Халқ депутатлари Амударё туман Кенгашининг 52-сессияси тўғрисида ахборот

2022 йил 19 сентябрь куни Амударё тумани ҳокимлигида Халқ депутатлари туман Кенгашининг 52-сессияси ўз ишини бошлади.

Сессия ишида туман Кенгаши депутатлари, секторлар раҳбарлари, ҳоким ўринбосарлари, ҳокимлик масъул ходимлари, ҳуқуқ-тартибот органлари, бўлимлар, жамоат ташкилотлари раҳбарлари ҳамда оммавий ахборот воситалари вакиллари иштирок этди.

Сессияни туман ҳокими – Халқ депутатлари туман Кенгаши раиси Султонбой Йўлдашев очди ва олиб борди.

Сессия котиблигига 18-Хитой сайлов округидан депутат Музаффар Ешчанов сайланди.

Сессияда дастлаб Қорақалпоғистон Республикасини ижтимоий-иқтисодий ривожлантириш бўйича белгиланган Президент Фармонлари, Қарорлари ва дастурларининг ижроси ҳамда йил якунига қадар амалга оширилиши белгиланган вазифалар юзасидан биринчи ва иккинчи сектор раҳбарларининг ҳисоботлари тингланди.

1-сектор раҳбари – туман ҳокими Султонбой Йўлдашев 2022 йилнинг 8 ойи двомида 1-сектор ҳудудида амалга оширилган ишлар ҳақида ҳисобот берди.

Келтирилишича, 1-сектор ҳудудида йил бошидан буён оилавий тадбиркорликни ривожлантириш мақсадида 460 нафар фуқарога 9,6 млрд.сўмлик кредит маблағлағи ажратилиб, енгил конструкцияли иссиқхона ва асбоб-ускуналар сотиб олиш учун 44 нафар фуқарога 133,4 млн.сўмлик субсидиялар ажратилди.

Шунингдек, фуқароларни касб-ҳунарга ўқитиш, кооперациялар ташкил қилиши, асбоб-ускуна сотиб олишлари учун ҳам субсидиялар ажратилмоқда.

Хусусан, Қипчоқ овули ҳудудида “Amudaryo outlet” ишлаб чиқариш кооперативига 15 нафар хотин-қизларни аъзо қилган ҳолда 60 млн. сўм субсидия маблағлари ажратилди.

1-сектор раҳбари жорий йилнинг ўтган даври мобайнида ҳудудда кенг кўламли қурилиш ишлари амалга оширилганини, хусусан, ички йўллар ва автомобиль йўллари таъмирланиб, янгидан трансформаторлар, электр узатиш устунлари ўрнатилганини айтиб ўтди.

Шунингдек, аҳолини ижтимоий қўллаб-қувватлаш бўйича жорий йилнинг 8 ойи давомида 77 нафар фуқаролар реаблитация техник воситалари ва кресло-аравачалар билан таъминланди.

Кўрсатилган амалий ёрдамлар натижасида 1-сектор ҳудудидаги 597 та оилаларнинг 560 таси “Темир дафтар”дан, 933 нафар хотин-қизларнинг 853 нафари “Аёллар дафтари”дан, 541 нафар ёшларнинг 498 нафари “Ёшлар дафтари”дан чиқарилган.

Сессия ишида 2-сектор раҳбари – туман прокурори Азиз Рўзметовнинг ҳам сектор ҳудудида 8 ой давомида амалга оширилган ишлар бўйича ҳисоботи тингланди.

Таъкидланганидек, сектор ҳудида аҳоли бандлигини таъминлаш, тадбиркорликни ривожлантириш ҳамда аҳолини ижтимоий жиҳатдан қўллаб-қувватлаш борасида тизимли ишлар амалга оширилган.

Жумладан, жорий йилнинг 8 ойи мобайнида сектор ҳудудида яшовчи 371 нафар хотин-қизлар иш билан таъминланди. Тадбиркорлик қилиш истагидаги хотин-қизларнинг 140 нафарига кредитлар ажратилди. Шунингдек, ҳудуддаги 227 нафар аёлга тиббий хизматлар кўрсатилиб, саломатлигини тиклаши учун шароитлар яратиб берилди.

Сессия ишида туманда миллатлараро муносабатларни мустаҳкамлаш бўйича амалга оширилаётган ишлар хусусида Маҳалла ва нуронийларни қўллаб-қувватлаш бўлими бошлиғи Ғуломжон Дуйсенбаевнинг ҳисоботи тингланди.

Таъкидланганидек, туманнинг Манғит шаҳри, Бештом, Назархон, Куюк-кўпир, Амир Темур каби овулларида асосан рус, қозоқ, қарақалпоқ, туркман миллатига мансуб аҳоли истиқомат қилишади. Ушбу овул ва маҳаллаларда аҳолининг яшаш тарзи яхши бўлиб, шу пайтгача миллий ва этник низолар келиб чиқмади. Аҳоли тинчлик ва ҳамжиҳатликда яшаб келмоқда. Туманда фаолият юритиб келаётган 85 та мактабларда таълим 5 та тилда олиб борилади.

Сессия кун тартибидаги хотин-қизларни қийнаётган муаммоларни ҳал қилиш ҳамда жамиятда уларнинг нуфузини янада ошириш бўйича кўрилаётган чоралар самародорлиги бўйича туман ҳокимининг ўринбосари, Оила ва хотин-қизлар бўлими бошлиғи Гўзал Сабурованинг ҳисоботи тингланди.

Қайд этилишича, жорий йилнинг 8 ойи давомида ижтимоий ҳимояга муҳтож, ишсиз 1 208 нафар эҳтиёжманд хотин-қизлардан 1 196 нафарининг бандлиги таъминланди. 907 нафар эҳтиёжманд хотин-қизларнинг 805 нафарига “Аёллар жамғармаси” томонидан базавий ҳисоблаш миқдорининг 4 баробари миқдорида бир марталик моддий ёрдамлар кўрсатилди.

Ундан ташқари, аёлларнинг ўз томорқасидан унумли фойдаланишлари учун 70 нафар аёл-қизга ҳудуддаги фермерлар бириктирилиб, фермер хўжаликлари раҳбарлари тамонидан ҳомийлик ёрдамлари сифатида буғдой, ун, ёғ, парранда ва бошқа озиқ-овқат маҳсулотлари тарқатилди.

Сессия ишида бирламчи тиббий-санитария ёрдамини аҳолига яқинлаштириш ва тиббий хизматлар самарадорлигини ошириш бўйича амалга оширилган ишлар юзасидан Амударё туман тиббиёт бирлашмаси бошлиғи Фахриддин Абдуллаевнинг ҳисоботи тингланди.

Ҳисоботда шошилинч тиббий ёрдам қабулхонасини ташкил қилиш, қизил, сариқ ва яшил зоналарда тиббий хизматларни сифатли тарзда амалга ошириш, беморларга қулайлик яратиш борасида олиб борилаётган ишлар ҳақида батафсил маълумотлар берилди. Шунингдек, аҳоли орасида юқумли касалликларнинг олдини олишга қаратилган тарғибот тадбирлари мунтазам ўтказиб келинаётгани айтиб ўтилди.

2022 йилнинг ўтган даври мобайнида туман марказий шифохонасида ва Республика тиббиёт марказларида 87 нафар беморлар билан юқори технологик операциялар ўтказилиб, беморлар оғир дарддан холос бўлишди.

Сессия ишида кун тартибида кўрилган барча масалалар бўйича халқ депутатлари туман Кенгашининг тегишли қарорлари қабул қилинди.

Сессия 20 сентябрь куни ўз ишини давом эттиради.

Туман ҳокимлигининг ахборот хизмати.