ОБОДЛИК – ҲАР КИМНИНГ ЭЗГУ АМАЛИ

Маҳалла – Ватан ичра кичик Ватандир. Бу макон – маҳалланинг ободлиги - она Ватаннинг ободлиги, том маънода мамлакат ва миллат фаровонлигидир. Юртбошимиз И.А.Каримов ободлик тушунчасига алоҳида урғу бериб: "ободлик деганда, халқимиз, миллатимиз нафақат кўркам ва чиройли, шу билан бирга, тинчлик ва осойишталик, ўзаро меҳр-оқибат, аҳиллик, қут-барака ҳукмрон бўлган жойларни тасаввур қилади”, - деганларида айнан ана шу – барчамизнинг қалбимизга яқин гўша – маҳаллани назарда тутган эдилар. Ваҳоланки, юзлаб, минглаб оилалар остонасидан бошланадиган маҳалламиз замини биз учун ҳар нарсадан улуғ ва муқаддас. Биз ана шу муқаддас заминда туғилганмиз, унинг барча неъматларидан баҳраманд бўлиб улғайганимиз, эмин-эркин яшаб, шу азиз тупроққа бир дарахтдай илдиз қўйганмиз. Маҳалламиз заминининг ободлиги учун фидойиликни энг аввало оиламиздан бошлашимизнинг боиси ҳам шундан.

Маҳалла институтини ривожлантириш ижтимоий ҳаётдаги муаммоларни ҳал этишда фуқароларнинг ўзини-ўзи бошқариш органлари фаолиятини янада жонлантириш мустақиллик йилларида давлатимиз сиёсатининг муҳим йўналишларидан бирига айланди. Чунки мамлакатнинг ҳар жиҳатдан тараққий этиши учун меҳнат майдонларида фидойилик кўрсатувчи халқ маҳаллада яшайди, ижод қилади, янгиликлар яратади. Келажагимиз эгалари бўлган баркамол авлодни вояга етказишдек шарафли вазифани амалга оширади. Шу туфайли муҳтарам Президентимиз таъбири билан айтганда: "бугунги маҳалла ҳар жиҳатдан обод, кўркам ва юксак даражадаги инфратузилмага эга бўлиши” зарур.

"Обод турмуш” йили Давлат Дастури доирасида маҳаллаларимизни янада кўркам ва обод гўшага айлантириш мақсадида Қорақалпоғистон Республикаси Вазирлар Кенгашининг 2013 йил 12 январда махсус баённомаси қабул қилинди. Ушбу баённомага мувофиқ "Қорақалпоғистон Республикасидаги маҳаллаларга бириктирилган вакилларнинг ҳудуддаги мавжуд муаммоларни ўрганиш ҳамда аҳоли билан учрашувларини ташкил этиш ва ўтказиш тартиби” ишлаб чиқилди ҳамда Республика миқёсидаги барча маҳаллаларга зарур тавсиялар берилди.

Ушбу тавсияларга мувофиқ туманимиздаги барча ОФЙ ва МФЙларга бириктирилган масъул ходимлар фуқаролар йиғинлари раислари ва профилактика нозирлари билан биргаликда мавжуд муаммоларни ўрганиш ва ҳал этишни аллақачон бошлаб юбордилар. Хусусан, маҳаллалар ҳудудларига кирувчи уйларнинг, шу жумладан кўп қаватли уйларнинг ҳолатини ўрганиш мақсадида хонадонларга ташриф буюриб, хонадон эгаларининг фикр ва мулоҳазалари ҳамда турмуш тарзи билан яқиндан танишиб, уларнинг саволларига жавоб бериш, ҳудудда ободонлаштириш ишларининг аҳволи қай даражадалигини аниқлаш асносида ечимини кутаётган муаммоларни мутасадди раҳбарлар билан ҳамкорликда бартараф этиш чора-тадбирларини амалга оширишнинг халққа манзур ва мақбул жиҳатларига асосий эътибор қаратилмоқда.

Шу йилнинг 19 февраль куни "Чойкўл" овулида бўлиб ўтган учрашувда мутасадди ташкилотлар раҳбарлари, маҳалла қўмиталари раислари, имомлар, фермер хўжаликлари раислари, шунингдек аҳоли вакиллари иштирокида йиғин ҳудудидаги мавжуд муаммоларни ҳал этиш борасида очиқ мулоқот ўтказилди.

Учрашувда ҳудудда ижтимоий-маънавий муҳит барқарорлигини таъминлаш, санитария ҳолатини, ободонлаштириш ишларини жонлантиришда давлат органлари ва жамоат ташкилотлари билан ҳамкорликникучайтириш, муаммоларни ўрганиш ва бартараф қилиш бўйича зарур чора-тадбирлар белгилаб олинди.

Бу каби эзгу ишларга киришиш ва маҳалла институтини янада ривожлантиришга қаратилган чора-тадбирларни амалга ошириш учун туманимиздаги барча ОФЙ ва МФЙ раҳбарларига Қорақалпоғистон Республикаси Вазирлар Кенгашининг 2013 йил 12 январдаги махсус баённомасига мувофиқ ишлаб чиқилган тавсиялар берилди.

Хўш, бу тавсияларнинг мазмун-моҳияти нималардан иборат?

Унга кўра, юқорида таъкидлаганимиз каби маҳаллаларга бириктирилган масъул ходимлар ҳамда йиғин оқсоқоллари ва раислар доимий равишда маҳалла аҳли билан учрашиб турадилар ва ечимини кутаётган муаммоларни ҳал этиш чора-тадбирларини кўрадилар. Бундан ташқари, маҳалла ҳаётига оид муаммоларни тоифаларга бўлиб, уларнинг ечимини таъминлаш мақсадида ойлик, ҳафталик, чораклик ва йиллик режалар ишлаб чиқадилар. Маҳалла кучи(кўпроқ ҳашар) билан қилинадиган, туман ҳокимлигига оид масалаларни ҳал этишни ташкиллаштирадилар. Хусусан, ишсизликни бартараф этиш, коммунал, солиқ ва мажбурий тўловларни ўз вақтида тўлаш, аҳоли хавфсизлигини таъминлаш, ҳудудда паспорт режимига риоя этиш, санитария маданиятини юксалтириш, ирригация тармоқлари ҳолатини яхшилаш, аҳоли турар жойларида фуқаролар томонидан бўш ётган ер майдонларини ўзбошимчалик билан эгаллаш, ҳар хил ноқонуний қурилишлар қилиш, айниқса, кўп қавватли уй-жойларнинг ички архитектурасига ўзгартишлар киритишга чек қўйиш, тўй-тантаналар ҳамда дафн маросимларини исрофгарчиликсиз ўтказиш билан боғлиқ масалаларни ҳал этиш юқорида биз тилга олган тавсияларнинг асосини ташкил этади.

Эътиборли томони шундаки, ушбу тавсиялар асосида иш олиб борувчи фуқаролар йиғини маъмурияти йиғин ҳудудида амалга оширилаётган комплекс тадбирлар ижросини назорат қилиш Китобини юритади ҳамда ҳар бир қилинган иш юзасидан маълумотлар ушбу Китобга қайд этиб борилади.

Маҳалла Китоби – маҳалла аҳли турмуш тарзини акс эттирувчи ойна. У том маънода маҳалланинг кундалиги – эзгу ишлар, янги режалар, муаммоларни ҳал этиш йўлида тараққиёт сари қўйиладиган қадамлар қайдномаси. Энг муҳими, туғилган ерга муҳаббати баланд маҳалла аҳлининг орзу-умидлари битилади унга.

Туғилган еринг – ота маконинг, - дейдилар. Ота маконингнинг қиёфаси бу - сенинг маънавий қиёфанг. Демак, оиламиз остонасидан бошланадиган, киндик қонимиз тўкилган Ватан тупроғини гуллаб-яшнатиш, маҳалламизни ҳар жиҳатдан кўркам ва обод гўшага айлантириш, элу юртнинг кўрки, Она Ватаннинг келажаги бўлган ёш авлодни ҳар жиҳатдан етук ва баркамол инсонлар қилиб вояга етказиш – ҳар биримизнинг, бурчимиздир. Бу бурчга садоқат оиламизнинг тотувлигида, ҳаётимизнинг тўкислигида, урф-одатларимизнинг, маънавий қадриятларимизнинг гўзаллигида, қўни-қўшни, туғишган-қардошга меҳр-оқибатимизда, ҳовли ва уйларимизнинг фасади кўркам, кўча ва гузарларимизнинг орасталигида, турмуш тарзидан кўнгли тўқ халқимизнинг ободон ҳаётида намоён бўлади.

Азизлар, биз шарқона, гўзал урф-одатларни ўз феълида мужассам этган, сўзида собит, фикрида мардона Ўзбекмиз. Бизнинг халқ ҳеч қачон ўзганинг силтови, юқорининг буйруғи билан ўзгаришлар қилишга одатланмаган. Оиласидан бошланган гўзал ўзгаришни аввало маҳалласига, кейинчалик мамлакат миқёсига олиб чиққан, мустақилликнинг эзгу ғояларига ҳамоҳанг турмуш тарзини шакллантирган халқмиз. Демак, ўз уйи, маҳалласи, киндик қони томган замин – она Ватан тараққиёти учун масъуллик туйғуси бор экан, оила – маҳалла – Ватан ободлиги учун ҳар лаҳзада бир эзгу қадам қўйилади. Зотан, ободлик – ҳар биримизнинг эзгу амалимиз!

Робия ЙЎЛДОШЕВА,

Алламберган ЖУМАНИЁЗОВ,

"www.аmunews.uz" веб-сайти мухбирлари.

(Фото- http://fikr.uz)