Амударё туманида 3 декабрь− Халқаро ногиронлар кунига бағишланган тадбир ўтказилди

1992 йил 14 октябрь куни Бирлашган Миллатлар Ташкилоти Бош Ассамблеясининг 37-ялпи мажлисида қабул қилинган резолюцияга мувофиқ, 3 декабрь – Халқаро ногиронлар куни сифатида белгиланган. Шундан буён ҳар йили мазкур сана доирасида ногиронлар дуч келаётган муаммоларни чуқурроқ англаш, шу каби масалаларни ҳал этиш, уларнинг қадр-қиммати, ҳуқуқини ҳимоя қилиш, турмуш шароитини яхшилашга қаратилган тадбирлар уюштирилади, имконияти чекланганларга моддий ёрдамлар берилиб, маънавий қўллаб-қувватланади.

Мамлакатимизда ҳам ногиронлиги бўлган шахсларга жамият ва давлат томонидан кўмак ва ёрдам кўрсатиш, уларни ижтимоий-сиёсий ҳаётга фаол жалб этишга қаратилган кенг кўламли чора-тадбирлар амалга оширилмоқда.

Ҳозирги вақтда ушбу тоифага мансуб фуқароларни қўллаб-қувватлашга ихтисослашган бир қатор тузилмалар, хусусан, Ўзбекистон ногиронлар жамияти, Ногиронлар ассоциацияси, Кўзи ожизлар жамияти, Карлар жамияти ва бошқа жамоат ҳамда нодавлат нотижорат ташкилотлари самарали фаолият кўрсатмоқда.

Энг муҳими, тақдир тақозоси билан ногирон бўлиб қолган биронта ҳам юртдошимиз халқимизнинг, давлат идораларининг меҳру эътиборидан четда қолмасдан, ўзининг меҳнати ва қобилияти билан нафақат ҳаётда ўз ўрнини эгаллаб келмоқда, балки азму матонати, сабр-бардоши ва шукроналик фазилатлари билан кўпчиликка ибрат бўлмоқда.

3 декабрь куни Амударё туманидаги “Шер” ресторанида ногиронлиги бўлган юртдошларимиз учун тадбир ташкил этилди.

Тадбирда туман ҳокими Султонбой Йўлдашев, секторлар раҳбарлари, ҳоким ўринбосарлари ҳамда юз нафарга яқин имконияти чекланган юртдошларимиз иштирок этишди.

Туман ҳокими Султонбой Йўлдашев жамиятимизнинг ажралмас қисми бўлган ногиронлиги бор фуқароларнинг ҳуқуқ ва манфаатларини таъминлаш, меҳнат ва турмуш шароитларини яхшилаш борасида мамлакатимизда бир қатор қонунлар ҳамда 25 дан ортиқ бошқа меъёрий-ҳуқуқий ҳужжатлар қабул қилиниб, мустаҳкам қонуний база яратилганлигини, бу эса мазкур тоифа вакилларига тиббий-ижтимоий хизматлар кўрсатиш, уларнинг билим олиши, меҳнат қилиши, малакали тиббий хизматлардан фойдаланиши, ўз истеъдод ва салоҳиятини рўёбга чиқариши, мухтасар айтганда, ўзларини жамиятимизнинг тўлақонли аъзоси деб ҳис этишлари учун янада қулай шароитлар яратиш имконини бераётганлигини таъкидлади.

Тадбир давомида сўзга чиққанлар иштирокчиларга уларнинг сабр-у матонати, шижоати, шукроналиги билан барчага ўрнак бўлаётганлиги, ҳамда интилиш ва истеъдодларини халқимиз юкасак қадрлашини айтиб, мамлакатимизнинг ижтимоий-иқтисодий ҳаётидаги фаол иштироки учун чуқур миннатдорлик билдирди.

Шундан сўнг, имконияти чекланган юртдошларимизга қимматбаҳо совғалар танътанали тарзда топширилди. Ундан ташқари, ногиронлиги бўлган 15 нафар юртдошларимиз реабилитация-техник воситалари билан таъминланди.

Тадбир иштирокчилари тўкин дастурхон атрофида жамулжам бўлишиб, туман Маданият бўлими томонидан тайёрланган концерт дастурини мароқ билан томоша қилдилар. Тадбир давомида туманимизнинг устоз санъаткорлари, умидли эстрада юлдузлари томонидан Ватан, дўстлик, севги-муҳаббат ва инсоний фазилатларни улуғловчи гўзал куй-қўшиқлар янгради.

Тадбир қатнашчилари ўзларига кўрсатилаётган бу каби эътибор учун туман ҳокимлигига ва ташкилотчиларга миннатдорлик билдиришди.

Туман ҳокимлигининг Ахборот хизмати