ҲАР КУНИ ҲАШАР

Ҳашар – халқимизнинг асрлар давомида шаклланиб, қадр топган маънавий ёдгорлиги. Шу боис, эл катхудолари: "ҳашарга!” – дедими, бас, халқимиз бу бобомерос удумни байрамга айлантириб юборишади.

"Арна бўйи” МФЙ раиси Б.Ҳайдаров маҳалла ҳудудидаги кўча бошчилари, мактабларнинг директорлари ва маҳалла имомларига маҳалла ҳудудини ободонлаштириш борасида ўз фикрлари ва МФЙ маъмурияти томонидан ишлаб чиқилган режалар ҳақида гапирганида март ойининг илк кунлари эди. Бир ойдан ўтдики, МФЙ аҳолиси, маҳалла имомлари, кўча бошчилари ва мактаб ўқувчилари ҳар куни ҳашарда. Уларнинг ташаббус ва интилишлари боис МФЙ ҳудудида кенг қамровли ободонлаштириш ва кўкаламзорлаштириш ишлари олиб борилди. Маҳалла ҳудудидаги мактаблар атрофи, кўча бўйлари, йўл чеккаларига 31 минг 277 туп мевали ва манзарали дарахт кўчатлари ўтқазилди. Ҳозирги кунда бу ниҳолларнинг барчаси куртак ёзишни бошлади. 27-сонли умумтаълим мактабининг битирувчи синф ўқувчилари эса "Битирувчилар боғи”ни бунёд этиш ташаббуси билан чиқишди. Ўқишдан бўш пайтларида ва дам олиш кунларида битирувчи синф ўқувчилари бўлғуси боғда ўтқазилган дарахт ва гул кўчатларини парваришлаш, ерларни шудгорлаш ишлари билан машғул бўлишади.