83-сонли мактабда “Ҳаёт гўзал, яшаш учун 1001 сабаб!” акцияси доирасида ранг-тасвир йўналиши ишқибозлари иштирокида кўрик-танлов ўтказилди

Ҳаёт – чинданам гўзал. Унинг ҳар лаҳзасидан баҳра олиб, қадрини билиб яшаш эса янада гаштли. Лекин инсон ҳаётида баъзан шундай лаҳзалар бўладики, кундалик ташвишлар, оиладаги арзимаган дилхираликлар туфайли кўнгли чўкиб, тушкун кайфиятга тушиб қолади ва бунинг оқибатида ўзига бевақт касаллик орттириб олади. Асабийлашиб, одамови, баъзан жиззаки бўлиб қолганидан қўли ишга бормайди, кўпчиликка, аралашишдан ўзини четга оладиган, қандайдир лоқайд кайфиятда юради.

Хўш, инсонни бу каби нохуш ҳолатдан олиб чиқиш, унинг руҳий ҳолатини яхшилашнинг имкони борми? “Албатта”, деб жавоб беришади психологлар.

Жорий йилнинг 25-27 апрель саналарида Амударё туманида “Ҳаёт гўзал, яшаш учун 1001 сабаб” мавзусида акция ўтказилди. Акция доирасидаги тадбирларга таълим-тарбия муассасалари ходимлари, умумтаълим мактабларининг ўқувчилари ва уларнинг ота-оналари, овул ва маҳалла фуқаролар йиғинлари ходимлари, ИИБ инспектор-психологлари ҳамда туман ҳудудидаги оилавий поликлиникалар мутахассислари қамраб олинди.

Амударё туманидаги 83-сонли умумтаълим мактабида Нафиса Аминбоева раҳбарлигида бўлиб ўтган “Hayot goʼzal!” мавзусидаги ранг-тасвир йўналиши ишқибозлари иштирокидаги кўрик-танлов ўзининг қамрови ҳамда рассомлик бўйича иқтидори бор ўқувчи-ёшларга кўтаринки кайфият бағишлагани билан муҳим аҳамият касб этди.

Кўрик-танловда рассомлик йўналишига қизиқувчи иқтидорли ёшлар фаол иштирок этишиб, ўз қобилиятларини амалда намоён қилиш орқали келгуси орзулари хусусида тўлқинланиб сўзладилар, чизган расмлари, табиат манзаралари, натюрморт жанридаги ижодий ишлари билан ўз келажакларига лоқайд эмасликларини, ҳаёт гўзалликларини чуқур идрок этишга қодир шахслар сифатида шаклланаётганларини ранг-тасвир жилоларида гавдалантира олдилар.

Тумандаги мактабларда тўртта босқичда бўлиб ўтган мазкур акциядан кўзланган мақсад – ўқитувчи ва ўқувчи ўртасидаги шахслараро муносабатларда ижобий мулоқот тамойилларини шакллантириш, ота-она ва фарзанд ўртасида юзага келиши мумкин бўлган салбий муносабатларнинг олдини олиш ва уларни бартараф этиш, ижтимоий-психологик хусусиятларга кўра, шок ҳолатга тушиб қолган ўқувчилар билан жамоавий ишлаш орқали уларнинг руҳиятида ижобий ўзгаришларга эришиш.

Бундан ташқари, таълим муассасаси ходимлари ва ўқувчиларида ҳаётий кўникмалар ва эркин креатив фикрлашни ривожлантириш, ўқувчилар орасида зўравонлик, аутодеструктив ва деструктив хулқ-атвор, жиноятчилик сингари салбий иллатларга қарши кучли иммунитетни шакллантириш орқали уларда ҳаётни севиш, ҳаётдан завқланиб, атрофидагиларга ҳам завқ-шавқ улашиб яшаш туйғусини уйғотишдан иборат.

Умумтаълим муассасаларида уч кун давом этган “Ҳаёт гўзал, яшаш учун 1001 сабаб!” мавзусидаги 4 босқичли акция доирасида бошланғич синф ўқитувчилари ва ота-оналар учун “Сиз фарзандингизни биласизми?” мавзусида креатив ўйинлар, ўрта синф ўқувчилари ва уларнинг ота-оналари учун “Яшил доира орқали гўзал ҳаёт сари!” мавзусида брейн-ринглар, юқори синф ўқувчилари ва уларнинг ота-оналарига мўлжалланган “Бизнинг оиламиз энг гўзал оила эканлигига 1001 сабаб” мавзусида кўрик-танлов, педагог-ходимлар учун “Ўқитувчилик – энг шарафли касб эканлигига 1001 сабаб” мавзусида кўрик-танлов ҳамда “Hayot goʼzal!” деб номланган қизиқарли семинар-тренинг машғулотлари ташкил этилди.

Шунингдек, хўжалик ишлари бўйича масъул ходимлар учун “Қадриятлар” ва “Ҳаётий кўникмалар” тренинг машғулотлари, овул ва маҳалла фуқаролар йиғинлари ходимлари ҳамда ИИБ инспектор-психологлари, оилавий поликлиникалар шифокорлари иштирокидаги тадбирлар ғоятда мазмунли, қизиқарли таассуротларга бой тарзда ўтди.

“Ҳаёт гўзал, яшаш учун 1001 сабаб!” мавзусидаги акция доирасида ўтказилган барча тадбирлар иштирокчиларга олам-олам завқ-шавқ бағишлади.

Робия ЙЎЛДОШЕВА.