АМУДАРЁ ДАРЁСИДАГИ ЗАМОНАВИЙ ТЕМИР ЙЎЛ ВА АВТОМОБИЛЬ ЙЎЛИ ҚЎШМА КЎПРИГИ ҚУРИЛИШИ НИҲОЯСИГА ЕТМОҚДА

Барчамизга маълумки, Президентимизнинг топшириғига кўра бошланган туманимиздаги Амударё дарёси устидан ўтадиган темир йўл ва автомобиль йўли қўшма кўприги қурилиши жадал суръатларда олиб борилмоқда. Айни пайтда мазкур кўприк қурилишининг якуний босқич ишлари амалга оширилмоқда.

Ушбу замонавий темир-бетон конструкцияли кўприк ишга туширилиши натижасида Қорақалпоғистон Республикаси ва Хоразм вилояти аҳолиси учун савдо-иқтисодий, ижтимоий ва маиший алоқаларнинг янада ривожланиши кутилмоқда.

Ўтган давр мобайнида амалга оширилган катта ҳажмдаги қурилиш ишлари давомида ҳудудда темир йўл излари ётқизиладиган йўлда тупроқ кўтариш ишлари техник талаблар асосида бажарилди. Керакли жойларга автомобиллар ўтиши учун қулайликлар яратилиб, тоннеллар ҳам қурилди. Қурилиш-бунёдкорлик ишлари давомида туман ҳудудида 2 та темир йўл станцияси ҳам барпо этилиб, айни кунларда вокзал бинолари қад ростлади.

Дарёбўйи маҳалласи ҳудудида, Амударё устида олиб борилаётган қурилиш ишлари “Ўзбекистон темир йўллари” акциядорлик жамиятининг буюртмасига кўра, “Боштранслойиҳа” акциядорлик жамияти томонидан лойиҳалаштирилган. “Ўзбекистон темир йўллари” акциядорлик жамиятининг “Кўприк қурилиш трести” унитар корхонаси ишчилари томонидан 400 млн. долларлик лойиҳа асосида қурилаётган янги кўприкнинг узунлиги 412,7 метр, баландлиги 11,5 метр, кенглиги 8,5 метрни ташкил қилади.

Шу билан бир қаторда бошланган 79 км. узунликдаги “Шовот-Гурлан-Жумуртов-Қораўзак” темир йўл линиясини қуриш ишлари ҳам жадал суръатларда давом этмоқда. Ҳозирги пайтда туман ҳудудидан ўтувчи мазкур темир йўл линиясида шағал тошлар ва пўлат изларни ётқизиш, электрлаштириш ишлари амалга оширилмоқда. Янги темир йўл линияси ишга туширилганидан сўнг, Россия ва Қозоғистон Республикасидан юкларни ташиш масофасини 240 км.га, вақтини эса 6 соатга қисқартиришга эришилиши кўзда тутилмоқда.

Ҳозирги пайтда аҳоли фойдаланиб келаётган Амударё устидаги понтон кўприги анча эскириб қолган бўлиб, 1982 йилда ишга туширилган. Юк кўтариш қобилияти 10 тонна бўлган ушбу кўприкдан йилига 600 минг тоннага яқин юк олиб ўтилади. Шунингдек, 3 миллиондан ортиқ аҳоли, 1 миллионга яқин автотранспорт воситалари ҳам мазкур кўприкдан фойдаланади.

Эндиликда янги ва замонавий кўприк ишга туширилса, юк ташиш ҳажми кўпайиб, йилига 25 млн. тоннани ташкил этади. Минтақаларнинг ривожи натижасида иқтисодий самарадорлик йилига 100 млрд. сўмга ошади. Бундан ташқари, Қорақалпоғистондан Хоразмга қурилиш материаллари ва бошқа турдаги маҳсулотларни етказиб бериш харажатлари камаяди, бу эса янги ижтимоий объектлар ва инфратузилмаларни қуришга сарфланадиган маблағлар тежалишини таъминлайди.

Қорақалпоғистон Республикаси ва Хоразм вилоятини боғловчи Амударё дарёси устига қурилаётган автомобиль ва темир йўл қўшма кўприги ишга туширилганидан сўнг, барчамиз учун қулайликлар яратилади ва эски кўприкда содир бўлаётган ҳар хил фавқулодда ҳолатларнинг олди олинади. Шу билан бирга Қорақалпоғистон Республикаси ва Хоразм вилояти аҳолиси ва тадбиркорларига янги темир йўл линияси орқали қатновлардаги муаммолар ҳал этилади, тадбиркорлик фаолиятига кенг имкониятлар яратилади.

Замонавий технологияга асосланган янги турдаги қурилиш конструкцияси асосида барпо этилаётган мазкур кўприк узоқ йиллар мобайнида эзгу мақсадлар йўлида халқимизга хизмат қилади. Мазкур кўприкнинг ишга туширилиши натижасида ҳудудлар фаровонлашиб, аҳолининг турмуш даражаси янада яхшиланади. Темир йўл орқали юртимизнинг бошқа ҳудудлар билан боғланиши туфайли эса нафақат Амударёда, балки бутун Қорақалпоғистонда ижтимоий-иқтисодий тараққиётга кенг йўл очилади.

О.Худойберганова