Референдум ўтказувчи участка комиссиялари аъзолигига номзодлар учун ўқув семинарлари ўтказилмоқда

Мамлакатимиз Мустақилликка эришган дастлабки йиллардаёқ қабул қилинган Ўзбекистон Республикаси Конституцияси инсонпарвар қадриятларни, халқаро ҳуқуқий меъзон ва талабларни ўзида мужассам этган ягона қомусимиз ҳисобланади.

Шиддат билан ривожланаётган замон, дунёда рўй бераётган ижтимоий, иқтисодий, сиёсий ўзгаришлар конституциямизга ўзгартириш ва қўшимчалар киритишни талаб этмоқда. Шу мақсадда ўтган йили Президент сайловолди учрашувларида сайловчилар томонидан Асосий қонунимизни бугунги ҳаёт талабларига мос ҳолда янгилаш масаласи кўтарилган эди.

Фуқароларимизнинг бу борадаги хоҳиш ва истакларини амалга ошириш учун Олий Мажлис палаталари томонидан Конституциявий комиссия тузилиб, фаолият бошлади. Комиссия таклифи асосида Парламент томонидан тайёрланган Қонун лойиҳаси умумхалқ муҳокамасига қўйилди.

Амалдаги қонунчилигимизга кўра, парламентнинг ўзи ҳам Конституцияга ўзгартиш киритиш ваколатига эга. Лекин, конституциявий ислоҳотни фуқароларимизнинг фикри ва қўллаб-қувватлаши асосида референдум орқали амалга оширилиши кўзда тутилгани халқимизнинг хоҳиш ва иродаси ифодасидир.

Ўзбекистон Республикаси Конституциясига ўзгартириш ва қўшимчалар киритиш бўйича ўтказилиши кутилаётган умумхалқ референдуми олдидан жойлардаги референдум ўтказувчи участка комиссиялари аъзолигига номзодлар учун ўқув семинар ўтказилмоқда.

14 сентябрь куни Амударё туманининг Олмазор маҳалласи ҳудудидаги 82-сонли умумтаълим мактаби биносида Конституцияга ўзгартириш ва қўшимчалар киритиш бўйича умумхалқ референдуми олдидан жойлардаги референдум ўтказувчи участка комиссиялари аъзолигига номзодлар учун ўқув семинар бўлиб ўтди.

Семинарда Олий таълим муассасаси ўқитувчилари − Тажихал Қудайбергенова, Саламат Ганиев, Ерполат Ғаниев ҳамда тумандаги муассаса-ташкилот раҳбарлари − Улуғбек Абдураҳмонов, Азимжон Бекберненов, Баҳодир Жуманиязовлар тренерлик қилишди.

Семинар 3 гуруҳга бўлинган ҳолда олиб борилди. Ҳар бир гуруҳда 21 нафардан иштирокчилар, яъни референдум ўтказувчи участка комиссиялари аъзолигига номзодлар қатнашиб, “Ўзбекистон Республикасининг референдуми тўғрисида”ги Ўзбекистон Республикаси Қонунининг мазмун-моҳияти билан батафсил таништирилди.

Таъкидланганидек, Қонуннинг 7-моддасига биноан референдумга тайёргарлик кўриш ва уни ўтказишни референдум ўтказувчи комиссиялар амалга оширади. Улар фуқароларни ўз ишларидан, жумладан, округлар, овоз бериш участкалари тузилганлиги, комиссияларнинг таркиби, уларнинг жойлашган манзили ва иш вақтидан воқиф этадилар, овоз берувчи фуқароларнинг рўйхатлари билан таништирадилар, овоз бериш якунларидан хабардор қиладилар.

Шунингдек, Референдум ўтказувчи участка комиссияси референдум тайинлаш тўғрисидаги қарор эълон қилинганидан кейин округ комиссияси томонидан йигирма беш кундан кечикмай беш нафардан ўн тўққиз нафаргача аъзодан иборат таркибда тузилади.

Референдум ўтказувчи участка комиссиясининг раиси, раис ўринбосари ва котиби комиссия мажлисида унинг аъзолари орасидан сайланади.

Семинар довимида Конституцияга киритилаши лозим бўлган нормаларни фуқароларнинг маъқуллаши ёки маъқулламаслиги бюллетенларга махсус белгилар орқали кўрсатиб ўтилиши ва натижаларни сарҳисоб қилиб, референдум ўтказувчи округ комиссиясига тақдим қилиш тартиби ҳамда мазкур жараённинг ташкил этилишида очиқлик ва шаффофликни таъминлаш муҳим аҳамиятга эга эканлиги айтиб ўтилди.

Шундан сўнг, семинар иштирокчилари тренерларга ўзларини қизиқтирган саволлар билан мурожаат қилиб, тегишлича жавоблар олдилар.

Туман ҳокимлигининг Ахборот хизмати.