УЧАСТКАЛАР САЙЛОВГА ТАЙЁР!

Амударё туманидаги барча сайлов участкаларида 22 декабрь куни бўлиб ўтадиган сайловларга қонун талабларига мувофиқ пухта ҳозирлик кўрилди. Участка сайлов комсиссиялари аъзолари сайловларни аҳолининг ижтимоий фаоллик ўсган, фуқароларнинг амалдаги ислоҳотларга, сиёсий партияларга талабчанлиги ошган бир шароитда қонун талаблари асосида ўтказишга қизғин ҳозирлик кўрмоқдалар.

Навоий номли маҳалла ҳудудидаги 30-сонли мактабда жойлашган 79-сайлов участкасида 2 минг 831 нафар сайловчи рўйхатга олинган.

Участка сайлов комиссияси жойлашган бино қонунчиликда белгиланган талаблар асосида жиҳозланди. Шунингдек, зарур техника воситалари – телефон, факс, нусха кўчириш аппарати ва тегишли адабиётлар билан таъминланди. Овоз бериш кабиналари, стационар ва кўчма сайлов қутилари тайёрланди. Сайлов қонунчилигига оид маълумотлар, сайловчилар ҳуқуқ ва мажбуриятлари тўғрисидаги тарғибот воситалари кўринарли жойга осиб қўйилди.

Участка сайлов комиссияси раиси Қувватбой Ниёзов, масъуллари Азимбой Дусчанов, Рашид Давлетов ҳамда бошқа аъзолари сайловларнинг очиқ, ошкора ва холислик мезонлари асосида юқори савияда, уюшқоқлик билан ўтишини таъминлаш мақсадида сайловчиларга қулай шарт-шароит яратишга ҳаракат қилдилар.

Тарғибот-ташвиқот тадбирлари ташкил қилиниб, ҳудуддаги сайловчиларга янги Сайлов кодекси, сиёсий партиялар, фуқароларнинг ҳуқуқ ва бурчлари, муддатида аввал овоз бериш тартиби тўғрисида батафсил тушунчалар берилди.

Сайловчиларнинг ягона электрон рўйхати ваколатли давлат органлари томонидан тақдим этиладиган ахборот негизида шакллантирилди ва уйма-уй юриш жараёнида унга аниқлик киритилди.

Туман Маданият бўлимида жойлашган 80-сонли сайлов участкасида ҳам комиссия раиси Шуҳрат Юсупов ва масъуллар Турсунбой Серикбоев, Ўктам Янгибоевлар сайловга тайёргарликни сайловчиларнинг ягона электрон рўйхати билан шуғулланишдан бошлашди. Комиссия аъзолари уйма-уй айланиб, сайлов ҳуқуқига эга бўлган 2 минг 836 нафар фуқаронинг маълумотларини “Ягона электрон рўйхат” билан солиштириб чиқдилар.

Шунингдек, депутатликка номзодларнинг сайлов кампаниясида иштирок этишлари учун тенг шароитларни таъминлаш ва сайловчилар билан учрашувларини ташкил этишга кўмаклашиш, ишончли вакилларини рўйхатга олиш, тегишли гувоҳномалар бериш ишларига ҳам комиссия томонидан алоҳида эътибор қаратилди.

Амударё хизмат кўрсатиш ва сервис касб-ҳунар коллежи биносида жойлашган 83-сонли сайлов участкаси ҳам 22 декабрь куни ўтказиладиган сайловларга тайёр ҳолатга келтирилди.

Участка  сайлов комиссиялари зарурий  воситалар, адабиётлар билан таъминланиб, сайловчилар учун қулай  шарт-шароитлар яратилди. Сайлов комиссияси аъзолари адлия органларининг мутахассислари билан биргаликда ҳудуддаги маҳаллалар, корхоналар, таълим муассасаларида сайловчилар билан учрашувлар ўтказдилар. Ундан ташқари, сайловчиларининг ҳуқуқий билимини янада юксалтириш ва сайлов маданиятини ошириш, Сайлов кодексининг мазмун-моҳиятини аҳолига етказиш, аҳолининг ўз конституциявий ҳуқуқларидан тўғри фойдаланиб, сайловларда фаол иштирок этишига ва дахлдорлик туйғусини кучайтиришга эътибор қаратилди.

Бир сўз билан айтганда, Амударё туманидаги барча сайлов участкалари мамлакатимиз ҳаётидаги энг муҳим ижтимоий-сиёсий воқеа – бўлажак сайловларга тўлиқ тайёр ҳолатга келтирилди.

О.Худойберганова.