ОЛИЙ ҲАРБИЙ БИЛИМ ЮРТЛАРИ ВА “ТЕМУРБЕКЛАР МАКТАБИ” ҲАРБИЙ-АКАДЕМИК ЛИЦЕЙИДА ЎҚИШНИ ХОҲЛОВЧИ ЁШЛАР УЧУН ТАРҒИБОТ ТАДБИРЛАРИ ЎТКАЗИЛМОҚДА

Ўғил бола борки, ҳарбий ҳаётга алоҳида қизиқиш ва орзу билан қарайди. Ҳарбий либос кийиш, сафда юриш қоидаларини ўрганишга, замонавий ҳарбий техникалар, қурол-аслаҳалар сирини билишга интилади. Вояга етгач эса ҳарбий либос кийиш, она Ватан олдидаги фарзандлик бурчини бажариш мақсадида армия сафида хизмат қилишга бўлган интилиши янада кучаяди.

Умумтаълим мактабларида таълим дастурига киритилган чақириққа қадар бўлган тайёргарлик фани ўсмир-ёшларнинг бу борадаги қизиқиш ва интилишларини ривожлантиришда муҳим аҳамият касб этади. Мазкур фан ўқитувчилари билан ҳарбий соҳа ходимларининг назарий ва амалий машғулотлардан ташқари, соҳага оид янгиликлар, билимдон ва жисмонан бақувват ёшларни Олий ҳарбий билим юртлари, “Темурбеклар мактаби” ҳарбий-академик лицейга ўқишга киришлари учун тарғибот-ташвиқот тадбирларининг ўтказилиши доимий анъанага айланган.

Айни кунларда Амударё туман Мудофаа ишлари бўлими ҳамда бўлимнинг чақирилувчиларни ҳарбий хизматга тайёрлаш бўйича бўлинмаси томонидан тумандаги умумтаълим мактабларининг 9-11-синфлар битирувчилари ва муддатли ҳарбий хизматни ўтаб, заҳирага бўшатилган собиқ аскарлар билан тарғибот тадбирлари бўлиб ўтмоқда.

Ана шундай тарғибот тадбирларидан бири 38-сонли умумтаълим мактабида бўлиб ўтди. Тадбирда Амударё туман Мудофаа ишлари бўлими бошлиғи, подполковник Шерзод Муродов ва чақирувчиларни ҳарбий хизматга тайёрлаш бўлинмаси бошлиғи Роман Рўзметов, шунингдек, муддатли ҳарбий хизматни ўтаб, заҳирага бўшатилган собиқ аскарлар ва умумтаълим мактабларининг чақириққа қадар тайёргарлик фани ўқитувчилари иштирок этишди.

Айнан шундай тарғибот тадбирлари Манғит шаҳридаги 40-сонли мактабда ҳам ўтказилди. Мактаб директори Санобар Хўжамуродова, мактабнинг чақириққа қадар тайёргарлик фани ўқитувчиси вазифасини бажарувчи Равшанбек Рейимов ва бошқалар қатнашган тарғибот тадбирида Амударё туман Мудофаа ишлари бўлими бошлиғи, подполковник Шерзод Муродов ҳамда чақирилувчиларни ҳарбий хизматга тайёрлаш бўлими бошлиғи Роман Рўзметовлар, шунингдек, муддатли ҳарбий хизматни ўтаб, заҳирага бўшатилган собиқ аскарлар, мактабнинг 9-11-синф ўқувчилари иштирок этдилар.

Тарғибот тадбирларида мутасаддилар ёшларга мамлакатимиздаги Олий ҳарбий билим юртлари ва “Темурбеклар мактаби” ҳарбий-академик лицейи ҳақида тўлиқ маълумотлар бердилар. Шу билан бирга, мазкур билим юртларининг ҳар йилги қабул квоталари, Низомлари ва номзодларни саралаш танлови, дастлабки танлаш, ҳарбий касбий танлов ва тест синовлари, шунингдек, ҳужжатларни қабул қилиш муддатлари хусусида батафсил тушунчалар беришди.

Тарғибот тадбири давомида ўқувчи-ёшлар ўзларини қизиқтирган саволлар билан мурожаат қилдилар. Барча саволларга масъуллар томонидан аниқ ва батафсил жавоблар берилди.

Амударё тумани халқ таълими бўлимига қарашли 30-сонли мактабда ҳам шу каби тарғибот тадбири ўтказилди. Тадбирда мактаб директори Қувват Ниёзов, мактабнинг чақириққа қадар тайёргарлик фани ўқитувчиси Тошпўлат Қўчқоров, туман Мудофаа ишлари бўлими бошлиғи, подполковник Шерзод Муродов ҳамда чақирилувчиларни ҳарбий хизматга тайёрлаш бўлими бошлиғи Роман Рўзметовлар сўзга чиқиб, олий ҳарбий таълим муассасалари ҳақида маълумотлар берди.

Тарғибот тадбирида Амударё туман Мудофаа ишлари бўлими бошлиғи Шерзод Муродов ёшларга Ўзбекистон Республикаси Мудофаа, Ички ишлар, Фавқулодда вазиятлар вазирликлари, Давлат хавфсизлик хизмати, Миллий гвардияси таркибида ўқиш давомийлиги икки йил бўлган “Темурбеклар мактаби” ҳарбий академик лицейлари ташкил этилиб, фаолият олиб бораётгани таъкидлади. Шунингдек, ўқувчиларга мамлакатимиздаги Олий ҳарбий билим юртлари хусусида батафсил маълумот берилди. Шерзод Муродов амударёлик ёшларни ва 9-синф битирувчиларини “Темурбеклар мактаби” ҳарбий-академик лицейида ўқишга тарғиб қилиб, мазкур ҳарбий-академик лицейга ўқишга кирувчилар учун бериладиган имтиёзлар ҳамда назарий ва жисмоний тайёргарлик синовлари хусусида батафсил сўз юритди.

Мамлакатимиздаги Олий ҳарбий билим юртлари ва “Темурбеклар мактаби” ҳарбий-академик лицейида ўқишни хоҳловчи ёшлар билан ўтказилган тарғибот тадбири ўқувчи-ёшлар қалбида она Ватанга садоқат билан хизмат қилиш ва муқаддас Юрт тупроғини кўз қорачиғидан асраш туйғусини янада мустаҳкамлади.

Робия ЙЎЛДОШЕВА.