барчаси бизники, азиз Ватаним!

Интилиб тобора юксалиш томон,

Олға бормоқдамиз, борармиз ҳамон.

Одил Юртбошимиз бўлгай соғ-омон,

Барчаси бизники, азиз Ватаним!

Бу қувонч, бу шодлик барчага аён,

Минг йиллар бўлгай-да шундайин айём.

Фарҳод дер: бугунги Мустақил байрам,

Мангу қутлуғ бўлсин, азиз Ватаним!

Фарҳод АВЕЗОВ,

Хитой қишлоғи.

ВАТАН

Эй, менинг жаннатмакон Ўзбекистоним,

Тўрт фасл мужассам азиз бўстоним.

Мозий ва бугунда тилда достоним -

Буюк ва муқаддассан, мустақил Ватан!

Бугуни ва келажаги буюксан ўзинг,

Халқимнинг юрагида суюксан ўзинг.

Томирда қоним-у кўрарга кўзим -

Буюк ва муқаддассан, мустақил Ватан!

Бағрингга ярашар гуллаган боғлар,

Худди ғурурингдек баланддир тоғлар.

Истиқлол фарзандлари кўнглингни чоғлар,

Буюк ва муқаддассан, мустақил Ватан!

Ҳар ютуғингга қиларман таъзим,

Ҳар кунинг байрам-у бўлгай тўй-базм.

Шукурларим кўпдир, Оллоҳга розим,

Буюк ва муқаддассан мустақил Ватан!

Баҳодир ЖУМАМУРОДОВ,

42-сонли мактаб директори.

Ватан байроғи

Шеър ёзмоқчи эдим Ватан ҳақида,

Ватанга муносиб танлар эдим ранг.

Ўйларим осмонда эди гоҳида,

Оқ-ойдин орзулар сочарди жаранг.

Дилимда муҳаббат урганди сабза,

Соғинч ва садоқат гуллагани дам,

Илҳом ҳам қуйилиб келди шу лаҳза, -

Сенга шеър битилди, азизим - Ватан!

Мовий осмонинг, ҳам ой-у юлдузинг,

Оқ саҳифам узра мўралаганда,

Сабза урди масъуд бир сезим:

Шеър - байроғингнинг рангида.

Ҳа, дилимнинг оппоқ саҳифасида,

Сенга бўлган меҳрим ранглари ёрқин.

Шеърларим-байроғингга бўлмиш қасида,

Шул ҳисдан илҳом жўш урди, инчунун.

Ҳар бир юрак экан сенинг байроғинг,

Ўттиз миллион юрак урар сени деб.

Бетакрорим Ватан, суянган тоғинг –

Халқинг борки, келажагингдир буюк!

Ўзинг ҳам Ватанга байроқ бўла бил,

Элим деб, юртим деб порла, ҳилпира.

Шеърларда Ватанни куйла сидқидил,

Эй Ҳайратий, ижод отин қамчила.

Тожибой ДЎСАНОВ.

МУБОРАК

Тинч ўлкасан Ўзбекистон, обод Ватаним,

Кўз тегмасин номингга чаманистоним.

Ўзбегимнинг ғурурисан ҳур маконим,

Онамдайин азиз Ўзбекистоним.

Дил боғини яшнатар гул баҳоринг,

Бутун элга донғи кетган ойдин йўлинг.

Осмони тинч, осуда, обод элим,

Муборак бўлсин сенга, ҳур Истиқлолинг!

Ҳурлик йўли берган чиройларинг бор,

Ифтихордан халқ кўзига нур тўлсин.

Озод, эркин Ватаним, гўзал, бетакрор,

Тараққиёт одимларинг муборак бўлсин!

Инобат ОТАЖОНОВА,

38-сонли мактаб ўқитувчиси.

ЎЗБЕКИСТОНИМ

Замин кўксин силаб шамоллар эсар,

Қушлар чуғурлашиб самони қучар.

Барглар ҳам шитирлаб гўё сўзлашар,

Гул экиб ундирай, боғ-у бўстоним –

Гўзалликда тенгсиз Ўзбекистоним!

Мевалари ғарқ пишади боғида,

Булбуллар сайрайди ҳар бутоғида.

Минг битта тилсим бор қир-у тоғида

Ҳар ёни гулга кон чаманистоним –

Бетакрорим менинг - Ўзбекистоним!

Буюк эрур азиз аждодларимиз,

Темур, Мангуберди авлодларимиз.

Дуёни лол этмиш саводларимиз,

Тафаккур гулшани, илм-у ирфоним –

Заковатда тенгсиз Ўзбекистоним!

Севара СОБИРОВА,

19-мактабнинг 8-синф ўқувчиси.

ОЗОД ВАТАНИМ

Ортда қолди очлик-у хорлик,

Яшагаймиз барчамиз бахтли.

Мангу бўлгай тинчлик ва ҳурлик,

Ортда қолди тобелик, зўрлик.

Юртимиз тинч, элимиз обод,

Ҳар бир хонадонда файз-у барака.

Ватанимиз эркин, халқимиз озод,

Доимо байрам, тўй-у маърака.

Озод энди Ватаним суюк,

Қарам бўлмас ўзга элларга.

Ўтмишимиз қанчалар буюк,

Алишмаймиз ўзга элларга.

Бугун қувончларга тўлмоқда дил,

Ватаним бўйлаб қувончлар кезар.

Хурликка тўлди йигирма тўрт йил,

Қувонч-у шодлик байроғим безар.

Ирода ЕРДАШЕВА, 38-сонли мактаб ўқувчиси.