Энг фаол комиссия аниқланди

"Фуқароларнинг ўзини ўзи бошқариш органлари фаолиятини мувофиқлаштириш” бўйича туман Кенгашининг 2016 йил 18 январдаги 1-сонли йиғилиш баёни билан тасдиқланган иш режаси ижросини таъминлаш мақсадида Маҳалла” хайрия жамоат фонди туман бўлинмаси бошқаруви, Ички ишлар бўлими, туман Тиббиёт бирлашмаси, халқ таълими муассасалари фаолиятини методик таъминлаш ва ташкил этиш бўлими, маданият ва спорт ишлари бўлими, "Камолот” ёшлар ижтимоий ҳаракати туман кенгаши билан ҳамкорликда "Фуқаролар йиғинларининг энг намунали вояга етмаганлар, ёшлар ва спорт масалалари бўйича комиссияси” танлови ташкил этилди.

"Фуқаролар йиғинининг вояга етмаганлар,  ёшлар ва спорт масалалари бўйича комиссияси тўғрисида”ги Низомда белгиланган вазифалар ижросини жойларда тўлақонли ижросини таъминлаш, фуқаролар йиғинларида самарали фаолият кўрсатиб келаётган вояга етмаганлар, ёшлар ва спорт масалалари бўйича комиссияларни ижобий иш тажрибаларини кенг оммалаштириш, вояга етмаганлар ва ёшларнинг маънавий-маърифий етук бўлиб вояга етишларини, оммавий равишда спорт билан шуғулланишларини, уларнинг ҳуқуқлари, эркинликлари ва қонуний манфаатларини таъминлаш, улар ўртасида назоратсизлик ва ҳуқуқбузарликларнинг профилактикасини амалга ошириш ишларини жадаллаштириш танловнинг асосий мақсади ҳисобланади.

Юқоридаги Низом асосида жорий йилнинг 3-5 – октябр кунлари танловнинг саралаш босқичи ўтказилди. Туманнинг 47 та фуқаролар йиғинларидаги вояга етмаганлар, ёшлар ва спорт масалалари бўйича комиссиялари 2 та шарт  асосида беллашиб, 5 нафар ҳайъат аъзолари томонидан 25 баллик тизимда баҳоланди. 20 октябр куни эса танловнинг туман босқичи Амударё қишлоқ хўжалик касб ҳунар коллежи биносида бўлиб ўтди. Саралаш босқичида ғолибликни қўлга киритган 11 нафар комиссия раислари 2 та шарт асосида ўзаро беллашдилар.

1-шартда вояга етмаганлар, ёшлар ва спорт масалалари бўйича комиссиялар раислари 5 дақиқа ичида фуқаролар йиғини ҳудудида вояга етмаганлар ва ёшларнинг маънавий-маърифий етук бўлиб вояга етишлари, оммавий равишда спорт билан шуғулланишлари, уларнинг ҳуқуқлари, эркинликлари ва қонуний манфаатларини таъминлаш, улар ўртасида назоратсизлик ва ҳуқуқбузарликларнинг профилактикасини амалга ошириш борасида амалга оширилаётган кенг қамровли ишлар тақдимотини слайдлар асосида, шунингдек, ижодий ёндошган ҳолда намойиш этдилар. 2-шартда эса иштирокчиларнинг билим савияси, дунёқараши, фикрлаш қобилияти, мулоҳаза юритишини, шунингдек, соҳага оид қонун ҳужжатларини қай даражада билишларини баҳолаш мақсадида ҳар бир комиссия раиси учун 2 тадан савол берилди.

Танлов муросасиз баҳсларга бой бўлди. Бири биридан билимдон Арна бўйи, Аёқчи, Бой овул, Хизир эли, Чордара маҳалла ҳамда Қиличбой, Ўрта қалъа, Чойкўл, Тўлқин, Куюк кўпир, Оқ олтин овул фуқаролар йиғинлари вояга етмаганлар, ёшлар ва спорт масалалалари бўйича комиссия раисларидан ҳакамлар ҳайъати хулосасига кўра энг кўп балл олган 7 нафар иштирокчилар 1-, 2- ва 3-ўринларга  лойиқ деб топилди.

Танловнинг туман босқичида 61 балл тўплаган "Қиличбой” овул фуқаролар йиғинининг "Вояга етмаганлар, ёшлар ва спорт масалалари бўйича комиссияси” биринчи ўринга, 54 балл тўплаган "Арна бўйи” маҳалла фуқаролар йиғинининг "Вояга етмаганлар, ёшлар ва спорт масалалари бўйича комиссияси” иккинчи ўринга, 49 балл тўплаган "Чордара” маҳалла фуқаролар йиғинининг "Вояга етмаганлар, ёшлар ва спорт масалалари бўйича комиссияси” учинчи ўринга муносиб деб топилди ва "Маҳалла” хайрия жамоат фонди ҳамда ҳамкор ташкилотларнинг диплом ва эсдалик совғалари билан тақдирланди.