Халқ депутатлари Амударё туман Кенгашининг навбатдан ташқари 54-сессияси тўғрисида АХБОРОТ

2022 йил 9 ноябрь куни Амударё тумани ҳокимлигининг мажлислар залида Халқ депутатлари туман Кенгашининг навбатдан ташқари 54-сессияси бўлиб ўтди.

Сессияни туман ҳокими – халқ депутатлари Амударё туман Кенгаши раиси Султонбой Йўлдошев очди ва олиб борди.

Ижтимоий тармоқлар орқали тўғридан-тўғри эфирга узатилган сессияда депутатлар, секторлар раҳбарлари, ҳоким ўринбосарлари, ҳокимлик масъул ходимлари, бўлимлар, ташкилотлар раҳбарлари ҳамда оммавий ахборот воситалари вакиллари иштирок этди.

Сессия котиблигига 10-Тош ёп сайлов округидан депутат Илҳом Палванов сайланди ҳамда сессия кун тартиби ва регламенти тасдиқланди.

Сессияда дастлаб Ўзбекистон Республикаси Президентининг 2022 йил 25 октябрдаги “Маҳаллалар инфратузилмасини янада яхшилаш қўшимча чора тадбирлари тўғрисида”ги қарорига асосан 2022-2023 йилларда Қорақалпоғистон Республикаси маҳаллалар инфратузилмасини ривожлантириш дастури бўйича туман ҳокимининг қурилиш, коммуникациялар, коммунал хўжалик, экология ва кўкаламзорлаштириш масалалари бўйича ўринбосари Нодирбек Камоловнинг ҳисоботи тингланди.

Ҳисоботда қайд қилинганидек, Ўзбекистон Республикаси Президентининг юқоридаги қарорига асосан 2022-2023 йилларда Қорақалпоғистон Республикаси маҳаллалар инфратузилмасини ривожлантириш дастури ишлаб чиқилмоқда. Мазкур дастур доирасида туман ҳудудидаги 25 та маҳаллада умумий қиймати 22 млрд 209 млн. сўм маблағ эвазига қурилиш-таъмирлаш ишлари амалга оширилиши кўзда тутилган.

Дастур доирасида жами 19 та маҳаллада умумий қиймати 11 млрд 753 млн. сўм маблағ эвазига 50,3 км ички йўлларни таъмирлаш режалаштирилмоқда.

Бундан ташқари, Намуна маҳалласи ҳудудида ичимлик суви таъминотини яхшилаш мақсадида 3 млрд 242 млн. сўмга сувни чучуклаштирувчи станция ва 7,1 км сув тармоқларини янгидан қуриш ҳамда мавжуд 1,4 км сув тармоғини мукаммал таъмирлаш, Қипчоқ шаҳарчаси ҳудудида электр энергияси таъминотини яхшилаш мақсадида 100 млн. сўмга 248-сонли трансформатордан чиқувчи тармоққа янгидан 2 км кабеллар тортиш, Дўстлик маҳалласи ҳудудида 350 млн. сўмга янгидан болалар майдончаси қуриш, Хизр эли ва Юқори қишлоқ маҳалла фуқаролар йиғинларининг ҳар бирига 450 млн. сўмга янгидан замонавий маҳалла бинолари қуриш кўзда тутилмоқда.

Шунингдек, Қум ёп маҳалласи ҳудудида ичимлик суви таъминотини яхшилаш мақсадида 5 млрд 100 млн. сўмга сувни чучуклаштирувчи станция қуриш ва 10,1 км сув тармоқларини тортиш ҳам режага киритилган.

Депутатлар туман ҳокими ўринбосарига ушбу манзилли дастурга оид турли саволлар билан мурожаат қилиб, тегишли жавоблар олди.

Муҳокамалардан кейин кун тартибидаги мазкур масала бўйича халқ депутатлари туман Кенгашининг тегишли қарори қабул қилинди.

Кун тартибидаги навбатдаги масала юзасидан туман ҳокимининг биринчи ўринбосари Рашид Салаевнинг ҳисоботи тингланди.

Ўзбекистон Республикаси Президентининг 2021 йил 5 мартдаги “Хотин-қизларни қўллаб-қувватлаш, уларнинг жамият ҳаётидаги фаол иштирокини таъминлаш тизимини янада такомиллаштириш чора-тадбирлари тўғрисида”ги ҳамда 2021 йил 13 апрелдаги “Бюджет жараёнида фуқароларнинг фаол иштирокини таъминлаш бўйича қўшимча чора-тадбирлар тўғрисида”ги, шунингдек Ўзбекистон Республикаси Вазирлар маҳкамасининг 2021 йил 11 мартдаги “Ёшларни ижтимоий қўллаб-қувватлаш бўйича қўшимча чора-тадбирлар тўғрисида”ги қарорларга асосан ҳар чорак якуни бўйича маҳаллий бюджетнинг ортириб бажарилган қисмининг 15 фоизи “Аёллар дафтари”га киритилган хотин-қизларни қўллаб-қувватлаш жамғармасига, 30 фоизи жамоатчилик фикри асосида шаклантирилган “Ташаббусли бюджет” жамғармасига ҳамда 15 фоизи “Ёшлар дафтари”га киритилган ёшларни қўллаб-қуватлаш жамғармасига ўтказиш белгиланган.

Юқоридагиларни инобатга олиб, депутатлар Қорақалпоғистон Республикаси Жўқорғи Кенгисининг тегишли қарорига асосан туман маҳаллий бюджетнинг 3-чоракда орттириб бажарилган қисмидан “Аёллар дафтари”, “Ташаббусли бюджет” ҳамда “Ёшлар дафтари” жамғармаларига маблағлар ажратилиши учун овоз бердилар.

Кун тартибидаги барча масалалар атрофлича муҳокама қилиниб, халқ депутатлари туман Кенгашининг тегишли қарорлари қабул қилинди.

Шунинг билан сессия ўз ишини якунлади.

Туман ҳокимлигининг Ахборот хизмати