САНЪАТ ОШУФТАСИ
Инсон зоти ҳар қандай мусиқий оҳангни бефарқ тинглай олмайди. Прима рубобида Улуғбек Тўлибоев ижросидаги гоҳ сокин, гоҳ маҳзун, гоҳ шиддатли куйни тинглаш баробарида қалбингизда ўзгача туйғулар уйғонади, унинг ҳаётга интилиши, яратишга иштиёқи кучлилиги сабаб, тақдир синовларига бўйин эгмай, ҳаётда муносиб ўрнини топишга интилаётганини ҳис қиласиз. Унинг ўзи ҳам рубоб торлари узра бармоқларининг ҳаракатларидан яралаётган оҳангларга шўнғиб кетаётгандай туюлади тингловчига.
Имконияти чекланган, яъни кўзи ожиз бўлса-да, уйида ўтириб ўқишни, тақдирга тан бериб, қизиқишларидан кечишни истамади. Бу йигит Манғит шаҳрининг Дурунки маҳалласида истиқомат қилади. Ҳудуддаги 36-сонли мактабни тугатган. Мактабда ўқиш даврида 9-сонли Болалар мусиқа ва санъат мактабида ўз қизиқишларига кўра, рубоб синфида раҳматлик Аҳмад Худойбергановдан сабоқлар олган.
Мусиқа мактабида соз чалишни ўрганиш билан чекланмай, таниқли хонанда, мактабнинг пуфлаб чалинадиган асбоблар синфи ўқитувчиси Анвар Худойбергановдан анъанавий хонандалик йўналиши бўйича ҳам сабоқлар олди. Санъаткор унга ихлосига кўра, синфдан ташқари анъанавий, мумтоз ашулаларни ижро этиш маҳоратини ўргатди.
Мусиқа мактабини тугатганидан сўнг Улуғбек Жапақ Шомуродов номидаги Нукус маданият ва санъат коллежига ўқишга кирди ва муваффиятли тугатди. Бир неча йиллар туман Кўзи ожизлар жамиятининг ишлаб чиқариш цехида ишлади. Бироқ санъатга қизиқиши уни санъаткорлар даврасига чорлайверди. Ҳозир “Учқун” ашула ва рақс халқ ансамбли аъзоси. Ансамбль бадиий раҳбари Анвар Худойберганов кўмагида қўшиқлар ўрганиб, халқимиз эътиборига ҳавола этаяпти.
– У яқиндагина туманимиз санъати дарғаларидан бири, Қорақалпоғистонда хизмат кўрсатган артист, эл дилида қўшиқлари билан яшаётган ҳофиз Назир Раҳимов хотирасига бағишлаб ўтказилган адабий кечада марҳум устознинг қўшиқларидан ижро этиб, олқишларга сазовор бўлди, – дейди туман Маданият бўлими ходими О.Бегимов.
Айни кунда устозлик қилиб, қўшиқларни маромига етказиб ижро этишни ўргатаётган устози А.Худойберганов ҳам Улуғбекнинг ёдлаш қобилияти кучли, эшитган оҳангини хотирасида сақлаб, ижро эта олишини таъкидлайди.
Эътиборлиси, У.Тўлибоевнинг санъатга меҳри ўзгача. Шу боис ҳар куни йўл босиб, қийинчиликларга қарамай, туман Маданият бўлими биносига, тўгарак машғулотларига ҳаммадан аввал етиб келади. Бўлим томонидан Халқаро ногиронлар кунига бағишлаб тайёрланган катта хайрия концертда Улуғбек Назир Раҳимовнинг “Банданг эрурман” қўшиғини ижро этди.
Имконияти чекланган бўлишига қарамай, ўзининг ҳаётдаги интилишлари сари дадил одимлаётган Улуғбекнинг ижоди баракали бўлишини тилаб қоламиз.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
