АМУДАРЁ ТУМАНИДА “ПРЕЗИДЕНТ АРЧАСИ” БАЙРАМ ТАДБИРИ ЎТКАЗИЛДИ
Юртимизда нишонланадиган қутлуғ саналар, байрамлар кўп. Бироқ ҳар йилнинг бошланиши – Янги йил болажонлар учун барча байрамлар ичида энг завқлиси бўлади, десак адашмаган бўламиз. Шунинг учун ҳам улар йил якунида, Янги йил кириб келишига саноқли кунлар қолганида нишонланадиган “Президент арчаси” томошаларини орзиқиб кутадилар.
Шу йилнинг 29 декабрида Амударё тумани Маданият маркази томошалар зали “Президент арчаси” Янги йил тадбирига ташриф буюрган болажонлар билан гавжум бўлди.
Тадбирда секторлар раҳбарлари, туман ҳокимлиги, халқ таълими бўлими масъуллари, жамоат ташкилотлари вакиллари, мактаблар ўқувчилари, мактабгача таълим ташкилотлари тарбияланувчилари иштирок этдилар. Шунингдек, туманимизнинг турли ҳудудларида истиқомат қиладиган кам таъминланган, боқувчисини йўқотган оилаларнинг 3 ёшдан 15 ёшгача бўлган 32 нафар фарзандлари таклиф этилган.
Катта монитор орқали улуғвор арча, саҳна ёритилиши болажонларнинг ҳаяжонини яна ҳам оширди. Саҳнага бошловчилар чиқиб келди ва барчани яқинлашиб келаётган Янги йил байрами билан қутлади, кириб келаётган йил қутлуғ, баракали бўлишини тиладилар. Янги йилни, тингчлик, тотувликни, бахтиёр болаликни мадҳ этувчи шеърлар янгради.
Саҳнага болажонларни байрам билан қутлаш учун туман ҳокими Султонбой Йўлдашев таклиф этилди.
Туман ҳокими болажонларни яқинлашиб келаётган Янги йил билан қизғин қутлади ва жамоатчилик вакиллари иштирокида Президентимиз томонидан кам таъминланган, боқувчисини йўқотган оилаларнинг фарзандларига юборилган совғаларни топширди.
Юксак меҳр-мурувватдан баҳраманд бўлиб улғаяётган болаларга Юртбошимизнинг совғалари олам-олам шодлик бахш этди.
Шуниси эътиборлики жорий йилги “Президент совғаси”да давлатимиз раҳбарининг болажонларга йўллаган Янги йил байрами табриги, ширинликлар, ўқув қуроллари, электрон китоб, термос, шахмат доскаси каби жиҳозлар бор.
Табриклардан сўнг саҳнага Маданият марказида фаолият юритаётган тўгараклар аъзолари куй-қўшиқлар ижро этдилар. “Нукус шоу” театри жамоаси ижросидаги томошалар ҳам болажонлар шодлигига шодлик қўшди.
Маданият маркази тўгараги аъзолари ижро этган саҳналаштирилган эртакка сеҳрланиб ўтирган томошабинлар саҳнага Янги йил томошалари қаҳрамонлари бўлган Қорбобо, Қорқиз ва ёш болакай қиёфасидаги Янги йил кириб келишини қарсаклар билан олқишладилар.
Қорбобо, Қорқиз ва Янги йилнинг ушбу даврага етиб келгунча бошидан ўтказган саргузаштлари ҳақидаги ҳикоялари, совғалари-ю табрикларини болажонлар мароқ билан тингладилар. Қорбобо, Қорқиз мактаб ўқувчилари, мактабгача таълим ташкилотлари тарбияланувчилари билан биргаликда ижро этган шеърлари, қўшиқлари, рақслари байрам шукуҳини яна ҳам оширди. “Эзгулик ҳамиша ғолиб” эртаги уларнинг мурғак кўнгилларида келажакка ишонч уйғотиб, юртимизнинг фидойи, софдил ва матонатли фарзандлари бўлиб улғайишга ҳавас уйғотди.
“Президент арчаси” томошалари таассуротлари болажонларнинг кўнгилларини тоғдай юксалтирди.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
