МАДАНИЯТ МАРКАЗИДА ЯНГИ ИСТЕЪДОД ЭГАЛАРИ ЕТИШИБ ЧИҚМОҚДА
Мамлакатимизда аҳоли, айниқса олис ҳудудларда истиқомат қиладиган фуқароларга маданий дам олиш хизматлари кўрсатиш даражасини ошириш, барча ҳудудларда театр, цирк ва бошқа турдаги оммавий-маданий ва концерт-томоша тадбирларини тизимли равишда йўлга қўйиш, маданият ва санъат соҳасида истеъдодли ёш ижодкорларни излаб топиш ва қўллаб-қувватлаш, истеъдодларини намоён этишларига шароит яратиш борасидаги амалга оширилаётган саъй-ҳаракатлар ўзининг ижобий натижаларини бераётгани қувонарлидир.
Хусусан, чекка ҳудудлардаги Маданият марказлари тўгаракларида фаол иштирок этаётган ёшлар орасидан турли нуфузли кўрик-танловлар ғолиблари етишиб чиқмоқда, тўгараклар аъзолари томонидан муҳим саналар, қутлуғ байрамлар муносабати билан ўтказилаётган маданий тадбирлар, концерт томошалари тобора кенг қамров касб этмоқда.
Туманимизнинг Қангли овулида жойлашган Қангли маданият маркази хусусида ҳам худди шундай фикрларни билдиришимиз мумкин. Ўтган йиллар мобайнида марказ тўгаракларининг иқтидорли иштирокчиларидан шакллантирилган бадиий жамоа туманимиз миқёсида ўтказилган турли байрам тадбирларида, кўнгилочар томошаларда иштирок этишиб, чиқишлари халқимизга манзур бўлди. Шунингдек, улар коронавирус пандемияси даврида онлайн ўтказилган танловда бахшичилик, эстрада қўшиқчилиги, рубобда куй чалиш бўйича ғолибликни қўлга киритган бўлсалар, С.Дурдибоев “Ягонасан, муқаддас Ватан!” кўрик-танловида туманда иккинчи ўринни эгаллади.
Айни кунда мазкур маданият марказига Ражаббой Ешбоев раҳбарлик қилмоқда. Муассаса ўз фаолиятини ҳудуддаги 67-,29-, 39-, 61- ва 74-сонли умумий таълим мактаблари билан ҳамкорликда ташкил этган.
Ушбу таълим масканларининг ўқувчи-ёшлари маданият марказида фаолият юритаётган миллий чолғулардан рубоб, бахшичилик тўгараклари, эстрада хонандалиги ва гитара тўгараклари машғулотларига фаол қатнашиб, мусиқа ва санъат соҳасида мактабларида олган билимларини мустаҳкамлашмоқда. Алимжон Ешимбетов раҳбарлигидаги рубоб, Давронбек Ендирбоев раҳбарлигидаги эстрада хонандалиги, Алишер Худойберганов раҳбарлигидаги гитара чолғуси тўгаракларида мусиқа ва санъат сирларини ўрганаётган 35 нафар ёшлар иштирокида йилнинг ҳар чорагида ўтказиб келинаётган ҳисобот концертларида соҳа ходимларидан ташқари, овул аҳолиси ҳам иштирок этадилар ва концерт дастурини томоша қилиб, маданий ҳордиқ чиқарадилар.
Шуни таъкидлаш жоизки, аҳоли, айниқса ёшларнинг маданий дам олишлари ва бўш вақтларини мазмунли ўтказишларини тизимли ташкил этишда ҳудудлардаги маданият марказларининг фаолияти алоҳида аҳамиятга эга. Буни Қангли овулидаги Қангли маданият маркази мисолида ҳам яққол кўришимиз мумкин. Аҳолига маданий хизмат кўрсатишни яхшилаш борасидаги қабул қилинаётган қарорлар маданият маркази ходимларига яна ҳам куч-ғайрат ва ижодий кўтаринкилик бахш этмоқда.
О.РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
